ក្រុមហ៊ុនប្រេងរដ្ឋចិនធំៗ ផ្អាកការទិញប្រេងរបស់រុស្ស៊ីដោយសារតែទណ្ឌកម្មអាមេរិក

ក្រុមហ៊ុនប្រេងរដ្ឋធំៗរបស់ចិនបានផ្អាកការទិញប្រេងពីរុស្ស៊ីដែលដឹកជញ្ជូនតាមសមុទ្រ ​ក្រោយ​សហរដ្ឋ​អាមេរិក​​ប្រកាសដាក់ទណ្ឌកម្មលើក្រុមហ៊ុនថាមពលយក្ស​រុស្ស៊ី Rosneft និង Lukoil ​នៅថ្ងៃពុធ​។ នេះបើតាមការចុះផ្សាយរបស់ទីភ្នាក់ងារសារព័ត៌មាន​រ៉យទ័រ ដែលស្រង់សម្ដីប្រភពពាណិជ្ជកម្ម​មិនបញ្ចេញឈ្មោះកាលពីថ្ងៃព្រហស្បតិ៍។

ការវិវត្តចុង​ក្រោយ​​ កើតឡើងក្រោយ​ឥណ្ឌា ដែលជាអតិថិជនទិញប្រេងរុស្ស៊ីដ៏ធំ គ្រោង​កាត់បន្ថយការនាំចូលប្រេងឆៅយ៉ាងគំហុកពីរុស្ស៊ី ដើម្បីអនុវត្តតាម​ទណ្ឌកម្ម​​អាមេរិក ដែល​ប្រកាសឡើងជុំវិញការឈ្លានពាន​អ៊ុយក្រែន។ ទណ្ឌកម្មអាមេរិក​ ធ្វើឡើងដើម្បីរារាំង​ប្រាក់ចំណូលសម្រាប់រដ្ឋាភិបាល​ក្រុង​មូស្គូ ដែល​យកទៅ «ចិញ្ចឹម» សង្រ្គាម​នៅអ៊ុយក្រែន ​ខណៈឥណ្ឌា និងចិន អាច​នឹ​ងស្វែងរកប្រភពផ្គត់ផ្គង់ជំនួសថ្មី ដែលនឹង​ជំរុញតម្លៃប្រេងអន្តរជាតិ។

​ប្រភព​ពាណិជ្ជកម្មបាន​អះអាងថា ក្រុមហ៊ុនប្រេងរដ្ឋចិន​ដូចជា PetroChina, Sinopec, CNOOC និង Zhenhua នឹង​​ផ្អាកការទិញប្រេងឆៅតាមសមុទ្ររបស់​រុស្ស៊ី យ៉ាងហោចណាស់ក៏ក្នុងរយៈពេលខ្លី ដោយសារកង្វល់ពាក់ព័ន្ធនឹងទណ្ឌកម្ម​អាមេរិក។

ចិនបាន​នាំចូលប្រេងរុស្ស៊ីប្រហែល ១,៤ លានបារ៉ែល/ថ្ងៃ តាមច្រក​សមុទ្រ។ ភាគច្រើន ក្រុមហ៊ុនចម្រាញ់ប្រេងឯករាជ្យចិន​ទិញប្រេងទាំងនោះ ខណៈការទិញរបស់​ក្រុមហ៊ុនចម្រាញ់ប្រេងរដ្ឋធំៗ​មាន​ការប៉ាន់ប្រមាណខុសៗគ្នា ហើយ​មិនសូវច្បាស់លាស់។ ​ក្រុមហ៊ុន Vortexa Analytics បានប៉ាន់ស្មានថា ក្រុមហ៊ុនរដ្ឋចិន​ទិញប្រេងរុស្ស៊ីតិចជា ២៥០ ០០០ បារ៉ែល/ថ្ងៃ សម្រាប់រយៈពេល ៩ ខែដើមឆ្នាំនេះ ខណៈ​ក្រុមហ៊ុនប្រឹក្សាយោបល់ Energy Aspects បាន​ដំឡើង​តួលេខនោះ​​រហូតដល់ទៅ ៥០០ ០០០ បារ៉ែល/ថ្ងៃ។ ​ ​នេះបើតាមការចុះផ្សាយរបស់រ៉យទ័រ។

ប្រភព​ជា​ពាណិជ្ជករបាននិយាយថា Rosneft និង Lukoil លក់ប្រេងភាគច្រើន​ទៅចិន តាមរយៈ​ឈ្មួញកណ្ដាល​ជំនួសឱ្យការ​ជួញដូរដោយផ្ទាល់ជាមួយ​អ្នកទិញចុងក្រោយ​។ ប្រភព​បន្តថា ក្រុមហ៊ុនចម្រាញ់ប្រេងឯករាជ្យ​ចិនទំនងជានឹងផ្អាកការទិញសិនដូចក្រុមហ៊ុនរដ្ឋដែរ ដើម្បីវិភាគពីផលប៉ះពាល់នៃទណ្ឌកម្មថ្មី​ប៉ុន្តែពួកគេទំំនងនឹងបន្តទិញ​ដដែលនៅពេលក្រោយ៕