ព័ត៌មានអន្ដរជាតិ

វៀតណាមគ្រោងបើកព្រលានយន្តហោះខ្នាតយក្សនៅចុងឆ្នាំ ក្នុងមហិច្ឆតាប្រកួតប្រជែងជាមួយសិង្ហបុរី

បានផុស

២៥ វិនាទី មុន

នៅ

ថ្ងៃព្រហស្បតិ៍ ១៦ កក្កដា ២០២៦

ដោយ

វៀតណាមកំពុងបោះជំហានធំមួយដើម្បីប្រជែងជាមួយសិង្ហបុរីក្នុងការក្លាយជាមជ្ឈមណ្ឌលអាកាសចរណ៍ប្រចាំតំបន់ ដោយគ្រោងដាក់ឱ្យដំណើរការអាកាសយានដ្ឋានអន្តរជាតិ ឡុង ថាញ់ (Long Thanh) នៅថ្ងៃទី១ ខែធ្នូ ឆ្នាំ២០២៦ និងផ្ទេរជើងហោះហើរអន្តរជាតិភាគច្រើនពីព្រលានយន្តហោះ Tan Son Nhat នៅទីក្រុងហូជីមិញ ទៅកាន់ព្រលានយន្តហោះថ្មីក្នុងរយៈពេលប្រមាណ ១ ឆ្នាំ។ នេះបើតាមការចុះផ្សាយរបស់កាសែត VnExpress។

អាកាសយានដ្ឋានអន្តរជាតិ ឡុង ថាញ់ (Long Thanh) ដែលវៀតណាមគ្រោងដាក់ដំណើរការនៅចុងឆ្នាំ ២០២៦ ដែលស្ថិតនៅចម្ងាយប្រហែល ៤០ គីឡូម៉ែត្រពីភាគខាងកើតទីក្រុងហូជីមិញ ក្នុងស្រុក Long Thanh ខេត្ត Đồng Nai។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាមួយនឹងការដាក់ដំណើរការនោះ វៀតណាមមានមហិច្ឆតាទាក់ទាញជើងហោះហើរឆ្លងកាត់ (Transit) ដែលបច្ចុប្បន្នកំពុងប្រមូលផ្តុំនៅព្រលានយន្តហោះធំៗក្នុងតំបន់នៅសិង្ហបុរី (Changi) បាងកក និងគូឡាឡាំពួរ ដោយវៀតណាមចង់ប្រែក្លាយព្រលាន Long Thanh ឱ្យក្លាយជាច្រកអាកាសចរណ៍ដ៏សំខាន់មួយរបស់អាស៊ី។

Long Thanh គឺជាគម្រោងអាកាសយានដ្ឋានធំបំផុត និងចំណាយថវិកាវិនិយោគច្រើនជាងគេក្នុងប្រវត្តិសាស្ត្រវៀតណាម ក្រោមតម្លៃប្រមាណ ៣៣៦,៦៣ ទ្រីលានដុង (១២,៨ ពាន់លានដុល្លារ)។ ព្រលាននេះ ស្ថិតនៅចម្ងាយប្រហែល ៤០ គីឡូម៉ែត្រពីភាគខាងកើតទីក្រុងហូជីមិញ និងត្រូវបានសាងសង់ឡើងដើម្បីបន្ធូរភាពកកស្ទះនៅព្រលានយន្តហោះ Tan Son Nhat ដែលបានដំណើរការលើសសមត្ថភាពអស់ជាច្រើនឆ្នាំមកហើយ។

ពេលបើកដំណើរការដំបូង Long Thanh នឹងអាចទទួលអ្នកដំណើរបាន ២៥លាននាក់/ឆ្នាំ ខណៈនៅពេលបញ្ចប់គម្រោងគ្រប់ដំណាក់កាល សមត្ថភាពរបស់វានឹងកើនដល់ ១០០លាននាក់/ឆ្នាំ។ តួលេខនេះនឹងលើសព្រលានយន្តហោះ Changi របស់សិង្ហបុរី ដែលបានទទួលអ្នកដំណើរជិត ៧០លាននាក់ ក្នុងឆ្នាំ២០២៥ និងកំពុងពង្រីកសមត្ថភាពដល់ ១៤០លាននាក់ នាពេលអនាគត។

តាមផែនការរបស់សាជីវកម្មអាកាសយានដ្ឋានវៀតណាម (ACV) ការផ្ទេរជើងហោះហើរនឹងធ្វើឡើងជា ៣ ដំណាក់កាល។ ចាប់ពីថ្ងៃទី១ ខែធ្នូ ឆ្នាំ២០២៦ Long Thanh នឹងទទួលជើងហោះហើរអន្តរជាតិផ្លូវឆ្ងាយទាំងអស់ ជើងហោះហើរដឹកទំនិញ និងផ្លូវហោះហើរអន្តរជាតិថ្មីៗ។

ស្ថានីយអ្នកដំណើរនៅអាកាសយានដ្ឋានអន្តរជាតិ តាន់ សឺនញ៉ាត់ (Tan Son Nhat) ក្នុងទីក្រុងហូជីមិញ ភាគខាងត្បូងប្រទេសវៀតណាម។

ចាប់ពីខែមីនា ឆ្នាំ២០២៧ ជើងហោះហើរទៅកាន់អឺរ៉ុប អាមេរិក អូសេអានី អាហ្វ្រិក មជ្ឈិមបូព៌ា អាស៊ីខាងត្បូង និងអាស៊ីកណ្ដាល នឹងត្រូវផ្ទេរទាំងស្រុងទៅព្រលាន Long Thanh។ រហូតដល់ដើមឆ្នាំ ២០២៨ ព្រលានយន្តហោះថ្មីនេះនឹងគ្រប់គ្រងស្ទើរតែគ្រប់ជើងហោះហើរអន្តរជាតិទាំងអស់ ខណៈ Tan Son Nhat នឹងរក្សាទុកតែជើងហោះហើរអន្តរជាតិចម្ងាយខ្លីមួយចំនួនប៉ុណ្ណោះ។

ACV រំពឹងថា នៅឆ្នាំ២០២៧ ព្រលានយន្តហោះ Long Thanh នឹងទទួលអ្នកដំណើរអន្តរជាតិជាង ៩០% នៃតំបន់ទីក្រុងហូជីមិញ ខណៈជើងហោះហើរក្នុងស្រុកភាគច្រើននឹងបន្តប្រើប្រាស់ព្រលាន Tan Son Nhat។

ដើម្បីឱ្យផែនការនេះសម្រេចតាមកាលវិភាគ រដ្ឋាភិបាលវៀតណាមក៏កំពុងជំរុញការពង្រីកផ្លូវល្បឿនលឿន និងហេដ្ឋារចនាសម្ព័ន្ធតភ្ជាប់សំខាន់ៗទៅកាន់ព្រលានយន្តហោះ Long Thanh ផងដែរ៕