Connect with us

វប្បធម៌ ជំនឿ

ត្រណមប្លែកៗ ក្នុងតម្បាញរបស់ជនជាតិដើមភាគតិច ទំពួន ដែលមហាជនមិនធ្លាប់ដឹង

បានផុស

នៅ

ស្ត្រីជនជាតិដើមភាគតិចទំពួនភាគច្រើនចេះត្បាញក្រណាត់នៅក្នុងក្រុមគ្រួសារ និងបានបង្កើតជាសហគមន៍លក់ក្រណាត់ និងដាក់បង្ហាញលក់ជូនភ្ញៀវទេសចរ។ មុខរបរត្បាញក្រណាត់ ក៏បានជួយលើកស្ទួយជីវភាពគ្រួសារថែមមួយកម្រិត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មហាជនភាគច្រើនពិតជាមិនដែលដឹងទេថា បងប្អូនជនជាតិដើមភាគតិច ទំពួន រស់នៅភូមិភ្នំ សង្កាត់យក្ខឡោម ក្រុងបានលុង ខេត្តរតនគីរី មានទំនៀមទម្លាប់ និងត្រណមមួយចំនួន ក្នុងតម្បាញប្រពៃណីដ៏យូរលង់នេះ។

លោក ឆាយ សាវុធ ប្រធានមន្ទីរ វប្បធម៌ និងវិចិត្រសិល្បៈ ខេត្តរតនគិរី បានឱ្យ “កម្ពុជាថ្មី” ដឹងនៅរសៀលថ្ងៃទី ១ ខែកក្កដា ឆ្នាំ ២០២២ នេះថា ប្រពៃណីត្បាញក្រណាត់ របស់ជនជាតិដើមភាគតិចទំពួន មានត្រណមមិនឱ្យបុរសត្បាញក្រណាត់បានទេ។ ចាស់ៗមានជំនឿថា បើសិនជាបុរសត្បាញក្រណាត់ ពេលដើរចូលព្រៃនឹងត្រូវសត្វខ្លាខាំ។ ហេតុនេះហើយបានជាគេមិនអនុញ្ញាតឱ្យបុរសមកត្បាញក្រណាត់។

លោក ឆាយ សាវុធ បានឱ្យដឹងបន្ថែមថា ទម្លាប់មួយទៀត ពេលត្បាញក្រណាត់ អ្នកភូមិជនជាតិដើមភាគតិច ទំពួន ក៏មានពិធីសែនផងដែរ។ ពិធីសែននោះគេមិនប្រើធូបទៀនដូចខ្មែរយើងទេ គឺតែងតែកាប់មាន់ និងកាប់ជ្រូក។ គេយកគ្រឿងក្នុងមាន់ និងគ្រឿងក្នុងជ្រូក ដែលមានឈាមទៅក្រលៀសជាមួយមាត់ពាងស្រា។ គេយកគ្រឿងក្នុងមាន់ ឬជ្រូក ទៅដោតជាមួយឈើ រួចធ្វើពិធីសុំ ម្ចាស់ទឹក ម្ចាស់ដី អារក្សអ្នកតា ដើម្បីមានសុខសប្បាយដល់ក្រុមគ្រួសារ។

ប្រធានមន្ទីរ វប្បធម៌ និងវិចិត្រសិល្បៈ ខេត្តរតនគិរី បញ្ជាក់បន្តថា ពិធីសែននេះ គឺគេតែងតែធ្វើនៅពេលក្រោយត្បាញក្រណាត់រួចរាល់បានច្រើន។ នៅក្នុងពិធីសែននោះ គេមិនអនុញ្ញាតឱ្យអ្នកពីក្រៅចូលទៅថតក្នុងបរិវេណរៀបចំពិធីសែនបានទេ។ ក្រៅពីនេះ ពេលបង្ហាត់បង្រៀនដល់អ្នកជំនាន់ក្រោយ ក៏ត្រូវមានរៀបចំពិធីសែនផងដែរ។ ផ្ទុយពីនេះ បើសិនជាត្បាញក្រណាត់យកទៅលក់ដោយមិនបានសែន ស្ត្រីដែលត្បាញនោះនឹងងងឹតភ្នែក។ ទំនៀមទម្លាប់ខាងលើនេះ បានបន្តរក្សារហូតមកដល់សព្វថ្ងៃ។

គួរបញ្ជាក់ថា មុខរបរត្បាញក្រណាត់នេះ មានតាំងពីយូរលង់ណាស់មកហើយ ដោយការត្បាញពីដើម បងប្អូនជនជាតិដើមភាគតិច ទំពួន បានយកកប្បាស កី និងប្រើវិធីជ្រលក់ស្លឹករុក្ខជាតិ ឱ្យអំបោះឡើងជាពណ៌។ ក៏ប៉ុន្តែ វត្ថុធាតុដើមពិបាករក ទើបសព្វថ្ងៃ ស្ត្រីជនជាតិទំពួនបានទិញអំបោះ ដែលមានពណ៌ស្រាប់ពីផ្សារ បានលុង យកមកត្បាញជាក្រណាត់ ច្នៃបានជាច្រើនមុខ សម្រាប់ប្រើប្រាស់នៅក្នុងគ្រួសារ។ ក្រោយពីត្បាញរួច មួយផ្នែកខ្លះបានយកទៅលក់នៅរមណីយដ្ឋានបឹងយក្ខឡោម ឬក៏នៅផ្សារបានលុង និងលក់ជូនអ្នកបញ្ជាទិញ៕

អត្ថបទ៖ ច័ន្ទ វីរៈ

Helistar Cambodia - Helicopter Charter Services
Sokimex Investment Group

ចុច Like Facebook កម្ពុជាថ្មី

ព័ត៌មានអន្ដរជាតិ៥ ថ្ងៃ មុន

ក្មេងស្រីហ្វីលីពីន-កូរ៉េ ដែលត្រូវសេដ្ឋីឌូបៃយកទៅចិញ្ចឹម ពេលនេះមានស្ថានភាពបែបណាហើយ?

ចរាចរណ៍៤ ថ្ងៃ មុន

ករណី​បុករះ​ស្លាប់​៤នាក់​នៅ​ស្ពាន​អាកាស​ឫស្សី​កែវ​ មាន​ម្នាក់​ជា​និស្សិត​ពូកែ​ជំនាញ​ស្ថាបត្យកម្ម និង​នគរូបនីយវិទ្យា

ជីវិតកម្សាន្ដ៣ ថ្ងៃ មុន

លេចមុខតួឯកប្រុសក្នុងរឿង “កងដៃចាំស្នេហ៍” ស្នាងភ្នួស​ សុំឲ្យគ្រប់គ្នាអហោសិកម្ម

ព័ត៌មានអន្ដរជាតិ៣ ថ្ងៃ មុន

យន្តហោះក្រុមហ៊ុនអាកាសចរណ៍ Jetstar មួយគ្រឿង បុកគ្នាជាមួយរថយន្តសន្តិសុខអាកាសយាដ្ឋាន

ព័ត៌មានជាតិ៥ ថ្ងៃ មុន

គម្រោង​ទឹកស្អាត​ធំបំផុត​ចាយ​ទុនជាង ១០០ លាន​​ដុល្លារ​នៅ​បាក់ខែង ​គ្រោង​​ចាប់ផ្តើម​សាងសង់​

Sokha Hotels

ព័ត៌មានពេញនិយម