សេដ្ឋកិច្ច

សហគ្រាសកែច្នៃ ចុះកិច្ចព្រមព្រៀងទិញគ្រាប់ស្វាយចន្ទី ៦ ០០០ តោន ពីកសិករ

បានផុស

៣ ខែ មុន

នៅ

ថ្ងៃចន្ទ ១៦ កុម្ភៈ ២០២៦

ដោយ

ក្រុមហ៊ុនកែច្នៃគ្រាប់ស្វាយចន្ទី Khmer Agro Cashew Co Ltd នៅថ្ងៃទី ០៦ ខែកុម្ភៈ ឆ្នាំ ២០២៦ បានចុះកិច្ចសន្យាទិញគ្រាប់ស្វាយចន្ទីសើមចំនួន ៦០០០ តោន ពីសហគមន៍កសិកម្មចំនួន ៦ ស្ថិតនៅក្នុងស្រុកព្រែកប្រសព្វ ខេត្តក្រចេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កិច្ចសន្យាផលិតកម្មកសិកម្មស្ដីពីការផលិត និងផ្គត់ផ្គង់គ្រាប់ស្វាយចន្ទីសើមពូជ M23 មានរយៈពេល ២ ខែ នៅរដូវកាលប្រមូលផលឆ្នាំ ២០២៦ ខណៈសហគ្រាសមានទិសដៅប្រមូលទិញគ្រាប់ស្វាយចន្ទីដែលមានស្ដង់ដា គុណភាព ដើម្បីយកទៅកែច្នៃហើយនាំចេញ ដែលនឹងចូលរួមចំណែកក្នុងការលើកកម្ពស់ជីវភាពកសិករនៅក្នុងសហគមន៍។

លោក អ៊ា កុកឆេង ប្រធានគ្រប់គ្រងក្រុមហ៊ុន Khmer Agro Cashew មានប្រសាសន៍ថា សហគ្រាស Khmer Agro Cashew Co Ltd ទើបតែបង្កើតឡើងដំបូង នៅក្នុងឆ្នាំ ២០២៥ មានសមត្ថភាពកែច្នៃគ្រាប់ស្វាយចន្ទី ៥០ តោន ក្នុងមួយថ្ងៃ ហើយគ្រោងនឹងដំណើរការកែច្នៃនៅពាក់កណ្ដាលឆ្នាំ ២០២៦។ ទីផ្សារនាំចេញរបស់ក្រុមហ៊ុន គ្រោងនាំចេញទៅប្រទេសជប៉ុន កោះតៃវ៉ាន់ និងទីផ្សារអឺរ៉ុប។

លោក អ៊ា កុកឆេង បញ្ជាក់ថា កិច្ចសន្យាទិញ-លក់គ្រាប់ស្វាយចន្ទីជាមួយសហគមន៍កសិកម្មធ្វើឡើងក្នុងតម្លៃទីផ្សារ តម្លៃដែលក្រុមហ៊ុនផ្ដល់ជូនគឺប្រហាក់ប្រហែលជាមួយឈ្មួញកណ្ដាល។

យោងតាមសមាគមស្វាយចន្ទីកម្ពុជា នៅឆ្នាំ ២០២៥ កម្ពុជារកចំណូលបាន ១,៥ ពាន់លានដុល្លារ ពីការនាំចេញគ្រាប់ស្វាយចន្ទីឆៅ ១ លានតោន កើនឡើង ២៧% ធៀបនឹងឆ្នាំ ២០២៤៕