ឱកាសការងារស្ម័គ្រចិត្ត សម្រាប់អ្នកចង់អភិរក្សវប្បធម៌ខ្មែរ

អង្គការសិល្បៈខ្មែរអមតៈ កំពុងជ្រើសរើសអ្នកស្ម័គ្រចិត្ត ចូលរួមជួយសម្របសម្រួលក្នុងកម្មវិធី “រដូវវប្បធម៌ ២០២៣” ដែលធ្វើឡើងជារៀងរាល់ឆ្នាំ ក្នុងគោលបំណងលើកស្ទួយ និងជំរុញស្មារតីយុវជនកម្ពុជាជំនាន់ក្រោយ ឱ្យមានចិត្តស្រឡាញ់ ថែរក្សា និងគាំទ្រសិល្បៈបុរាណ សម័យ របស់ខ្មែរគ្រប់ទម្រង់។

តួនាទីដែលត្រូវជ្រើសរើសមានដូចជា ផ្នែកពិធីការ, ផ្នែករៀបឆាក, ផ្នែកអ្នកណែនាំភ្ញៀវ, ផ្នែកប្រព័ន្ធផ្សព្វផ្សាយ និងអ្នកថតរូប (តម្រូវឱ្យមានកាមេរ៉ាផ្ទាល់ខ្លួន)។ អ្នកចូលរួមការងារស្ម័គ្រចិត្តនេះ នឹងទទួលបានលិខិតបញ្ជាក់ពីការចូលរួម, កម្រៃសាំង និងបាយនៅពេលចូលរួម, ដំណើរកម្សាន្ត បោះតង់ ឡើងភ្នំនៅខេត្តពោធិ៍សាត់ និងចែកសម្ភារៈសិក្សាទៅកាន់សិស្សរស់នៅក្នុងសហគមន៍។

កម្មវិធី នឹងប្រារព្ធតែថ្ងៃសុក្រ និងសៅរ៍តែប៉ុណ្ណោះ មានរយៈពេល ៥សប្តាហ៍ គិតចាប់ពីថ្ងៃទី០៤ ខែកុម្ភៈ ដល់ថ្ងៃទី០៣ ខែមីនា ឆ្នាំ២០២៣ វេលាម៉ោង (6:30pm-7:30pm) នៅវិទ្យាស្ថានបារាំង IFC។ អ្នកធ្វើការស្ម័គ្រចិត្ត ក៏អាចជ្រើសវេនបម្រើការងារតាមការវិភាគសមស្របរបស់ខ្លួនផងដែរ។

កម្មវិធីរដូវវប្បធម៌២០២៣ ធ្វើឡើងក្រោមប្រធានបទ “តែឯង តែយើង”។ ក្រោមប្រធានបទនេះ នឹងមានលើកយកការសម្តែងចំនួន ៥ មកបង្ហាញ មានដូចជា៖

– ល្ខោនបុរាណវត្តកៀនស្វាយក្រៅ (រឿង លិនថោង)

-របាំសហសម័យ “ដូចៗគ្នា” (Same Same)

-របាំសហសម័យ “ក្លាយ” (Become)

-តន្ត្រីសហសម័យ “សម្លេង” (Voice)

-ល្ខោននិយាយ “ជម្រើសខ្ញុំ” (My Choice)។

ទស្សនីយភាពសិល្បៈវប្បធម៌ខ្មែរ នៅវិទ្យាស្ថានបារាំង IFC នេះ មានការសម្តែងបង្ហាញដូចជា ល្ខោនបុរាណ សម្តែងនៅថ្ងៃទី៣ និងទី៤ ខែកុម្ភៈ។ របាំសហសម័យសម្តែងនៅថ្ងៃទី១០ ដល់ទី១១ខែកុម្ភៈ និងថ្ងៃទី៣ ទី៤ ខែមីនា។ តន្រ្តីសហសម័យ ថ្ងៃទី១៧-ទី១៨ ខែកុម្ភៈ និងល្ខោននិយាយ សម្តែងនៅថ្ងៃទី២៤-២៥ ខែកុម្ភៈ ឆ្នាំ២០២៣នេះ៕

ដោយ៖ អុន ស្រីមាន