​កម្ពុជា​កំពុង​លើកស្ទួយ​ប្រែក្លាយ​ពី​ប្រទេស​ផលិត ​ទៅ​ជា​ប្រទេស​នាំចេញ​គ្រាប់ស្វាយចន្ទី ​និង​ម្រេច​​

កម្ពុជា​កំពុង​ខិតខំ​លើកស្ទួយ និង​ប្រែក្លាយ​ពី​ប្រទេស​ផលិត​ ទៅ​ជា​ប្រទេស​ដែល​នាំចេញ​គ្រាប់​ស្វាយ​ចន្ទី និង​ម្រេច ប្រកប​ដោយ​គុណភាព​ខ្ពស់ ខណៈ​រាជ​រដ្ឋាភិបាល​កម្ពុជា​ក៏បាន​ផ្ដោត​សំខាន់​ទៅ​លើ​ការ​ពង្រឹង​សមត្ថភាព​ប្រកួតប្រជែង​នៅ​លើ​ទីផ្សារ​ពិភពលោក។

​លោកស្រី ចម និម្មល រដ្ឋមន្ត្រីក្រសួងពាណិជ្ជកម្ម មានប្រសាសន៍នៅក្នុង​ «វេទិកាពាណិជ្ជកម្ម​ស្វាយចន្ទី និងម្រេចកម្ពុជា» នៅព្រឹកថ្ងៃទី ២៣ ខែតុលា ឆ្នាំ២០២៥​ នេះថា កម្ពុជា​បាន​និងកំពុងខិតខំលើកស្ទួយ និងប្រែក្លាយពីប្រទេសផលិត ទៅ​ជាប្រទេសដែលនាំចេញ​គ្រាប់ស្វាយចន្ទី និងម្រេច ប្រកបដោយគុណភាពខ្ពស់ និងការរួមចំណែក​របស់រាជរដ្ឋាភិបាល​កម្ពុជា​ក៏បាន​ផ្ដោតសំខាន់ទៅលើការពង្រឹង​សមត្ថភាពប្រកួត​ប្រជែងនៅលើទីផ្សារពិភពលោក។

​ក្រសួងពាណិជ្ជកម្មកំពុងពង្រឹងបន្ថែមក្នុងការនាំចេញ ការធានាគុណភាព វិញ្ញាបនបត្រ និងប្រព័ន្ធ​តាមដានដំណើរការផលិតកម្ម ឱ្យស្របគ្នាទៅនឹងស្តង់ដារទីផ្សារអឺរ៉ុប។

​ក្រសួងពាណិជ្ជកម្ម តាមរយៈកិច្ចសហការជិតស្និទ្ធពីក្រសួង ស្ថាប័នពាក់ព័ន្ធ ដៃគូអភិវឌ្ឍន៍ និងវិស័យឯកជន បានរួមគ្នារៀបចំគោលនយោបាយជាតិស្តីពីស្វាយចន្ទីឆ្នាំ២០២២-២០២៧ និងបច្ចុប្បន្នកំពុងរៀបចំសេចក្តីព្រាងគោលនយោបាយ ម្រេចកម្ពុជា ក្នុងគោលបំណងធ្វើយ៉ាង​ណារួមគ្នាជំរុញការអភិវឌ្ឍផលិតកម្ម ការកែច្នៃ និងទីផ្សារស្វាយចន្ទី និងម្រេច ឱ្យមានលក្ខណៈ​ប្រកួត​ប្រជែង​ប្រកបដោយបរិយាបន្ន ធានានូវនិរន្តរភាព ការធ្វើពិពិធកម្មសេដ្ឋកិច្ច និងប្រែក្លាយ​កម្ពុជា​ឱ្យទៅជាប្រទេសផលិត និងផ្គត់ផ្គង់ចម្បងមួយ សម្រាប់បម្រើទីផ្សារក្នុងស្រុក តំបន់ និងពិភពលោក។

លោក អាន តារា ប្រធាន​សហព័ន្ធស្វាយចន្ទីកម្ពុជា មានប្រសាសន៍ថា កម្ពុជាជាប់លំដាប់ថ្នាក់លេខ២ នៅលើពិភព​លោក ក្នុងការផលិតគ្រាប់ស្វាយចន្ទីដែលមិនទាន់កែច្នៃ ហើយជាប់លេខ១ ខាងគុណភាពគ្រាប់ស្វាយចន្ទី ដោយសារគ្រាប់ស្វាយចន្ទីយើងធំ រសជាតិឆ្ងាញ់ ព័ណ៌សម្បុរល្អ និងមានសារធាតុចិញ្ចឹមផ្សេងៗ ដែលអាចលក់បានតម្លៃថ្លៃជាងគេនៅលើពិភពលោក។

​លោកស្រី ចម និម្មល បន្ថែមថា ​យន្តការចម្បងៗ រួមមាន៖ កិច្ចព្រមព្រៀងពាណិជ្ជកម្មសេរី និង​កិច្ចព្រម​ព្រៀងសេដ្ឋកិច្ចដ៏ទូលំទូលាយក្នុងតំបន់ (RCEP) ការបន្តពង្រីកទីផ្សារថ្មីៗ និងបង្កើនភាព​ទុកចិត្តជាដៃគូពាណិជ្ជកម្ម។ ក្នុងនោះ ក្រសួងពាណិជ្ជកម្មនឹងបន្តខិតខំ ដើម្បីធ្វើយ៉ាងណា​ឱ្យផលិត​ផលកសិកម្មកម្ពុជា ជាពិសេស ផលិតផលគ្រាប់ស្វាយចន្ទី និងម្រេច ឱ្យក្លាយជាផលិតផល​ដែលទទួលបានការទុកចិត្ត និងមានតម្លៃខ្ពស់នៅទីផ្សារពិភពលោក។​

​វេទិកាពាណិជ្ជកម្មស្វាយចន្ទី និងម្រេចកម្ពុជា ​រៀបចំឡើង​ក្រោមមូលបទ “ការបើកច្រកទីផ្សារ​ទៅកាន់សហភាពអឺរ៉ុប ២០២៥” ដែលប្រព្រឹត្តិទៅចាប់ពីថ្ងៃទី២៣-២៤ ខែតុលា ឆ្នាំ២០២៥ នៅសណ្ឋាគារ ហៃយ៉ាត់ រីជិនស៊ី ភ្នំពេញ។

​វេទិកានេះ ត្រូវបានរៀបចំឡើងក្នុងគោលបំណងប្រមូលផ្តុំភាគីពាក់ព័ន្ធទាំងអស់ ជាពិសេស​អ្នកផលិត អ្នកកែច្នៃ អ្នកនាំចេញ វិនិយោគិនជាតិនិងអន្តរជាតិ មកចែករំលែកចំណេះ​ដឹងប្រកប​ដោយនវានុវត្តន៍ និងលើកកម្ពស់ការវិនិយោគលើការកែច្នៃដែល​នឹងបង្កើតតម្លៃបន្ថែមនៅ​ក្នុងវិស័យ​ស្វាយចន្ទីនិងម្រេចកម្ពុជា ព្រមទាំងឱកាសក្នុងការស្វែងរក កាលានុវត្តភាពទីផ្សារ​បន្ថែមទៅកាន់​សហភាពអឺរ៉ុបផងដែរ៕