​ទូតកម្ពុជាប្រចាំរដ្ឋកូរ៉េ អះអាងថា ផ្លែស្វាយបិតម៉ាក ​Romdoul ​មានប្រភពដើមមកពីកម្ពុជា ១០០%​

ស្ថានទូតកម្ពុជា​ប្រចាំសាធារណរដ្ឋកូរ៉េ នៅថ្ងៃទី ២០ ឧសភានេះ ​បានអះអាងថា ​ផ្លែស្វាយបិតម៉ាយីហោ Romdoul (រំដួល) ដែល​កំពុង​ដា​ក់​លក់​នៅលើទីផ្សារកូរ៉េ គឺពិតជាមានប្រភពដើមមកពីកម្ពុជា ​១០០% និងត្រូវបាន​នាំចូល ​និង​ចែក​ចាយ​ដោយក្រុមហ៊ុន ​Hyundai Agro (Cambodia) Co., Ltd. ​ដែលបានបោះ​ទុនវិនិ​យោគ​នៅ​កម្ពុជា។​

​ស្ថានឯកអគ្គរាជទូតកម្ពុជាប្រចាំសាធារណរដ្ឋកូរ៉េ ​អះអាងបែបនេះ ​បន្ទាប់ពី មានការបង្ហោះសារ​ជាអក្សរ និងជាវីដេអូ ដោយបានជជែកវែកញែកជាហូរហែ ពាក់ព័ន្ធនឹងប្រភព​របស់ផ្លែស្វាយ​ដែលមានម៉ាកយីហោ Romdoul និងការប្រើប្រាស់ស្លាកសញ្ញាបញ្ជាក់ប្រភពដើម​ថាជាទំនិញរបស់​កម្ពុជា​ នៅលើផលិតផលថៃ។

​ពាក់ព័ន្ធនឹងករណីប្រើប្រាស់​ស្លាកសញ្ញាបញ្ជាក់ថាជា​ផលិតផល​របស់កម្ពុជា នៅលើផ្លែស្វាយរបស់ថៃ ស្ថានឯកអគ្គរាជទូត បានចាត់អនុព័ន្ធពាណិជ្ជកម្មអមស្ថាន​ឯកអគ្គរាជទូត ដើម្បីស្រាវជ្រាវ និងបានទៅដល់ទីតាំង ម៉ាត ដែលបានដាក់លក់ផលិតផល​ផ្លែស្វាយ​ខាងលើ។ ​ជាលទ្ធផល ម្ចាស់ម៉ាតបានទទួលស្គាល់ថា កន្លងមក ពិតជាមានការច្រលំបិតស្លាក​សញ្ញាថា​ជាផលិតផលរបស់កម្ពុជា នៅលើផ្លែស្វាយរបស់ថៃពិតប្រាកដមែន ប៉ុន្តែត្រូវបានកែតម្រូវរួចរាល់ហើយ។

​អនុព័ន្ធពាណិជ្ជកម្មអមស្ថានទូត ក៏បានណែនាំ និងដាស់តឿនដល់ម្ចាស់ម៉ាត ឱ្យមានការប្រុងប្រយ័ត្ន និងជៀសវាងការក្លែងបន្លំប្រភពដើមថា ជាផលិតផលរបស់កម្ពុជា​ ដែលអាចឈាន​ដល់ការចាត់វិធានការតាមផ្លូវច្បាប់។

​ស្ថានឯកអគ្គរាជទូតកម្ពុជាប្រចាំប្រទេសកូរ៉េ អំពាវនាវដល់អ្នកលក់ និងអ្នកចែកចាយទំនិញនានា សូមជៀសវាងការក្លែងបន្លំប្រភពដើមនៃទំនិញ ជាពិសេសការបន្លំថាជាផលិតផលរបស់កម្ពុជា ដែលអាចប្រឈម នឹងការទទួលខុសត្រូវតាមផ្លូវច្បាប់ជាធរមាន៕