​ស្វាយចន្ទីកំពង់ធំ ​ក្លាយជាទំនិញសម្គាល់ភូមិសាស្ត្រ GI រំពឹងតម្លៃកើនឡើងខ្ពស់

ស្វាយចន្ទី​កំពង់ធំ ​ត្រូវ​បាន​ចុះ​បញ្ជីម៉ាក​សម្គាល់​ភូមិសាស្ត្រទំនិញ (GI) ​ ​ដែល​ជា​ជំហាន​សំខាន់​ក្នុង​ការ​លើក​កម្ពស់​កេរ្តិ៍ឈ្មោះ​ និង​អត្តសញ្ញាណ​ផលិតផលខ្មែរ​លើ​ឆាក​អន្តរ​ជាតិ​។

លោក អួន ស៊ីឡុត ប្រធានសមាគមស្វាយចន្ទីកម្ពុជាមានប្រសាសន៍ថា ការចុះបញ្ជីម៉ាកសម្គាល់ភូមិសាស្ត្រទំនិញ​(GI) សម្រាប់ស្វាយចន្ទីកំពង់ធំ នឹង​បើកឱកាសថ្មីៗ សម្រាប់ការកសាងម៉ាកយីហោ និងកំណើននៃការនាំចេញ ជាពិសេសទៅកាន់ទីផ្សារដែលមានតម្លៃខ្ពស់ ដូចជាសហរដ្ឋអាមេរិក និងសហភាពអឺរ៉ុប ជប៉ុន និងកូរ៉េ។

ការប្រើប្រាស់ស្លាកសញ្ញា GI ផ្លូវការ ត្រូវបានរំពឹងថានឹងជួយឱ្យលក់បានក្នុងតម្លៃខ្ពស់ ខណៈស្តង់ដារគុណភាពកាន់តែតឹងរ៉ឹង នឹងជំរុញឱ្យមានការកែលម្អការអនុវត្តកសិកម្មក្នុងចំណោមកសិករស្វាយចន្ទីជាង ២៥,០០០ នាក់។

ក្រសួងពាណិជ្ជកម្មបញ្ជាក់ថា ការកំណត់សម្គាល់នេះផ្តល់នូវអត្ថប្រយោជន៍សំខាន់ៗជាច្រើន រួមមាន៖ ការការពារផ្លូវច្បាប់​ប្រឆាំងនឹងផលិតផលក្លែងបន្លំ ការរក្សាចំណេះដឹងប្រពៃណី និងការបង្កើនឱកាសសម្រាប់វិស័យទេសចរណ៍ និងការផលិតប្រកបដោយនិរន្តរភាពបរិស្ថាន។ វាក៏ជួយបង្កើនតម្លៃទីផ្សារនៃទំនិញទាំងនេះ និងគាំទ្រដល់ការពង្រីកខ្លួនចូលទៅក្នុងទីផ្សារសកល ព្រមទាំងបើកផ្លូវសម្រាប់ការទទួលស្គាល់ GI ជាលក្ខណៈអន្តរជាតិផងដែរ។

គិតមកទល់ពេលនេះ ​កម្ពុជាមាន ​ផលិតផលចុះបញ្ជីម៉ាកសម្គាល់ភូមិសាស្រ្តទំនិញចំនួន ១២ មុខ រួមមាន ម្រេចកំពត ក្រូចថ្លុងកោះទ្រង់ ស្ករត្នោតកំពង់ស្ពឺ ទឹកឃ្មុំព្រៃមណ្ឌលគិរី អំបិល និងផ្កា​អំបិល​កំពត បង្កងតាកែវ ទឹកត្រីកំពតកែប ប្រហុកសៀមរាប សូត្រមាសភ្នំស្រុក ក្តាមថ្មកោះកុង ស្វាយ​ចន្ទី​កំពង់ធំ​ និង​ស្វាយឧត្តរមានជ័យ។

យោងតាមសមាគមស្វាយចន្ទីកម្ពុជា នៅក្នុងឆ្នាំ ២០២៥ កម្ពុជារកចំណូលបាន ​១,៥ ​ពាន់លាន​ដុល្លារ ​ពីការនាំចេញគ្រាប់​ស្វាយ​ចន្ទីឆៅ ១ លានតោន​ កើនឡើង ២៧% ធៀបនឹងឆ្នាំ ២០២៤។

យោងតាមក្រសួងកសិកម្ម គិត្រឹមឆ្នាំ ២០២៥ កម្ពុជាមានផ្ទៃដីប្រមូលផលស្វាយចន្ទីសរុបចំនួនជាង ៥៨ ម៉ឺនហិកតា (៥៨០ ១១៧) ក្នុងនោះ​ខេត្ត​ចំនួន ១០ របស់កម្ពុជា មានផ្ទៃដី​ដាំដុះ​ស្វាយ​​​​​ចន្ទីច្រើនជាងគេរួមាន ខេត្តកំពង់ធំជិត ១៥ ម៉ឺន​ហិកតា (១៤៧ ៧០៣) ខេត្តក្រចេះ ជាង ១០ ម៉ឺនហិកតា (១០២ ៥២០) រតនគិរី ៩៧ ២៥៨ ហិកតា កំពង់ចាម ៤៦ ៥៨២ ហិកតា ស្ទឹងត្រែង ៤៤ ២៥០ ហិកតា ខេត្ត​ត្បូងឃ្មុំ ៣៦ ៤០៣ ហិកតា ខេត្តសៀមរាប ៣៥ ៩១៤ ហិកតា ខេត្តព្រះវិហារ ២៨ ៩៦៥ ហិកតា ឧត្តរមានជ័យ ១៣ ៨១៨ ហិកតា និងមណ្ឌលគិរី ៩ ៨៥៨ ហិកតា៕

អត្ថបទ៖ ឡេង ដេត