សេដ្ឋកិច្ច

តម្លៃគ្រាប់ស្វាយចន្ទីស្ទុះឡើង នៅចំពេលទិន្នផលធ្លាក់ចុះ

បានផុស

៣ ខែ មុន

នៅ

ថ្ងៃព្រហស្បតិ៍ ១២ មីនា ២០២៦

ដោយ

តម្លៃទីផ្សារគ្រាប់ស្វាយចន្ទីឆៅកម្ពុជាបានស្ទុះឡើងខ្ពស់ជាប្រវត្តិសាស្ត្រដល់ជាង ៧០០០ រៀល ក្នុងមួយគីឡូក្រាម នារយៈពេលប៉ុន្មានថ្ងៃនេះ នៅចំពេលដែលទិន្នផលថយចុះដោយសារការប្រែប្រួលអាកាសធាតុ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក អួន ស៊ីឡុត ប្រធានសមាគមស្វាយចន្ទីកម្ពុជា ប្រាប់កម្ពុជាថ្មីនៅថ្ងៃព្រហស្បតិ៍ ទី ១២ ខែមីនានេះថា តម្លៃគ្រាប់ស្វាយចន្ទីឆៅបានហក់ឡើងពី ៥២០០ រៀល ក្នុងមួយគីឡូក្រាម ដល់ជាង ៧០០០ រៀល ក្នុងមួយគីឡូក្រាម ប្រៀបធៀបនឹងរដូវប្រមូលផលឆ្នាំមុន។

កត្តាដែលធ្វើឱ្យតម្លៃគ្រាប់ស្វាយចន្ទីហក់ឡើង ដោយសារលក្ខខណ្ឌអាកាសធាតុមិនអំណោយផល ធ្វើឱ្យការប្រមូលផលមានភាពយឺតយ៉ាវ និងអាចកាត់បន្ថយផលិតកម្ម ប្រសិនបើដំណាំរងការខូចខាត។

ម្យ៉ាងទៀត គោលនយោបាយរឹតត្បិតលើការនាំចេញគ្រាប់ស្វាយចន្ទីឆៅនៅអាហ្វ្រិកខាងលិច ដើម្បីពង្រឹងឧស្សាហកម្មកែច្នៃក្នុងស្រុក ក៏ជាកត្តាជំរុញតម្លៃគ្រាប់ស្វាយចន្ទីឱ្យកើនឡើងផងដែរ។

វិធានការបែបនេះអាចនឹងធ្វើឱ្យការផ្គត់ផ្គង់គ្រាប់ស្វាយចន្ទីឆៅជាសកលមានភាពតឹងតែង ខណៈដែលអាហ្វ្រិកខាងលិចនៅតែជាតំបន់ផលិតដ៏ធំបំផុតមួយរបស់ពិភពលោក។

លោក ងួន គួយ ម្ចាស់ចម្ការស្វាយចន្ទីនៅខេត្តស្ទឹងត្រែង បានប្រាប់ថា ជាទូរទៅចម្ការរបស់លោកអាចទទួលផលប្រមាណ ២,៥ តោន ទៅ ៣ តោន ក្នុងមួយហិកតា ប៉ុន្តែឆ្នាំនេះ ទិន្នផលបានថយចុះដល់ ១,៥ តោន ទៅ ២ តោន ក្នុងមួយហិកតា។

ចំណែកឯ ម្ចាស់ចម្ការស្វាយចន្ទីនៅខេត្តក្រចេះ លោក បូ រ៉ា ប្រាប់ថា៖ «ឆ្នាំមុន ខ្ញុំរើសម្ដងបានជាង ១០០ គីឡូក្រាម (២-៣ ថ្ងៃរើសម្ដង) តែឆ្នាំនេះ រើសម្ដងបានតែ ១០ គីឡូក្រាម (១សប្ដាហ៍ម្ដង) ស្វាយចន្ទីឃើញមានតែផ្ដា តែអត់ក្ដិបទេ»។

លោក អួន ស៊ីឡុត ប្រធានសមាគមស្វាយចន្ទីកម្ពុជាបានបញ្ជាក់ថា ការប្រែប្រួលអាកាសធាតុ បណ្តាលឱ្យមានភ្លៀងកក់ខែ បានធ្វើឱ្យដំណាំស្វាយចន្ទីជាច្រើនរងការខូចខាត ខណៈការប្រមូលផលទើបចាប់ផ្ដើមបានតិចតួច។

លោក អួន ស៊ីឡុត បន្ថែមថា ប្រសិនបើវិបត្តិអាកាសធាតុនៅតែបន្តរំខានដល់ខ្សែច្រវាក់ផលិតកម្ម នោះ ទិន្នផលស្វាយចន្ទីកម្ពុជានៅឆ្នាំ២០២៦ អាចនឹងប្រឈមនឹងការធ្លាក់ចុះខ្លាំង។

ការប្រមូលផលគ្រាប់ស្វាយចន្ទីនៅរដូវកាលថ្មី ឆ្នាំ ២០២៦ នឹងត្រូវពន្យាពេលដល់ខែមេសា ដោយសារអាកាសធាតុបានធ្វើឱ្យចន្ទីទុំយឺតជាងការរំពឹងទុក។

ទិន្នផលគ្រាប់ស្វាយចន្ទីរបស់កម្ពុជារំពឹងសម្រេចបាន ៨០ ម៉ឺនតោន ដល់ ១ លានតោន នៅក្នុងរដូវប្រមូលផលឆ្នាំ ២០២៦ ដោយសារការកើនឡើង នៃផ្ទៃដីដាំដុះ រួមផ្សំនឹងការអំណោយផលពីអាកាសធាតុ។

យោងតាមសមាគមស្វាយចន្ទីកម្ពុជា នៅក្នុងឆ្នាំ ២០២៥ កម្ពុជារកចំណូលបាន ១,៥ ពាន់លានដុល្លារ ពីការនាំចេញគ្រាប់ស្វាយចន្ទីឆៅ ១ លានតោន កើនឡើង ២៧% ធៀបនឹងឆ្នាំ ២០២៤។ គិតមកដល់ពេលនេះ កម្ពុជាមានផ្ទៃដីដាំដុះស្វាយចន្ទីប្រមាណ ៧៤ ម៉ឺនហិកតា៕

អត្ថបទ៖ ឡេង ដេត