​ការកើនឡើង​ថ្លៃប្រេង និង​សម្ពាធអាកាសធាតុ​កំពុងគំរាម​កំហែងដល់​ផលិតកម្មស្វាយ​ចន្ទីកម្ពុជា​

វិស័យស្វាយចន្ទីរបស់កម្ពុជា​ កំពុងប្រឈមមុខនឹងបញ្ហាជាបន្តបន្ទាប់ ​ខណៈដែលការឡើងថ្លៃ​ប្រេងម៉ាស៊ូត ​និង​លក្ខខណ្ឌអាកាសធាតុមិនអំណោយផល​ ចាប់ផ្តើមរំខានដល់ផលិតកម្ម ដែលបង្ក​ឱ្យ​មាន​ការព្រួយបារម្ភអំពីការផ្គត់ផ្គង់នៅក្នុងទីផ្សារគ្រាប់ស្វាយចន្ទីឆៅសកល។​

​តម្លៃប្រេងម៉ាស៊ូតបានហក់ឡើងដល់ប្រហែល ៧៥០០ រៀលក្នុងមួយលីត្រ​ ដែលបង្កើនថ្លៃដើមផលិត​កម្មយ៉ាង​ខ្លាំងសម្រាប់កសិករ។ ការកើនឡើងនៃចំណាយលើប្រេងឥន្ធនៈ បានធ្វើឱ្យកសិករជាច្រើន​កាត់​បន្ថយសកម្មភាពចាំបាច់នានា ​ដូចជាការបាញ់ថ្នាំសម្លាប់សត្វល្អិតជាដើម​ ដោយសារការ​ប្រើប្រាស់​ត្រាក់ទ័រ ​និង​ឧបករណ៍ផ្សេងៗមានតម្លៃខ្ពស់។

បញ្ហាអាកាសធាតុដែលមិនទៀងទាត់ រួមមាន ភ្លៀងខុសរដូវ​ រយៈពេលត្រជាក់​អូស​បន្លាយ និងកម្ដៅខ្លាំងរហូតដល់ ៤២ អង្សាសេ កំពុងប៉ះពាល់ដល់វដ្តនៃដំណាំ។ លក្ខខណ្ឌទាំង​នេះកំ​ពុង​បង្កើនហានិភ័យដល់ការចេញផ្កា ការចេញផ្លែ និងទិន្នផលសរុប ដែលកាន់តែបន្ថែម​សម្ពាធ​លើ​កសិករ។

​លោក អួន ស៊ីឡុត ប្រធានសមាគមស្វាយចន្ទីកម្ពុជា មានប្រសាសន៍ថា​ ផលប៉ះពាល់រួម​គ្នានៃ​អតិផរណាប្រេងឥន្ធនៈ និងសម្ពាធអាកាសធាតុ កំពុងធ្វើឱ្យប៉ះពាល់យ៉ាងខ្លាំងដល់កសិករ។

លោក អួន ស៊ីឡុត បានលើកឡើងថា៖ «ការឡើងថ្លៃប្រេងម៉ាស៊ូត​ កំពុងបង្កបញ្ហាដល់​កសិកររបស់យើង​យ៉ាងខ្លាំង។​ កសិករជាច្រើនបានឈប់បាញ់ថ្នាំ​ថែទាំដើមស្វាយចន្ទីរបស់ពួកគេ ព្រោះតម្លៃប្រេង​សម្រាប់ត្រាក់ទ័រខ្ពស់ពេក ខណៈពេលដែលពួកគេត្រូវតស៊ូជាមួយអាកាសធាតុដ៏អាក្រក់ផងដែរ»។

​ការព្រួយបារម្ភលើការផ្គត់ផ្គង់ រីករាលដាលហួសពីកម្ពុជា​អ្នកសង្កេតការណ៍​ឧស្សា​ហកម្មកត់​សម្គាល់​ថា ស្ថានភាពនេះមិនត្រឹមតែកើតមានចំពោះកម្ពុជានោះទេ ​ហើយវាអាចមានផលប៉ះពាល់​កាន់តែ​ទូលំទូលាយដល់ខ្សែច្រវ៉ាក់ផ្គត់ផ្គង់ស្វាយចន្ទីសកល។

សញ្ញាដំបូងៗបង្ហាញ​ពីការរឹតបន្តឹង​នៃ​បរិមាណ​គ្រាប់ស្វាយចន្ទីឆៅដែលមានប្រភពពីកម្ពុជា​ ដែលជាប្រភពផ្គត់ផ្គង់​ដ៏សំខាន់​សម្រាប់​បណ្តាប្រទេសកែច្នៃធំៗ។​

ប្រទេសវៀតណាម ដែលជាអ្នកទិញស្វាយចន្ទីកម្ពុជាដ៏ធំបំផុតមួយ អាចនឹងប្រញាប់ប្រញាល់​ដើម្បីដណ្តើម​យកការផ្គត់​ផ្គង់ដែលមាន​ ខណៈដែលអ្នកកែច្នៃឥណ្ឌា​អាចប្រឈមនឹង​ការប្រកួត​ប្រជែងកើនឡើង និងថ្លៃដើមនៃការប្រមូលទិញកាន់​តែខ្ពស់។

​ការវិវត្តទាំងនេះ ក៏បានបង្ហាញឱ្យឃើញផងដែរថា តើអតិផរណាដែលជំរុញដោយថាមពល កំពុង​ជះឥទ្ធិពលកាន់តែខ្លាំងឡើងដល់ការកំណត់ថ្លៃទំនិញកសិកម្មយ៉ាងដូចម្តេច ដោយបានផ្សារភ្ជាប់​ទីផ្សារប្រេងឥន្ធនៈសកល ទៅនឹងថ្លៃដើមផលិតកម្មនៅតាមកសិដ្ឋាន។​

​ទស្សនវិស័យកើនឡើងសម្រាប់តម្លៃគ្រាប់ស្វាយចន្ទីឆៅ​តាមទស្សនៈពាណិជ្ជកម្ម​ ការរួម​បញ្ចូល​គ្នានៃការកើនឡើងថ្លៃដើមធាតុចូល និងការរំខានទាក់ទងនឹងអាកាសធាតុ កំពុងបង្កើត​សម្ពាធ​រុញឱ្យតម្លៃគ្រាប់ស្វាយចន្ទីឆៅ កើនឡើងក្នុងរយៈពេលខ្លី។

អ្នកវិភាគបង្ហាញពីនិន្នាការកាន់តែទូលំទូលាយដែលកំពុងលេចឡើងនៅទូទាំងតំបន់ផលិតកម្មធំៗ៖ ថ្លៃដើមផលិតកម្មកំពុងកើនឡើង ហានិភ័យនៃការផ្គត់ផ្គង់កំពុងកើនឡើង ហើយអ្នកលក់​កំពុងបង្ហាញ​ពីភាពរឹងត្អឹងចំពោះតម្លៃ (មិនចង់លក់ក្នុងតម្លៃទាប)។ ខណៈសម្ពាធ​ទាំងនេះ​នៅតែបន្ត អ្នកចូលរួមក្នុងទីផ្សារកំពុងតាមដានយ៉ាងដិតដល់នូវទស្សនវិស័យផលិតកម្មរបស់កម្ពុជា ដែលអាចដើរតួនាទីយ៉ាងសំខាន់ក្នុងការកំណត់តម្លៃស្វាយចន្ទីសកល នៅក្នុងរយៈពេល​ប៉ុន្មាន​ខែខាងមុខ៕