ចរាចរណ៍

រថយន្ត ៣ គ្រឿង បុកគ្នា ចំណុចផ្លូវបំបែកជា ៤ នៅខណ្ឌឫស្សីកែវ

បានផុស

៩ ខែ មុន

នៅ

ថ្ងៃចន្ទ ២៩ កញ្ញា ២០២៥

ដោយ

រថយន្ត ៣ គ្រឿង បុកគ្នា បន្តបន្ទាប់ បណ្ដាលឲ្យរងការខូចខាតយ៉ាងដំណំ កាលពីវេលាម៉ោងប្រមាណ ៣ រំលងអធ្រាត្រ ឈានចូលថ្ងៃទី ២៩ ខែកញ្ញា ឆ្នាំ ២០២៥ ត្រង់ផ្លូវបំបែកជា ៤ ទល់មុខបុរី Phnom Penh City ផ្លូវក្រសួងដែនដីថ្មី កែងផ្លូវបេតុង សង្កាត់ស្វាយប៉ាក ខណ្ឌឫស្សីកែវ រាជធានីភ្នំពេញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមប្រភពព័ត៌មានពីអ្នកឃើញហេតុការណ៍បានឲ្យដឹងថា នៅមុនពេលកើតហេតុ រថយន្តម៉ាក Toyota Prius ពណ៌ស ផ្លាកលេខ ភ្នំពេញ 2BU-3761 បើកដោយបុរសម្នាក់ រួមដំណើរជាមួយស្ត្រីម្នាក់ ធ្វើដំណើរតាមបណ្ដោយផ្លូវក្រសួងដែនដី ទិសដៅពីជើងទៅត្បូង។ នៅពេលឈប់ស្តុបទៅមុខ តែដោយឃើញភ្លើងអាទិភាព បានបន្តបើកទៅត្រង់។ នៅពេលនោះ មានបុរសជនជាតិចិនម្នាក់ បើករថយន្តម៉ាក Defender ពណ៌ទឹកមាស ផ្លាកលេខ ភ្នំពេញ 2CH-5885 មកតាមផ្លូវបេតុង (អត់លេខ) ទិសដៅពីកើតទៅលិច បំពានស្តុប ជ្រុលទៅបុកជាមួយ Prius យ៉ាងពេញទំហឹង ធ្វើឲ្យ Prius ខ្ទាតទៅប៉ះរថយន្តដឹកឥដ្ឋម៉ាកហ៊ីយ៉ានដាយ ពណ៌ស ផ្លាកលេខ ភ្នំពេញ 3F-9754 ដែលបើកដោយបុរសម្នាក់ ធ្វើដំណើរនៅទិសដៅដូចគ្នា បណ្តាលឲ្យរថយន្ត ហ៊ីយ៉ានដាយ រងការខូចខាតធ្ងន់ ដោយកង់មុខទាំងសងខាងដាច់។

ក្នុងករណីនេះ បុរស និងស្ត្រី ជិះ Prius មាននារីម្នាក់ រងរបួស ត្រូវបានបញ្ជូនទៅសង្គ្រោះនៅមន្ទីរពេទ្យ។ រីឯ Prius រងការខូចខាតចំហៀងមុខយ៉ាងដំណំ។ ចំណែករថយន្ត Defender របស់ជនជាតិចិន ក៏រងការខូចខាតផ្នែកខាងមុខ និងកង់មុខខាងឆ្វេង មិនអាចបើកបរបន្តបាន។ ទោះយ៉ាងណា គ្មានអ្នករងគ្រោះដល់ជីវិតនោះទេ។

ក្រោយពេលកើតហេតុ ដោយមិនទាន់មានដំណោះស្រាយ សមត្ថកិច្ចចរាចរណ៍ បានមកវាស់វែង និងយករថយន្តទាំងបីទៅរក្សាទុកនៅការិយាល័យនគរបាលចរាចរណ៍ផ្លូវគោក ដើម្បីរង់ចាំដោះស្រាយតាមនីតិវិធីបន្តទៀត៕

អត្ថបទ ៖ សំណាង