លោក សំហេង បូរ៉ា៖ វិស័យហិរញ្ញវត្ថុ ជាសរសៃឈាមនៃពាណិជ្ជកម្ម ជួយបង្កើនផលិតកម្ម តភ្ជាប់ទីផ្សារ និងទំនុកចិត្ត

លោក​ សំហេង បូរ៉ា រដ្ឋលេខាធិការក្រសួងពាណិជ្ជកម្ម បាន​ថ្លែង​ថា វិស័យហិរញ្ញវត្ថុ គឺជា​សរសៃ​ឈាម​នៃ​ពាណិជ្ជកម្ម ពី​ព្រោះ​ការ​ទទួល​បាន​ហិរញ្ញប្បទាន​សមស្រប​នឹង​ជួយ​បង្កើន​ផលិតកម្ម តភ្ជាប់ទីផ្សារ និង​បង្កើន​ទំនុក​ចិត្តក្នុងការធ្វើពាណិជ្ជកម្មសកល។

ថ្លែង​ក្នុង​នៅក្នុងវេទិកា Hongqiao International Economic Forum លើកទី៨ ក្រោមប្រធានបទ «Propelling Global Economic and Trade Development Through Finance» ប្រទេសចិន លោក​ សំហេង បូរ៉ា បាន​គូស​បញ្ជាក់​ថា ក្នុងបរិការណ៍បច្ចុប្បន្ន នវានុវត្តន៍ហិរញ្ញវត្ថុ ជាពិសេស ការទូទាត់តាមប្រព័ន្ធឌីជីថល និងដំណោះស្រាយដោយប្រើប្រាស់បច្ចេកវិទ្យាហិរញ្ញវត្ថុ ក្នុងប្រព័ន្ធទូទាត់ឆ្លងកាត់ព្រំដែន បានផ្លាស់ប្តូរពីរបៀបនៃការធ្វើពាណិជ្ជកម្ម និងវិនិយោគ។

ជាក់ស្តែង រដ្ឋាភិបាលកម្ពុជា ក្នុងការជំរុញវិស័យហិរញ្ញវត្ថុប្រកបដោយបរិយាប័ន្ន និងការតភ្ជាប់ឌីជីថល ក៏​បាន​ដាក់​ចេញ​នូវ​គំនិត​ផ្តួចផ្តើម​មួយ​ចំនួន​រួមមាន៖ ១. ការអភិវឌ្ឍថ្នាល បញ្ជរតែមួយជាតិ និងប្រព័ន្ធ CamDx ដើម្បី​បង្កើន​នូវ​តម្លាភាព និងកាត់បន្ថយពេលវេលា និងការចំណាយ​ក្នុងការ​ប្រើប្រាស់​សេវា​សាធារណៈ​របស់​រាជរដ្ឋាភិបាល។ ២. ការជួយឱ្យ SMEs អាចទទួលបានហិរញ្ញប្បទាន និងការចាប់យកឧបករណ៍ឌីជីថល ដែលនឹងជួយឱ្យពួកគេអភិវឌ្ឍន៍ខ្លួន និងឈានទៅការនាំចេញ​។

៣. ការជំរុញ E-commerce និងcross-border payments ជាពិសេសថ្នាល CambodiaTrade.com ដែលជួយ SMEs អាចធ្វើការដាក់លក់ផលិតផល ផ្គត់ផ្គង់តម្រូវការក្នុងស្រុក និងក្រៅប្រទេស និងថ្នាលផ្សេងៗទៀតដែលក្រសួងពាណិជ្ជកម្មបានធ្វើការជាមួយដើម្បីជំរុញវត្តមានផលិតផលខ្មែរដាក់លក់នៅលើថ្នាលទាំងនោះដូចជា Alibaba និង ៤. ការបង្កើតប្រព័ន្ធ Bakong របស់ធនាគារជាតិនៃកម្ពុជា ដើម្បីជំរុញការប្រើប្រាស់ប្រព័ន្ធទូទាត់ឌីជីថលងាយស្រួល និងឆាប់រហ័ស ដែលនឹងជួយដល់ការធ្វើពាណិជ្ជកម្មប្រកបដោយបរិយាប័ន្ន។

មុននឹងបញ្ចប់ លោក​រដ្ឋលេខាធិការ ក៏បានយកឱកាសនោះលើក​ឡើង​អំពីកាលានុវត្តន៍ភាពសេដ្ឋកិច្ច ពាណិជ្ជកម្ម និងវិនិយោគនៅកម្ពុជា ផងដែរ៕