នារដូវវស្សានេះ ជនជាតិដើមភាគតិចដើរបេះបន្លែក្នុងព្រៃយកមកលក់ ដើម្បីដោះស្រាយជីវភាពគ្រួសារ

នៅភូមិភាគឦសាននៃប្រទេសកម្ពុជាសម្បូរទៅដោយជនជាតិដើមភាគតិចច្រើនជាតិសាសន៍កំពុងរស់នៅ ហើយពួកគេបានប្រកបមុខរបរផ្សេងៗគ្នាទៅតាមមុខជំនាញរៀងៗខ្លួន ក្នុងនោះវិស័យកសិកម្មលេចធ្លោជាងគេ។ ជាក់ស្តែង ជនជាតិដើមភាគតិចជាច្រើនក្នុងខេត្តមណ្ឌលគិរី ក្រៅពីដាំដំណាំក្បែរផ្ទះ ឬនៅចម្ការ ពួកគេក៏នៅតែបន្តដើរបេះបន្លែពីព្រៃសហគមន៍​មកលក់នៅទីផ្សារក្នុងស្រុក ដើម្បីជួយលើកស្ទួយជីវភាពរបស់ពួកគេ។

ជាជនជាតិដើមភាគតិចព្នង អ្នកស្រី មេ ហាន់ អាយុ២៩ឆ្នាំ មានទីលំនៅបច្ចុប្បន្ន ភូមិឡៅការ សង្កាត់សុខដុម ក្រុងសែនមនោមរ្យ ខេត្តមណ្ឌលគិរី បានរៀបរាប់ឲ្យដឹងនៅថ្ងៃទី២៥ខែកញ្ញានេះថា សព្វថ្ងៃខ្លួនមានមុខរបរកសិកម្មដាំបន្លែនៅក្បែរផ្ទះបន្តិចបន្តួច។ ប៉ុន្តែនៅពេលដែលបន្លែមិនទាន់ឱ្យផល រូបគាត់តែងដើរចូលព្រៃ ដើម្បីបេះបន្លែដែលជាផលអនុផលនៅព្រៃសហគមន៍ យកមកលក់នៅតាមភូមិ ឬនៅផ្សារ។ អ្នកស្រីនិយាយថា៖« ដោយសារជីវភាពខ្វះខាត ទើបត្រូវក្រោកពីព្រឹកដើម្បីចូលទៅក្នុងព្រៃរុករកបន្លែ ដែលប្រជាពលរដ្ឋក៏ដូចជាអតិថិជនតែងតែទទួលទាននិងគាំទ្រ»។

ជាងនេះទៅទៀត បន្លែនៅក្នុងព្រៃនេះភាគច្រើនសម្បូរនៅក្នុងរដូវវស្សាដែលមានបន្លែចម្រុះគ្រប់ប្រភេទអាចប្រមូលបេះយកទៅលក់នៅលើទីផ្សារ ដើម្បីសម្រួលទៅដល់ជីវភាពប្រចាំថ្ងៃ។ អ្នកស្រីបន្ថែមថា ប្រាក់ដែលអាចរកបានពីការបេះបន្លែព្រៃនេះ មួយថ្ងៃអាចរកចំណូលបានចន្លោះពី១៥០០០រៀល ទៅ២០០០០រៀល ក្នុងមួយថ្ងៃ។ អ្នកស្រីអះអាងថា កម្រៃដែលរកបាននេះ ដើម្បីដោះស្រាយបន្ទុកក្នុងគ្រួសារ ព្រោះត្រូវចិញ្ចឹមកូនប្រុសស្រីចំនួន ៤នាក់ តែម្នាក់ឯង បន្ទាប់ពីបែកបាក់ពីប្តីរបស់ខ្លួននាពេលកន្លងមក។

ជាមួយគ្នានេះ អ្នកស្រីអំពាវនាវដល់ប្រជាពលរដ្ឋមេត្តាជួយគាំទ្រ​បន្លែ​ដែល​ប្រមូល​ផល​ពី​ព្រៃ​សហគមន៍​ខេត្តមណ្ឌលគិរី ក្នុងតម្លៃសមរម្យ ជួយលើកកម្ពស់សុខភាព និងធ្វើឱ្យជនជាតិដើមភាគតិចដែលដាំ និងប្រមូលផលបន្លែក្នុងព្រៃ ទទួលបានប្រាក់ចំណូល ផ្គត់ផ្គង់តម្រូវការប្រចាំថ្ងៃរបស់គ្រួសារ៕

អត្ថបទ៖ រៀម សុខហេង