សេដ្ឋកិច្ច

កម្ពុជា អនុម័តគម្រោងបង្កើតតំបន់សេដ្ឋកិច្ចពិសេសចំនួន ៣ ជាមួយទុនវិនិយោគ ២៦០ លានដុល្លារ

បានផុស

៥ ខែ មុន

នៅ

ថ្ងៃពុធ ១១ កុម្ភៈ ២០២៦

ដោយ

ក្រុមប្រឹក្សាអភិវឌ្ឍន៍កម្ពុជា (CDC) បានអនុម័តគម្រោងបង្កើតតំបន់សេដ្ឋកិច្ចពិសេសចំនួន ៣ មានទំហំទុនវិនិយោគសរុប ២៦០ លានដុល្លារ ស្ថិតនៅក្នុងខេត្តកំពត និងខេត្តកំពង់ស្ពឺ នៅខែមករា ឆ្នាំ ២០២៦។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គម្រោងទាំង ៣ រួមមាន គម្រោងវិនិយោគបង្កើតតំបន់សេដ្ឋកិច្ចពិសេស កំពត ហ្វូជាន មានទំហំទុនវិនិយោគ ១២០ លានដុល្លារ ស្ថិតនៅស្រុកជុំគិរី ខេត្តកំពត និងអាចបង្កើតការងារ ២៣៧ កន្លែង។

តំបន់សេដ្ឋកិច្ចពិសេស ខេភី យ៉ញ ស្ថិតនៅក្រុងបូកគោ ខេត្តកំពត មានទំហំទុនវិនិយោគ ៦៥ លានដុល្លារ និងអាចបង្កើតការងារ ២៩១ កន្លែង។

តំបន់សេដ្ឋកិច្ចពិសេស ភ្នំពេញ ឡូជីស្ទិក អេន អ៊ិនដាស្ទៀល ខមផ្លេក (ខេមបូឌា ស៊ូភើផត) ស្ថិតនៅក្រុងច្បាមនខេត្តកំពង់ស្ពឺ មានទំហំទុនវិនិយោគ ៧៥ លានដុល្លារ និងអាចបង្កើតការងារបាន ៣៤០ កន្លែង។

លោកឧបនាយករដ្ឋមន្ត្រី ស៊ុន ចាន់ថុល អនុប្រធានទី១ ក្រុមប្រឹក្សាអភិវឌ្ឍន៍កម្ពុជា មានប្រសាសន៍ថា កំណើននៃទុនវិនិយោគជាបន្តបន្ទាប់ឆ្លុះបញ្ចាំងពីទំនុកចិត្តរបស់អ្នកវិនិយោគនៅកម្ពុជា ខណៈរាជរដ្ឋាភិបាលបានខិតខំប្រឹងប្រែងធ្វើកំណែទម្រង់ ដើម្បីបង្កភាពងាយស្រួលដល់អ្នកវិនិយោគ។

ក្រុមប្រឹក្សាអភិវឌ្ឍន៍កម្ពុជា បានអនុម័តគម្រោងវិនិយោគចំនួន ៤៣ គម្រោង ក្នុងទំហំទុន ប្រមាណ ៧៥២ លានដុល្លារ នៅក្នុងខែមករា ឆ្នាំ ២០២៦ កើនឡើង ០,៤៥% ធៀបនឹងរយៈពេលដូចគ្នាកាលពីឆ្នាំមុន។

នៅក្នុងឆ្នាំ ២០២៥ CDC បានអនុម័តគម្រោងវិនិយោគចំនួន ៦៣០ គម្រោង ក្នុងទំហំទឹកប្រាក់ ១០ ពាន់លានដុល្លារ កើនឡើង ៤៥% ធៀបនឹងឆ្នាំ ២០២៤៕