តំណមទាំង១០ ក្នុងថ្ងៃចូលឆ្នាំចិនទាំង៣ថ្ងៃ តាមលោកគ្រូចិនសែ ម៉ុង

ជាការពិតណាស់ ចំពោះកូនចៅខ្សែចិន នៅក្នុងថ្ងៃចូលឆ្នាំចិនដែលជាថ្ងៃនាំសិរីសួស្ដីផ្លាស់ប្ដូរឆ្នាំចាស់ផ្លាស់ចូលឆ្នាំថ្មី​ ឆ្នាំម្សិញ គេមានតំណមយ៉ាងតឹងរឹង ដែលត្រូវគោរពតាមនៅក្នុងថ្ងៃទាំង៣នៃថ្ងៃចូលឆ្នាំទាំង៣ថ្ងៃនេះ។ យោងទៅតាមផេក ហុងស៊ុយ របស់លោកគ្រូចិនសែ ម៉ុង បានបរិយាយអំពីតំណមទាំង១០ប្រការនៅក្នុងថ្ងៃចូលឆ្នាំចិន ដែលកូនចៅត្រូវចៀសវាង។

១. ហាមបោកខោអាវ

ប្រសិនជាអ្នកបោកខោអាវនៅក្នុងថ្ងៃចូលឆ្នាំ វាអាចនាំឲ្យបាត់បង់លាភ ហើយលាភសំណាងដែលជាប់នៅលើខោអាវ អាចនឹងរបូតទៅតាមទឹក។

២. ហាមគេងត្រមួក

កូនចៅត្រូវក្រោកពីព្រលឹមរៀបចំម្ហូបអាហារសែនជូនដល់ដូនតា ហើយប្រសិនបើគេងត្រមួក តាមចាស់បុរាណបាននិយាយថា អ្នកគេងត្រមួក ខ្ចិល មិនរហ័សរហួននោះ អ្នកនឹងត្រមួកបែបនេះពេញមួយឆ្នាំ រកស៊ីមិនទាន់គេ ធ្វើអ្វីក៏មិនទាន់គេ។

៣. ហាមបោសសម្រាម

នៅក្នុងថ្ងៃសិរីសួស្ដី គេមិនឲ្យអ្នកបោសសម្រាមនោះទេ ប៉ុន្ដែបើសិនជាចាំបាច់ ក៏អាចបោសបានដែរ ហើយត្រូវបោសពីមុខមកក្រោយវិញ។

៤. ហាមធ្វើឲ្យមានវត្ថុបែក

អ្នកត្រូវប្រុងប្រយ័ត្នខ្ពស់ក្នុងរយៈពេល៣ថ្ងៃនេះ ហាមធ្វើឲ្យរបស់របរបែកបាក់ ដូចជា កែវ ចាន ឬសម្ភារៈផ្សេងៗធ្លាក់បែកឲ្យសោះ នោះវានឹងនាំសំណាងមិនល្អ។ ប្រសិនជាមានរបស់ធ្លាក់បែក សូមកុំស្ដីបន្ទោសគ្នា ត្រូវនិយាយពាក្យល្អៗថា បែកនាំហេងៗ។

៥. ហាមខ្ចីលុយ

គួរជៀសឲ្យឆ្ងាយពីការខ្ចីលុយអ្នកដ៏ទៃ ហើយក៏មិនត្រូវឲ្យអ្នកដ៏ទៃខ្ចីលុយដូចគ្នា វាអាចនាំឲ្យទាំងយើងទាំងគេ បាត់បង់លាភ ឬគ្មានជ័យមង្គល។ ទោះបីជាបងប្អូនសាច់ញាតិក៏ដោយ ក៏គួរហាមខាត់ជាដាច់ខាតនៅថ្ងៃហ្នឹង ចំពោះការខ្ចីលុយគ្នាទៅវិញទៅមក។

៦. ហាមជេរ

អ្នកមិនត្រូវប្រើសម្ដីអាក្រក់ ជេរទៅលើនរណាម្នាក់ នៅថ្ងៃចូលឆ្នាំចិននោះទេ វាអាចនាំផលមិនល្អដល់អ្នក ក៏ដូចជាអពមង្គលចំពោះអ្នក។

៧. ហាមប្រើរបស់មុតស្រួច

ដូចជាកន្ត្រៃ ម្ជុល ឧបករណ៍សម្រាប់កាត់ផ្ដាច់ ឬវត្ថុផ្សេងៗ គួរជៀសវាងកុំប្រើនៅក្នុងកំឡុងពេល៣ថ្ងៃនេះ។

៨. ហាមកុំឲ្យមានរបួស

មិនថាជារបួសតិចឬច្រើននោះទេ មុតដៃ ឬមានការចេញឈាមក្ដី សូមប្រុងប្រយ័ត្នក្នុងថ្ងៃចូលឆ្នាំចិននេះ។

៩. ហាមលេបថ្នាំ

ប្រសិនជាអ្នកមិនចាំបាច់នោះទេ សូមកុំលេបថ្នាំ ដូចជាឈឺក្បាល បន្ដិចបន្ដួចអ្វីនោះ មិនត្រូវលេបនោះទេ ប៉ុន្ដែបើវាជាជម្ងឺជាប្រចាំ ដែលតម្រូវឲ្យលេបថ្នាំ អ្នកអាចលេបបាន។

១០. ហាមកាត់សក់

ការកាត់សក់ វាជាការតំណាងឲ្យការកាត់ទុក្ខ នៅក្នុងប្រពៃណីចិន ដូចនេះ អ្នកគួរកុំកាត់សក់ប៉ះថ្ងៃទាំង៣នេះអី អ្នកអាចកាត់សក់មុនឬក្រោយថ្ងៃចូលឆ្នាំចិនបាន។

បន្ថែមចុងក្រោយនោះគឺ ហាមទៅពិនិត្យសុខភាពនៅក្នុងថ្ងៃចូលឆ្នាំចិន ដែលវាអាចនាំសំណាងមិនល្អ អាចឲ្យយើងងាយនឹងជួបជម្ងឺពេញមួយឆ្នាំ៕

ដើម្បីឲ្យកាន់តែច្បាស់ សូមទស្សនាវីឌេអូខាងក្រោមនេះ៖

https://fb.watch/xoeANecsv3

ប្រភព៖ ហុងស៊ុយ