តម្លៃប្រេងអន្តរជាតិ​ស្ទុះឡើងជាង ៧% នៅសប្ដាហ៍នេះ

តម្លៃប្រេងអន្តរជាតិ​បាន​ធ្លាក់ចុះបន្តិចពេលបិទការជួញដូរ​នៅថ្ងៃសុក្រ ប៉ុន្តែបាន​ស្ទុះឡើងសម្រាប់អត្រាប្រចាំសប្ដាហ៍ ជុំវិញ​ទណ្ឌកម្ម​របស់អាមេរិក​លើក្រុមហ៊ុនប្រេងរុស្ស៊ីពាក់ព័ន្ធនឹង​សង្រ្គាមអ៊ុយក្រែន និងក្ដីរំពឹងពីការចរចាពាណិជ្ជកម្ម​អាមេរិក-ចិន​ជាដើម។ នេះបើតាមការចុះផ្សាយរបស់ទីភ្នាក់ងារសារព័ត៌មាន​រ៉យទ័រ។

តម្លៃប្រេងម៉ាក Brent បាន​ធ្លាក់ចុះ ៥ សេន ឬ ០,១% មក​នៅត្រឹម ៦៥,៩៤ ដុល្លារ​/​បារ៉ែល ខណៈ​​ប្រេងឆៅ​អាមេរិក បាន​បិទការជួញដូរ​​ត្រឹម ៦១,៥០ ដុល្លារ​/​បារ៉ែល ដោយ​ធ្លាក់ចុះ ២៩ សេន ឬ ០,៥%។

យ៉ាង​ណា​មិញ ក្នុងអត្រាប្រចាំសប្ដាហ៍ តម្លៃប្រេងទាំង២ បាន​កើនឡើងជាង ៧% ដោយ​ខ្លាំងបំផុត​នៅថ្ងៃព្រហស្បតិ៍ ក្រោយ​សហរដ្ឋអាមេរិក​ប្រកាសដាក់ទណ្ឌកម្ម​លើក្រុមហ៊ុនប្រេងរុស្ស៊ីចំនួន ២ ដើម្បីរារាំងចំណូល ដែល​ក្រុង​មូស្គូយកទៅ«ចិញ្ចឹមសង្រ្គាម»។

ចំពោះការធ្លាក់ចុះនៅថ្ងៃសុក្របន្តិច អ្នកវិភាគទីផ្សារ​បាន​លើកឡើងថា កើតឡើងដោយសារតែវិនិយោគិនរងចាំមើលពីភាព​ធ្ងន់ធ្ងរនៃទណ្ឌកម្ម​របស់អាមេរិក។

គួរគូសបញ្ជាក់ថា ក្រុមហ៊ុនរុស្ស៊ី ដែល​រួមមាន​ Rosneft និង Lukoil រួមចំណែក ៥ ភាគរយ នៃផលិតកម្មប្រេង​សកល​ ហើយរុស្ស៊ីគឺជា​ប្រទេសផលិតប្រេងធំបំផុតទី២លើពិភព​លោកឆ្នាំមុន បន្ទាប់ពីសហរដ្ឋអាមេរិក។ ទណ្ឌកម្ម​អាមេរិក​មាន​ន័យថា ការផ្គត់ផ្គង់រងការរំខាន។ ​

ទោះបីជាយ៉ាងណាក៏ដោយ កំណើនតម្លៃប្រេងនៅសប្ដាហ៍នេះ ក៏ត្រូវបាន​ជំរុញផងដែរជុំវិញ​ការរំពឹង​នៃជំនួបរវាងប្រធានាធិបតីអាមេរិក លោក ដូណាល់ ត្រាំ និងសមភាគីចិន​ លោក ស៊ី ជីនពីង នៅកូរ៉េខាងត្បូងសប្ដាហ៍ក្រោយ​ ដែល​អាច​ជួញបន្ធូរបន្ថយភាពតានតឹងពាណិជ្ជកម្ម​រវាងប្រទេសទាំង២។

គួរកត់សម្គាល់ តម្លៃប្រេងស្ថិតនៅក្នុងកម្រិតខ្សោយឆ្នាំនេះ​ ដោយសារតែភាពតានតឹងពាណិជ្ជកម្ម​ ដែល​បង្កកង្វល់សេដ្ឋកិច្ច និងកម្សោយតម្រូវការ ខណៈគេរំពឹងទុកពីកំណើនផលិតកម្មកាន់តែខ្ពស់នៅឆ្នាំក្រោយ៕