ភ្ញៀវទេសចរអន្តរជាតិទៅថៃ បន្តធ្លាក់ចុះ​គួរឱ្យបារម្ភនៅដើមឆ្នាំនេះ

⁠ចំនួនភ្ញៀវទេសចរបរទេសទៅលេងប្រទេសថៃបានបន្តធ្លាក់ចុះគួរឱ្យព្រួយបារម្ភនៅដើមឆ្នាំនេះ (១ មករា – ១៥ កុម្ភៈ) ធៀបនឹងរយៈពេលដូចគ្នាឆ្នាំមុន ដល់ទៅប្រមាណ ៧,៥៩% មកត្រឹម ៥,០៧ លាននាក់។ នេះបើតាមការចុះផ្សាយរបស់កាសែតបាងកកប៉ុស្តិ៍ ដែលស្រង់ទិន្នន័យពីក្រសួងទេសចរណ៍ថៃ កាលពីថ្ងៃអង្គារ។

ក្នុងនោះ ​ចិននៅតែជាទីផ្សារធំជាមួយនឹងភ្ញៀវទេសចរជាង ៧៧០ ០០០ នាក់ និងបន្ទាប់មកគឺម៉ាឡេស៊ីជាង ៤៦១ ០០០ នាក់។

ថៃបាន​កំណត់គោលដៅការមកដល់នៃភ្ញៀវទេសចរបរទេសប្រមាណ ៣៥ លាននាក់នៅឆ្នាំនេះ ដែលទាបជាងកម្រិត ៤០ លាននាក់ ក្នុងឆ្នាំ ២០១៩ ពោលគឺមុនសម័យកូវីដ១៩។

គេមើលឃើញថា ការធ្លាក់ចុះនៃ​ចំនួនភ្ញៀវនៅដើមឆ្នាំនេះ គឺជាការបន្ត​​នៃវិបត្តិទេសចរណ៍​​កាលពីឆ្នាំមុន ដែលថៃបានកត់ត្រាភ្ញៀវបរទេសត្រឹម ៣២,៩ លាននាក់ ពោលគឺធ្លាក់ចុះ ៧,២៣% ធៀបនឹងឆ្នាំ ២០២៤។

វិស័យទេសចរណ៍ថៃនៅឆ្នាំមុន បាន​ប្រឈមនឹង​បញ្ហាជាបន្តបន្ទាប់ រាប់តាំងពីដើមរហូតដល់ចុងឆ្នាំ រួមទាំងកង្វល់សុវត្ថិភាពពាក់ព័ន្ធនឹង​ការជួញដូរមនុស្ស ប្រាក់បាតឡើងថ្លៃ ជម្លោះព្រំដែនជាមួយកម្ពុជា គ្រោះទឹកជំនន់ និងរញ្ជួយដី ហានិភ័យពីខាងក្រៅរួមទាំងពន្ធអាមេរិក និងការប្រកួតប្រជែងពីប្រទេសក្នុងតំបន់ផ្សេងៗទៀត រួមទាំងវៀតណាម៕