សេដ្ឋកិច្ច

កម្ពុជានាំចេញទៅសហភាពអឺរ៉ុប សម្រេចបាន ៥ ពាន់លានដុល្លារ កើនឡើងជាង ១៣% នៅឆ្នាំ ២០២៥

បានផុស

៦ ខែ មុន

នៅ

ថ្ងៃចន្ទ ១២ មករា ២០២៦

ដោយ

កម្ពុជានាំចេញទៅកាន់ប្រទេសសមាជិកសហភាពអឺរ៉ុប សម្រេចបាន ៥ ពាន់ កើនឡើង ១៣,៥៥% នៅក្នុងឆ្នាំ ២០២៥ ធៀបនឹងឆ្នាំ ២០២៤ ដែលសម្រេចបាននូវទំហំទឹកប្រាក់ ៤,៤ ពាន់លានដុល្លារ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមក្រសួងពាណិជ្ជកម្ម នៅក្នុងឆ្នាំ ២០២៥ ការដោះដូរទំនិញរវាងកម្ពុជា និងសហភាពអឺរ៉ុប មានទំហំ ៥,៨៧ ពាន់លានដុល្លារ កើន ១០,២០% ធៀបនឹងឆ្នាំ ២០២៤ ក្នុងនោះកម្ពុជានាំចេញទៅសហភាពអឺរ៉ុប សម្រេចបាន ៥ ពាន់ កើនឡើង ១៣,៥៥% ចំណែកឯ សហភាពអឺរ៉ុបនាំចូលមកវិញមានតម្លៃ ៨៦៣ លានដុល្លារ ធ្លាក់ចុះ ៥,៨៨%។

ទីផ្សារនាំចេញសំខាន់ៗរបស់កម្ពុជា នៅក្នុងសហភាពអឺរ៉ុបគឺ ប្រទេសអេស្ប៉ាញ ហូឡង់ អាល្លឺម៉ង់ បារាំង និងបែលហ្ស៊ិក ហើយទំនិញសំខាន់ៗរបស់កម្ពុជា មានដូចជា សម្លៀកបំពាក់ ស្បែកជើង និងផលិតផលធ្វើដំណើរ។

លោក ប៉ែន សុវិជាតិ រដ្ឋលេខាធិការ និងជាអ្នកនាំពាក្យក្រសួងពាណិជ្ជកម្ម មានប្រសាសន៍ថា ទំហំពាណិជ្ជកម្មកម្ពុជាមានកំណើន ឆ្លុះបញ្ចាំងថា កម្ពុជានៅរក្សាបានទីផ្សារសំខាន់ៗរបស់ខ្លួន ដែលជាទីផ្សារពិភពលោក ធានារនូវការផ្គត់ផ្គង់ បង្កើតសក្ដានុភាពកម្ពុជា ក្នុងខ្សែច្រវាក់តម្លៃ និងខ្សែច្រវាក់ផ្គត់ផ្គង់ និងរក្សាបាននូវជំនឿចិត្តពីអ្នកបញ្ជាទិញ និងទីផ្សាររបស់ខ្លួន។

ដៃគូពាណិជ្ជកម្មសំខាន់ៗរបស់កម្ពុជារួមមាន ចិន អាស៊ាន អាមេរិក សហភាពអឺរ៉ុប ជប៉ុន កាណាដា អង់គ្លេស កូរ៉េខាងត្បូង អូស្ត្រាលី និងឥណ្ឌា។

កាលពីពេលថ្មីៗនេះ លោកឧបនាយករដ្ឋមន្ត្រី អូន ព័ន្ធមុនីរ័ត្ន រដ្ឋមន្ត្រី ក្រសួងសេដ្ឋកិច្ច និងហិរញ្ញវត្ថុ មានប្រសាសន៍ថា តាមរយៈការខិតខំកែទម្រង់របស់រាជរដ្ឋាភិបាលតាមវិស័យសំខាន់ៗ សេដ្ឋកិច្ចកម្ពុជា បានស្ទុះងើបឡើងវិញយ៉ាងឆាប់រហ័ស បន្ទាប់ពីវិបត្តិជំងឺកូវីដ១៩ ទោះបីជាត្រូវជម្នះបញ្ហាប្រឈម និងភាពមិនប្រាកដប្រជា នៃស្ថានភាពតំបន់ និងសាកល ដោយសារការប្រឈមមុខភូមិសាស្ត្រនយោបាយស្រួចស្រាល់, ការបែកខ្ញែកនៃសេដ្ឋកិច្ចសាកល ដែលប៉ះពាល់ដល់កិច្ចសហប្រតិបត្តិការ និងពាណិជ្ជកម្មអន្តរជាតិ, ការងើបឡើងវិញនៃនិន្នាការឯកតោភាគីនិយម, ភាពមិនច្បាស់លាស់នៃទស្សនវិស័យនៃកំណើនសេដ្ឋកិច្ច នៃបណ្ដាប្រទេស និងតំបន់ ជាដៃគូពាណិជ្ជកម្មសំខាន់ៗ របស់កម្ពុជា។

រាជរដ្ឋាភិបាលបានព្យាករថា សេដ្ឋកិច្ចកម្ពុជា នឹងសម្រេចកំណើនក្នុងរង្វង់ ៥,២% នៅឆ្នាំ ២០២៥ និងសម្រេចកំណើន ៥% សម្រាប់ឆ្នាំ ២០២៦ ស្របពេលដែល ផលិតផលក្នុងស្រុកសរុប (ផ.ស.ស) សម្រាប់មនុស្សម្នាក់ ត្រូវរំពឹងថា នឹងកើនដល់ ៣ ០២០ ដុល្លារ។

កំណើនសេដ្ឋកិច្ចឆ្នាំ ២០២៦ គាំទ្រដោយវិស័យឧស្សាហកម្ម វិស័យសេវាកម្ម វិស័យកសិកម្ម ខណៈអត្រាអតិផរណាត្រូវបានព្យាករថា ស្ថិតក្នុងរង្វង់ ២,៨%៕

អត្ថបទ៖ ឡេង ដេត