វៀតណាម​បន្ត​អនុគ្រោះ​ពន្ធ​ប្រេងឥន្ធនៈដល់ចុងខែកញ្ញា ​ជុំវិញភាពតានតឹង​មជ្ឈិមបូព៌ា

វៀតណាមបានសម្រេច​​បន្ត​វិធានការបន្ធូរបន្ថយពន្ធប្រេងឥន្ធនៈរហូតដល់ថ្ងៃទី ៣០​ ខែកញ្ញា ដើម្បីរក្សាស្ថិរភាពទីផ្សារថាមពលក្នុងស្រុក ធានាសន្តិសុខថាមពល និងគាំទ្រដល់កំណើនសេដ្ឋកិច្ច ចំពេលភាពតានតឹងមជ្ឈិមបូព៌ានៅតែបន្ត។ នេះបើតាមការចុះផ្សាយរបស់កាសែត Tuoi Tre នៅថ្ងៃព្រហស្បតិ៍។

ការបន្ធូរបន្ថយពន្ធនោះ រួមទាំងការរក្សាអត្រា​ ០% សម្រាប់ពន្ធ​អនុគ្រោះនាំចូល ​និងពន្ធការពារបរិស្ថាន ​និងការលើកលែងពន្ធលើ​​តម្លៃបន្ថែម​។ វាអនុវត្តលើប្រេងម៉ាស៊ូត ប្រេងឥន្ធនៈ ប្រេងយន្តហោះ និងប្រេង kerosene ជាដើម។

រដ្ឋាភិបាលវៀតណាម​បានប្រកាសពីការបន្ដនេះ ក្រោមសំណើរបស់ក្រសួង​ហិរញ្ញវត្ថុ។ ដើមឡើយ វិធានការដដែលបានផុតកំណត់នៅចុងខែមេសា រួមមកបន្តដល់ចុងខែមិថុនា។ ​

រដ្ឋាភិបាលវៀតណាម​បាននិយាយថា ការពន្យារពេលចុងក្រោយនេះ ឆ្លុះបញ្ចាំងពីភាពមិនប្រាកដប្រជាជាបន្តបន្ទាប់ដែលជាប់ទាក់ទងនឹងជម្លោះនៅមជ្ឈិមបូព៌ា ហើយវិធានការយ៉ាងណានោះ គឺអាស្រ័យលើស្ថានភាពសេដ្ឋកិច្ចសង្គម តម្រូវការសន្តិសុខថាមពល និងការអភិវឌ្ឍនៅក្នុងទីផ្សារប្រេងឥន្ធនៈក្នុងស្រុក៕