ឥណ្ឌូណេស៊ីប្រកាសកញ្ចប់ជំរុញសេដ្ឋកិច្ចថ្មីជិត ១ ប៊ីលាន​ដុល្លារ

ប្រទេសឥណ្ឌូណេស៊ីកាលពីថ្ងៃចន្ទ ​បានប្រកាសពីកញ្ចប់ជំរុញសេដ្ឋកិច្ចថ្មី​ក្នុងតម្លៃ ១៦,២៣ ទ្រីលាន​រូពៀ (៩៨៩,៣៣ លាន​ដុល្លារអាមេរិក) ដោយរាប់បញ្ចូលទាំង​ជំនួយស្បៀងអាហារ និងកម្មវិធីកសាងហេដ្ឋារចនាសម្ព័ន្ធ ដែលអាចផ្តល់ការងារបណ្តោះអាសន្នសម្រាប់មនុស្សជាង ៦០០ ០០០ នាក់។ ​នេះបើតាមការចុះផ្សាយរបស់ទីភ្នាក់ងារសារព័ត៌មាន​រ៉យទ័រ។

រដ្ឋមន្ត្រីសេដ្ឋកិច្ច​ឥណ្ឌូណេស៊ី លោក Airlangga Hartarto បានប្រាប់អ្នកយកព័ត៌មានថា ​គោលនយោបាយ​​ជំរុញនេះ នឹង​អនុវត្តនៅក្នុងត្រីមាសទី ៤ នៃឆ្នាំ ២០២៥ ដោយបន្ថែមថា វិធានការមួយចំនួននឹងត្រូវបន្តរហូតដល់ឆ្នាំ ២០២៦ ។

សេដ្ឋកិច្ចឥណ្ឌូណេស៊ីបាន​កើនឡើង ៥,១២ ភាគរយ កាលពីត្រីមាសទី ២ ដែលជាអត្រាកំណើន​ដ៏ល្អបំផុតក្នុងរយៈពេល ២ ឆ្នាំ ប៉ុន្តែអ្នកបង្កើតគោលនយោបាយ​បាន​​លើកឡើងពីសញ្ញាពីលទ្ធភាព​នៃការធ្លាក់ចុះនៅត្រីមាសបន្ទាប់ៗ។

លោក Airlangga បាន​បន្តថា៖ «ជាមួយនឹងកញ្ចប់ជំរុញ​នេះ យើងសង្ឃឹមថា យើងនៅតែអាចឈានដល់គោលដៅកំណើនសេដ្ឋកិច្ច ៥,២ ភាគរយ នៅឆ្នាំនេះ»។

ក្រោម​កញ្ចប់ រដ្ឋាភិបាលនឹងផ្តល់​អង្ករ ១០ គីឡូក្រាម/គ្រួសារ ដល់ប្រជាជន ១៨,៣ លាន​គ្រួសារ​ ដក​ពន្ធ​លើ​ប្រាក់ចំណូលផ្ទាល់ខ្លួនសម្រាប់កម្មករក្នុងវិស័យទេសចរណ៍ និង​បែងចែកប្រាក់ ៥,៣ ទ្រីលាន​រូពៀទៅក្នុងគម្រោង «ធ្វើការងារយកប្រាក់» ​សម្រាប់​កម្មករជាង ៦០០ ០០០ នាក់ ​ចន្លោះពីខែកញ្ញា ដល់ខែធ្នូ។

គម្រោង «ធ្វើការងារយកប្រាក់» ជាធម្មតាពាក់ព័ន្ធនឹងការផ្តល់ប្រាក់ឈ្នួលប្រចាំថ្ងៃដល់បុគ្គលិក ដែលភាគច្រើនមកពីសហគមន៍ជនបទ ដើម្បីធ្វើការលើគម្រោងហេដ្ឋារចនាសម្ព័ន្ធដូចជាផ្លូវ និងស្ពានជាដើម។

លោក Airlangga បាននិយាយថា កញ្ចប់ជំរុញ​រួមបញ្ចូលផងដែរនូវកម្មសិក្សា​ដែលមាន​ប្រាក់ខែសម្រាប់និស្សិតបញ្ចប់ការសិក្សាចំនួន ២០ ០០០ នាក់​។ ការលើកលែងពន្ធលើប្រាក់ចំណូលផ្ទាល់ខ្លួនសម្រាប់វិស័យមួយចំនួន និងគម្រោងធានារ៉ាប់រង នឹងត្រូវបន្តរហូតដល់ឆ្នាំ ២០២៦។ ​

លើសពីនេះ នៅឆ្នាំ ២០២៦ រដ្ឋាភិបាលនឹងចាប់ផ្តើមកម្មវិធីដាំដំណាំឡើងវិញលើផ្ទៃដី ៨៧០ ០០០ ហិកតា ​សម្រាប់ដំណាំដូចជា អំពៅ កាកាវ និងកាហ្វេ ដែលអាចបង្កើតការងារបាន ១,៦ លាន​កន្លែង៕ ​

​