ព័ត៌មានអន្ដរជាតិ

វៀតណាមពង្រឹងបណ្តាញកំពង់ផែ ដើម្បីជំរុញសមត្ថភាពប្រកួតប្រជែងជើងទឹក

បានផុស

១៥ វិនាទី មុន

នៅ

ថ្ងៃចន្ទ ១៣ កក្កដា ២០២៦

ដោយ

វៀតណាមកំពុងពន្លឿនការអភិវឌ្ឍប្រព័ន្ធកំពង់ផែសមុទ្រ និងបណ្តាញដឹកជញ្ជូនពហុមធ្យោបាយ ដើម្បីពង្រឹងវិស័យសេដ្ឋកិច្ចសមុទ្រ និងបង្កើនសមត្ថភាពប្រកួតប្រជែងជើងទឹក។ នេះបើតាមការចុះផ្សាយរបស់ទីភ្នាក់ងារសារព័ត៌មានវៀតណាម VNS នៅថ្ងៃចន្ទ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមរបាយការណ៍សន្ទស្សន៍ដំណើរការកំពង់ផែកុងតឺន័រ (CPPI) ឆ្នាំ ២០២៥ ដែលចេញផ្សាយដោយធនាគារពិភពលោក (World Bank) និងក្រុមហ៊ុនទីផ្សារ S&P Global Market Intelligence កំពង់ផែ Cái Mép និងកំពង់ផែ Hải Phòng របស់វៀតណាម បានជាប់ក្នុងចំណោមកំពង់ផែដឹកកុងតឺន័រដែលមានប្រសិទ្ធភាពការងារបំផុតទាំង ២០ នៅលើពិភពលោក សម្រាប់រយៈពេល ២ ឆ្នាំជាប់គ្នា។

ទីក្រុង Hải Phòng ក៏កំពុងក្លាយជាមជ្ឈមណ្ឌលភស្តុភារដ៏សំខាន់របស់វៀតណាម ដោយមានបណ្តាញដឹកជញ្ជូនភ្ជាប់រវាងផ្លូវល្បឿនលឿន អាកាសយានដ្ឋានអន្តរជាតិ ផ្លូវរថភ្លើង និងកំពង់ផែទឹកជ្រៅ។ កំពង់ផែទាំងនេះអាចទទួលនាវាដឹកទំនិញខ្នាតធំ និងមានការតភ្ជាប់ដោយផ្ទាល់ទៅកាន់ទីផ្សារនៅអឺរ៉ុប និងទ្វីបអាមេរិក ដែលជួយសម្រួលដល់ការនាំចេញ និងនាំចូលទំនិញ។

ក្នុងឆមាសទី១ ឆ្នាំនេះ បរិមាណទំនិញឆ្លងកាត់កំពង់ផែសមុទ្រ និងផ្លូវទឹកក្នុងស្រុករបស់វៀតណាម បានកើនឡើងដល់ប្រមាណ ៦៨៧,៥ លានតោន កើនឡើង ១៨% បើធៀបនឹងរយៈពេលដូចគ្នាកាលពីឆ្នាំមុន។ ចំណែកការដឹកជញ្ជូនកុងតឺន័រវិញ ក៏បានកើនឡើង ១២% ដល់ប្រមាណ ១៨ លាន TEUs ដែលឆ្លុះបញ្ចាំងពីកំណើននៃសកម្មភាពពាណិជ្ជកម្ម និងការដឹកជញ្ជូនរបស់ប្រទេសនេះ។

រដ្ឋាភិបាលវៀតណាមគ្រោងវិនិយោគជាង ៣៥៩ ទ្រីលានដុង (ប្រមាណ ១៣,៧ ប៊ីលានដុល្លារអាមេរិក) លើការអភិវឌ្ឍប្រព័ន្ធកំពង់ផែរហូតដល់ឆ្នាំ ២០៣០។ ទន្ទឹមនឹងនេះ រដ្ឋាភិបាលក៏កំពុងជំរុញការតភ្ជាប់រវាងកំពង់ផែ ផ្លូវគោក ផ្លូវរថភ្លើង និងផ្លូវទឹកក្នុងស្រុក ព្រមទាំងលើកកម្ពស់ការប្រើប្រាស់បច្ចេកវិទ្យាឌីជីថល និងការដឹកជញ្ជូនបៃតង ដើម្បីបង្កើនប្រសិទ្ធភាពប្រព័ន្ធដឹកជញ្ជូន និងកាត់បន្ថយថ្លៃដើមភស្តុភារ។

បច្ចុប្បន្ន វៀតណាមមានកំពង់ផែសមុទ្រចំនួន ៣៤ ជាមួយនឹងចំណតសរុបចំនួន ៣២០ និងអាចដឹកជញ្ជូនទំនិញបានជាង ៩៦០ លានតោនក្នុងឆ្នាំ ២០២៥។ ទោះជាយ៉ាងណា ប្រទេសនេះនៅតែប្រឈមនឹងបញ្ហាហេដ្ឋារចនាសម្ព័ន្ធមិនទាន់ស្មើគ្នា ការតភ្ជាប់ដឹកជញ្ជូនមិនទាន់ល្អ និងថ្លៃដឹកជញ្ជូននៅមានកម្រិតខ្ពស់។ ដើម្បីដោះស្រាយបញ្ហាទាំងនេះ វៀតណាមគ្រោងបន្តវិនិយោគលើផ្លូវដែក ផ្លូវទឹក មជ្ឈមណ្ឌលភស្តុភារ និងប្រព័ន្ធទិន្នន័យជាតិ ដើម្បីបង្កើនប្រសិទ្ធភាពនៃបណ្តាញដឹកជញ្ជូន និងពង្រឹងការប្រកួតប្រជែងក្នុងវិស័យជើងទឹក៕