សេដ្ឋកិច្ច

ការនាំចេញផ្លែស្វាយស្រស់សម្រេចបានជាង ២០ ម៉ឺនតោន ធ្លាក់ចុះជាង ៤% តែផលិតកម្មកែច្នៃដំណាប់ស្វាយកើនឡើង

បានផុស

៩ ខែ មុន

នៅ

ថ្ងៃព្រហស្បតិ៍ ៩ តុលា ២០២៥

ដោយ

យោងតាមអគ្គនាយកដ្ឋានកសិកម្ម នៃក្រសួងកសិកម្ម បានឱ្យដឹងថា គិតចាប់ពីខែមករា ដល់ខែ កញ្ញា ឆ្នាំ ២០២៥ កម្ពុជាសម្រេចបានការនាំចេញ ផ្លែស្វាយស្រស់ចំនួន ២០៦ ៨៦០ តោន ធ្លាក់ចុះ ៤% ធៀបនឹងរយៈពេលដូចគ្នា នៅឆ្នាំ ២០២៤។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ងិន ឆាយ អគ្គនាយក នៃអគ្គនាយកដ្ឋានកសិកម្ម បានឱ្យដឹងថា ការនាំចេញផ្លែស្វាយស្រស់ថយចុះ ដោយសាររោងចក្រដំណាប់ស្វាយក្នុងស្រុកបានប្រមូលទិញផ្លែស្វាយស្រស់មកកែច្នៃជាដំណាប់ស្វាយដើម្បីនាំចេញទៅទីផ្សារក្រៅប្រទេស។

គិតត្រឹមរយៈពេល ៩ ខែ ឆ្នាំ ២០២៥ ការនាំចេញដំណាប់ស្វាយមានការកើនឡើងចំនួន ២៧,៥៤% បើធៀបនឹងរយៈពេលដូចគ្នាឆ្នាំ ២០២៤។

យ៉ាងណាក៏ដោយ កសិករបានលើកឡើងថា តម្លៃស្វាយកែវរមៀតបានធ្លាក់ចុះយ៉ាងគំហុកដល់ ១៥០ រៀល ក្នុងមួយគីឡូក្រាម ហើយសឹងតែគ្មានឈ្មួញទិញកាលពីរដូវប្រមូលផលនៅចុងខែមេសាឆ្នាំ ២០២៥នេះ។

អ្នកស្រី ឈឺន សាវ័ន រស់នៅភូមិលំផាត់ ឃុំអូរដា ស្រុកកំរៀង ខេត្តបាត់ដំបងបានប្រាប់ថា ស្វាយរបស់អ្នកស្រីចោលពេញចម្ការ ដោយមិនបានប្រមូលផលសោះឡើយ ដោយសារតែគ្មានទីផ្សារ ហើយក៏គ្មានឈ្មួញណាម្នាក់ចុះទិញទាល់តែសោះ ហើយបើមានអ្នកទិញគឺសំរិតសំរាងយក ស្វាយល្អហើយបានតម្លៃ ១៥០ រៀល ក្នុងមួយគីឡូក្រាម។

លោក ច័ន្ទ សុផល នាយកប្រតិបត្តិនៃមជ្ឍមណ្ឌលសិក្សាគោលនយោបាយមានប្រសាសន៍ថា ផលិតកម្មស្វាយនៅកម្ពុជា មានលើសតម្រូវការប្រមាណ ១០ ដង ក្នុងមួយឆ្នាំ ខណៈអ្នកសល់ដីធំៗជាច្រើន តែងតែដាំស្វាយកែវរមៀត។

លោក ច័ន្ទ សុផល លើកឡើងថា៖ «ស្វាយនៅកម្ពុជាលើសតម្រូវការអន្តរជាតិ ១០ ដង ដូចតម្រូវការគេប្រមាណ ៣០ ម៉ឺនតោន ក្នុងមួយឆ្នាំ យើងមានសឹងតែ ៣ លានតោន មកពីដីធំៗមួយចំនួនដែលគេមាន គេមិនដឹងធ្វើអី ចេះតែដាំស្វាយទៅ ស្វាយកែវរមៀតហ្នឹងចេះតែដាំ ចាប់ដើមរដូវវស្សាដាំមិនបាច់ស្រោចទឹកទេ»៕

អត្ថបទ៖ ឡេង ដេត