តម្លៃមាសនៅវៀតណាម ហក់ឡើងកប់ពពក ព្រោះឥទ្ធិពល សង្គ្រាមរុស្ស៊ី-អ៊ុយក្រែន

តម្លៃមាសនៅប្រទេសវៀតណាម បានហក់ឡើងដល់កម្រិតខ្ពស់មួយទៀតនៅព្រឹកថ្ងៃអង្គារទី០៨ខែមីនានេះ ខណៈតម្លៃសកលលោកបានកើនឡើងខ្ពស់ ចំពេលមានភាពតានតឹងកាន់តែខ្លាំងរវាងរុស្ស៊ី និងអ៊ុយក្រែន។

នៅហាង Phu Nhuan Jewelry JSC (PNJ) តម្លៃមាសលក់ចេញ បានឡើង ២.៦ លានដុង (១១៣ ដុល្លារ) ពោលគឺដល់ ៧១.១ លានដុង (៣ ១០០ ដុល្លារ) ក្នុងមួយតម្លឹងចំណែកតម្លៃទិញចូលគឺ ៦៩.៤លានដុង (៣ ០៣០ ដុល្លារ) ក្នុងមួយតម្លឹង។

ចំណែកនៅហាង Saigon Jewelry Company (SJC) តម្លៃមាសលក់ចេញគឺ ៧០លានដុង (៣ ០៦០ ដុល្លារ) ក្នុងមួយតម្លឹង។

ត្រលប់ទៅខែតុលាឆ្នាំ២០២១ តម្លៃមាស គឺត្រឹមតែ៥៧លានដុង (២ ៤៩០ដុល្លារ) ប៉ុណ្ណោះក្នុងមួយតម្លឹង។

យោងតាមអ្នកវិភាគ, វិនិយោគិនកំពុងមានការព្រួយបារម្ភថា ជម្លោះយោធារវាងរុស្ស៊ី និងអ៊ុយក្រែន អាចបង្កឲ្យមានផលប៉ះពាល់យ៉ាងខ្លាំងដល់សេដ្ឋកិច្ចពិភពលោក។

លើសពីនេះ អតិផរណាខ្ពស់នៅសហរដ្ឋអាមេរិក ក៏រួមចំណែកដល់ការឡើងថ្លៃមាសផងដែរ នៅពេលដែលមនុស្សសម្រុកទិញមាសទុក ដើម្បីសុវត្ថិភាពចំពេលមានភាពមិនច្បាស់លាស់។

ទោះបីជាយ៉ាងណាក៏ដោយ វិនិយោគិនសកលឥឡូវនេះ កំពុងរង់ចាំលទ្ធផលនៃកិច្ចប្រជុំនាពេលខាងមុខរបស់ធនាគារកណ្តាលអាមេរិក (FED) ដែលត្រូវបានរំពឹងថានឹងបញ្ចប់នៅថ្ងៃទី ១៦ខែមីនា៕

ប្រែសម្រួល៖ Vann Vann

ប្រភព៖ Tuoi Tre

ចុចអាន៖ ជនស៊ីវិលជាង ១ ២០០នាក់ ស្លាប់និងរបួសក្នុងសង្គ្រាម រុស្ស៊ី-អ៊ុយក្រែន