សេដ្ឋកិច្ច

អ្នកជំនាញស្នើឱ្យពង្រឹងការផ្សព្វផ្សាយ ដើម្បីស្ដារកំណើនភ្ញៀវទេសចរអន្តរជាតិ

បានផុស

១៣ វិនាទី មុន

នៅ

ថ្ងៃព្រហស្បតិ៍ ១៦ កក្កដា ២០២៦

ដោយ

ប្រធានសមាគមទេសចរណ៍អាស៊ីប៉ាស៊ីហ្វិកកម្ពុជា (PATA) លោក ធួន ស៊ីណាន ថ្លែងថា ការស្តារកំណើនភ្ញៀវទេសចរ ជាការទទួលខុសត្រូវរួមរបស់រាជរដ្ឋាភិបាល វិស័យឯកជន សហគមន៍មូលដ្ឋាន និងប្រជាពលរដ្ឋទាំងអស់ ព្រោះទេសចរណ៍គឺជាឧស្សាហកម្មដែលពាក់ព័ន្ធនឹងវិស័យជាច្រើន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ធួន ស៊ីណានយល់ឃើញថា៖ «យើងត្រូវបន្តពង្រឹងការផ្សព្វផ្សាយកម្ពុជាទៅកាន់ទីផ្សារអន្តរជាតិ ដោយផ្តោតលើទីផ្សារ ដែលមានសក្តានុពលខ្ពស់ ដូចជា ចិន ឥណ្ឌា កូរ៉េខាងត្បូង ជប៉ុន អឺរ៉ុប អាមេរិក និងទីផ្សារអាស៊ាន ព្រមទាំងប្រើប្រាស់ប្រព័ន្ធឌីជីថល និងបណ្តាញសង្គមឱ្យកាន់តែមានប្រសិទ្ធភាព»។

បើតាមលោក ធួន ស៊ីណា កម្ពុជាត្រូវបន្តពង្រឹងការតភ្ជាប់ជើងហោះហើរអន្តរជាតិ និងជំរុញក្រុមហ៊ុនអាកាសចរណ៍ឱ្យបើកជើងហោះហើរត្រង់មកកាន់កម្ពុជា ព្រោះការធ្វើដំណើរងាយស្រួល គឺជាកត្តាសំខាន់ក្នុងការសម្រេចចិត្តរបស់ភ្ញៀវទេសចរ។

កម្ពុជាត្រូវបន្តអភិវឌ្ឍផលិតផលទេសចរណ៍ថ្មីៗ មិនអាស្រ័យតែអង្គរប៉ុណ្ណោះទេ ប៉ុន្តែត្រូវលើកកម្ពស់ ទេសចរណ៍ឆ្នេរ និងកោះ ទេសចរណ៍ធម្មជាតិ ទេសចរណ៍សហគមន៍ ទេសចរណ៍កសិកម្ម ទេសចរណ៍ ម្ហូបអាហារ ទេសចរណ៍សុខុមាលភាព និងទេសចរណ៍កីឡា ដើម្បីបង្កើនរយៈពេលស្នាក់នៅ និងការចំណាយរបស់ភ្ញៀវ។

យោងតាមក្រសួងទេសចរណ៍ គិតត្រឹមរយៈពេល ៥ ខែ ២០២៦ កម្ពុជាស្វាគមន៍ភ្ញៀវទេសចរអន្តរជាតិប្រមាណ ១,៥ លាននាក់ ថយចុះ ៤៧% ធៀបនឹងរយៈពេលដូចគ្នា នៅឆ្នាំ ២០២៥។

ក្នុងចំណោមភ្ញៀវទេសចរណ៍អន្តរជាតិជាង ១,៥ លាននាក់ មានទេសចរចិនជិត ៤០ ម៉ឺននាក់ ធ្លាក់ចុះ ១៩% វៀតណាម ៣៨ ម៉ឺននាក់ ធ្លាក់ចុះជិត ២៦% អាមេរិកជាង ៩ ម៉ឺននាក់ ធ្លាក់ចុះជាង ១១% អង់គ្លេសជាង ៦ ម៉ឺននាក់ ធ្លាក់ចុះ ១៤,៥% និងបារាំងជាង ៥ ម៉ឺននាក់ ធ្លាក់ចុះ ១៦,៥%។

នៅក្នុងឆ្នាំ ២០២៥ កម្ពុជាទទួលបានភ្ញៀវទេសចរអន្តរជាតិចំនួន ៥,៥៧ លាននាក់ ធ្លាក់ចុះ ១៦,៧% ធៀបនឹងឆ្នាំ ២០២៤ ខណៈចំណូលបានពីវិស័យទេសចរណ៍មានចំនួន ៣.៨៧៨ លានដុល្លារ កើនឡើង ៦,៦%៕

អត្ថបទ៖ ឡេង ដេត

Related Topics:ភ្ញៀវទេសចរ