អាមេរិកដកទណ្ឌកម្មប្រេងរុស្ស៊ី​ ៣០ ថ្ងៃ ដើម្បីឱ្យប្រទេសនានានាំចូល ចំពេលពិភព​លោកជួបវិបត្តិថាមពល

សហរដ្ឋអាមេរិក​បាន​ដកទណ្ឌកម្ម​លើប្រេង ឬផលិតផលប្រេង​រុស្ស៊ីដែលជាប់គាំងលើសមុទ្រជាបណ្ដោះអាសន្ន ដោយចេញអាជ្ញាប័ណ្ណឱ្យ​ប្រទេសនានាអាចទិញ ឬនាំចូលរយៈពេល ៣០ ថ្ងៃ ចំពេលដែលទីផ្សារប្រេងពិភព​លោក​ប្រឈមនឹង​វិបត្តិដោយសារតែជម្លោះមជ្ឈិមបូព៌ា ដែលផ្ទុះឡើងដោយសារតែការវាយប្រហាររបស់អ៊ីស្រាអែល និងអាមេរិក លើអ៊ីរ៉ង់។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

រដ្ឋមន្រ្តីក្រសួងរតនាគារ លោក ស្កុតថ៍ បេសិនថ៍ បាន​និយាយថា ចំណាត់ការរបស់អាមេរិក គឺជាជំហានដើម្បីធ្វើ​ឱ្យទីផ្សារថាមពលសកលមាន​ស្ថិរភាព។

ចំណាត់ការចុងក្រោយបង្អស់នេះ ដាក់ចេញឡើងក្រោយសហរដ្ឋអាមេរិក កាលពីថ្ងៃពុធ បាន​ប្រកាសពីការបញ្ចេញប្រេងក្នុងស្តុកបម្រុងគ្រាអាសន្ន ប្រមាណ ១៧២ លាន​បារ៉ែល ដើម្បីទប់ស្កាត់ការហក់ឡើងនៃតម្លៃប្រេងដោយសារតែជម្លោះជាមួយអ៊ីរ៉ង់។ ​នោះ​គឺជាផ្នែកមួយនៃយុទ្ធសាស្រ្តរបស់ភ្នាក់ងារថាមពលអន្តរជាតិ (IEA) ដែលមានប្រទេសចំនួន ៣២ ជាសមាជិក ព្រមគ្នា បញ្ចេញប្រេងក្នុងស្តុកបម្រុង ៤០០ លានបារ៉ែល សរុបចូលគ្នា។ ភ្នាក់ងារនិយាយថា សង្គ្រាមនៅមជ្ឈិមបូព៌ាបច្ចុប្បន្ន បង្កើតការរំខានដល់ផ្នែកផ្គត់ផ្គង់ប្រេងដ៏ធំបំផុតក្នុងប្រវត្តិសាស្រ្ត។ ​

លោក បេសិនថ៍ បាន​និយាយថា ចំណាត់ការរបស់សហរដ្ឋអាមេរិក​លើការបើកប្រទេសដទៃឱ្យទិញប្រេងរុស្ស៊ី គឺមិនផ្ដល់ប្រយោជន៍អ្វីធំដុំដល់រដ្ឋាភិបាលរុស្ស៊ីនោះទេ។ កន្លងមក អាមេរិក និងសម្ព័ន្ធមិត្តលោកខាងលិច ដាក់ទណ្ឌកម្មលើប្រេងរុស្ស៊ី ចំពោះការឈ្លានពានអ៊ុយក្រែន។

លោក បេសិនថ៍ បាន​សរសេរបង្ហោះ ដោយបន្ទរនូវអ្វីដែលលោកប្រធានាធិបតី ដូណាល់ ត្រាំ បាន​លើកឡើងថា៖ «ការកើនឡើងជាបណ្ដោះអាសន្ននៃតម្លៃប្រេង គឺជាការរំខានរយៈពេលខ្លី និងបណ្ដោះអាសន្ន ដែលនឹងនាំមកនូវអត្ថប្រយោជន៍យ៉ាងច្រើនដល់ប្រទេសជាតិ និងសេដ្ឋកិច្ចរបស់យើងក្នុងរយៈពេលវែង»។

យោងតាមសេចក្ដីប្រកាសនៅក្រសួងរតនាគារអាមេរិក អាជ្ញាប័ណ្ណដែលចេញកាលពីថ្ងៃព្រហស្បតិ៍ បើកផ្លូវឱ្យប្រទេសនានាអាចនាំជញ្ជូន និងទិញ​ប្រេង និងផលិតផលប្រេងរុស្ស៊ី​ដែលជាប់គាំងលើសមុទ្រ ចាប់ពីថ្ងៃទី ១២ មីនា ដល់ថ្ងៃទី ១១ មេសា។

អាជ្ញាប័ណ្ណនេះ គឺដូចគ្នានឹង​អាជ្ញាប័ណ្ណ ដែលក្រសួង​បើកផ្លូវឱ្យឥណ្ឌា អាចនាំចូលប្រេងរុស្ស៊ីដែលជាប់គាំងលើសមុទ្ររយៈពេល ៣០ ថ្ងៃ ចាប់ពីថ្ងៃទី ៥ មីនា។ ​

គិតត្រឹមថ្ងៃព្រហស្បតិ៍ សារព័ត៌មាន Fox News បានរាយការណ៍ថា មានប្រេងរុស្ស៊ីប្រហែល ១២៤ លាន​បារ៉ែល នៅបន្តជាប់គាំង​លើសមុទ្រ​នៅ​ទីតាំងចំនួន ៣០ ផ្សេងៗគ្នា​ទូទាំងពិភពលោក ដោយ​សារ​តែទណ្ឌកម្មរបស់អាមេរិក​។ Fox News បន្ថែមថា អាជ្ញាប័ណ្ណរបស់អាមេរិក​អាចផ្ដល់ការផ្គត់ផ្គង់ពី ៥-៦ ថ្ងៃ ជំនួសឱ្យប្រេងដែលមិនអាចនាំចេញបាន​ពីមជ្ឈិមបូព៌ា ដោយសារតែការបិទច្រកហ័រមូហ្ស។ ​

ចំពេលដែលតម្លៃប្រេងហក់ឡើងទូទាំងសកល លោក ត្រាំ ឯណោះវិញ បាននិយាយកាលពីថ្ងៃព្រហស្បតិ៍ថា សហរដ្ឋអាមេរិកនឹង​កើប​ប្រាក់ចំណូលបាន​យ៉ាងសណ្ធឹកពីការហក់ឡើងនៃតម្លៃប្រេង​ដោយ​សារ​តែ​សង្រ្គាម។ សម្ដីរបស់លោក ត្រាំ បាន​ជំរុញឱ្យមានការរិះគន់ពីសមាជិកសភាមួយចំនួនដែលចោទប្រកាន់លោកថាយកចិត្តទុកដាក់តែចំពោះអ្នកមានប៉ុណ្ណោះ ខណៈពលរដ្ឋធម្មតាត្រូវបង្កើនការចំណាយដោយ​សារ​តែប្រេងឡើងថ្លៃ៕