​កម្ពុជា​ អនុម័តគម្រោងវិនិយោគមានទំហំទឹកប្រាក់​ជាង ​២,៦ ​ពាន់លានដុល្លារ ​​ក្នុង​រយៈពេល ​៤ ​ខែ

កម្ពុជា​បានអនុម័តគម្រោងវិនិយោគចំនួន ១៨៤ ​ជាមួយទំហំទុនប្រមាណជាង ២,៦ ​លានដុល្លារ ​នៅក្នុងរយៈពេល ៤ ​ខែ ២០២៦ ​ខណៈរំហូរវិនិយោគមានវឌ្ឍនភាពល្អប្រសើរ។​

លោកឧបនាយករដ្ឋមន្ត្រី​ ស៊ុន ចាន់ថុល ​អនុប្រធានទី១ ​ក្រុម​ប្រឹក្សាអភិវឌ្ឍន៍​កម្ពុជា មាន​ប្រ​សា​សន៍​​នៅ​ក្នុង​វេទិកា​វិនិយោគ​កម្ពុជានៅ​ថ្ងៃ​ទី ​៧ ​ឧសភា ២០២៦ថា​ ការវិនិយោគមានសន្ទុះ​ស្របនឹង​ភាព​ធន់​នៃ​សេដ្ឋកិច្ច។

ឧបនាយករដ្ឋមន្ត្រី​ បញ្ជាក់ថា រំហូរវិនិយោគមានវឌ្ឍនភាពល្អប្រសើរ ក្នុងនោះតំបន់សេដ្ឋកិច្ចពិសេស បានដើរតួនាទីសំខាន់ ក្នុងការទាក់ទាញវិនិយោគ និងជាយន្តការគន្លឹះក្នុងការជំរុញពិពិធកម្ម​ឧស្សា​ហ​កម្ម​នៅកម្ពុជា មុខសញ្ញាវិនិយោគ ក្នុងវិស័យឧស្សាហកម្មថ្មីៗ ក្រៅពីវិស័យកាត់ដេរ សម្លៀក​បំពាក់​ ស្បែកជើង និងផលិតផលធ្វើដំណើរ ភាគច្រើនប្រមូលផ្ដុំ និងមានសកម្មភាព​ក្នុងតំបន់​សេដ្ឋកិច្ច​ពិសេស ដូចជា ការផ្គុំដំឡើងយានយន្ត គ្រឿងបង្គុំយានយន្ត គ្រឿងអេឡិចត្រូនិក និងអគ្គិ​សនី។

​លោក ស៊ុន ចាន់ថុល បាន​បន្ថែមថា ​ការបន្តទទួលបានរំហូរវិនិយោគ ​មិនត្រឹមតែបង្ហាញពីស្ថិរភាព និង​កំណើន​ប៉ុណ្ណោះ​ទេ ​ប៉ុន្តែ​ឆ្លុះ​បញ្ចាំង​អំពីទំនុកចិត្ត​របស់​វិនិយោគ​នៅ​កម្ពុជា។​

​នៅ​ក្នុង​ឆ្នាំ ​២០២៥ ​ក្រុមប្រឹក្សាអភិវឌ្ឍន៍កម្ពុជា បានអនុម័តគម្រោងវិនិយោគចំនួន ៦៣០ ជាមួយនឹង​ទុន​វិនិយោគ ១០ ពាន់លានដុល្លារ ​កើនឡើងជាង ​៤០% ធៀបនឹងឆ្នាំ ២០២៤៕