Connect with us

សេដ្ឋកិច្ច

កសិករពីរឃុំ​ប្តូរពី​ធ្វើ​ស្រែ មក​ដាំឈូក​លក់ បាន​ទិន្នផល​និង​ចំណូលខុស​គ្នាឆ្ងាយ

បានផុស

នៅ

ដោយ​សារតែ​ដំណាំឈូ​កមាន​ទីផ្សារ​ល្អងាយ​ស្រួល​ដាំដុះ ងាយ​ស្រូល​ថែទាំ និង​ផ្ដល់​ទិន្នផល​ល្អ​ប្រសើរ និង បាន​ប្រមូលផលយូរ​អ្វែ​ង​ជាង​ដំណាំស្រូវ ទើប​រយៈពេល០២ឆ្នាំ​ចុងក្រោយ​នេះ គេ​ឃើញ​កសិករ​ រស់​នៅ​ក្នុង​ឃុំ​ចំនួន ២ គឺ ឃុំ តាគ្រាម និង​ឃុំ​ស្នឹង ក្នុងភូមិសាស្តស្រុក​បាន​ណន់ បាន​នាំគ្នា​ផ្លាស់ប្ដូរ​ដីស្រែ​​ពី​ការ​ធ្វើ​ដំណាំស្រូវ ច្នៃទៅជាទីកន្លែងដាំដំណាំ​​​ឈូក​វិញ។ ការផ្លាស់ប្តូរមុខរបរនេះ កសិករខ្លះដែលមិនមានដីខ្លួនឯង ក៏បានជួលពីគេធ្វើដំណាំឈូកនេះផងដែរដើម្បី​សម្រុក​ដាំដំណាំ​ឈូក​។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ចាន់ វិន អាយុ៥១ឆ្នាំ រស់នៅក្នុង ភូមិ តាង៉ែន ឃុំតាគ្រាម បានប្រាប់កម្ពុជាថ្មីឲ្យដឹងថា រហូតដល់សព្វថ្ងៃ​នេះ លោកមានដំណាំឈូក​ចំនួន ០៤ ហិក​តា នៅចំណុចភ្នំ​ដំបង​វែង ស្ថិត​ក្នុង​ភូមិ​តាង៉ែន ឃុំ​តាគ្រាម ស្រុកបាណន់ ដែលស្ថិត​នៅប៉ែកខាងត្បូងនៃតំបន់​ទេស​ចរ​ណ៍អាង​កំពីងពួយ ក្នុងភូមិសាស្ត្រខេត្តបាត់ដំបង។ របរដាំឈូកនេះ លោកបាន ដាំរយ:ពេល ២ ឆ្នាំ ហើយពេលនេះក៏កំពុង​ប្រមូល​ផលឈូកជាបណ្តើរៗបាន០២ខែហើយ ដើម្បីតម្រូវតាមទីផ្សារក្នុងស្រុក។

លោកបន្តថា បើ​ផ្អែកលើ​ទីផ្សារ រវាង​ផល​ស្រូវ និងផល​ឈូក​នា​សព្វថ្ងៃ​នេះ គឺតំលៃ​ឈូក​ល្អ​ជាង​តំលៃ​ស្រូវ​ឆ្ងា​យ​ណាស់ ដែលអាចជួយទ្រទ្រង់សេដ្ឋកិច្ចគ្រួសារលោកបានដោយល្អប្រសើរជាងទិន្នផលស្រូវ។ ហើយបើសិនជាឈូកធ្លាក់តម្លៃខ្លះក៏មិនប៉ះពាល់សេដ្ឋកិច្ចគ្រួសារធ្ងន់ធ្ងរដូចផលស្រូវដែរ។

លោកថា ដោយសារ​ខុសគ្នា​ស្រឡះ​បែបនេះ​ហើយ ទើប​អ្នកភូមិ​មួយចំនួន​នាំគ្នា​ប្ដូរ​ពី​ស្រូវ មក​ដាំ​ឈូក​វិញ​។ ហើយការចំណាយ​ទុន​ក៏មិនច្រើន​ដូចដំណាំស្រូវដែរ ដែលចំណាយដូចជា ថ្លៃ​ពូជ​ ថ្លៃ​ជី ថ្លៃ​ភ្ជួរ​រាល់ និង ថ្លៃ​ច្រូតកាត់ ហើយ​ធ្វើ​ម្ដង​ប្រមូល​ផល​បានតែ​ម្ដង​ប៉ុ​ណ្ណោះ រី​ឯ​តំលៃ​ទី​ផ្សា​រ​ទាប​ស្ទើរតែ​មិន​អាច​រួច​ថ្លៃ​ចំណាយ​ផង។

លោក សំអាត ជាពលរដ្ឋ រស់នៅក្នុង ភូមិព្រៃផ្តៅ ឃុំតាគ្រាម បានឲ្យដឹងដែរថា តំបន់អាង​កំពីង គឺស្ថិតក្នុងឃុំ​តាគ្រាម ស្រុកបាណន់​ ក៏នៅមិនឆ្ងាយពីភូមិដែលលោករស់នៅប៉ុន្មានដែរ។ លោកតែងនាំក្រុមគ្រួសារទៅលេងកម្សាន្ត ដូចជាលែងទឹក និងដើរទស្សនា​កម្សាន្តទេសភាពផង ខណ:តំបន់អាងកំពីងពួយ ជាគោលដៅទេសចរដ៏ពេញនិយមផងសម្រាប់ភ្ញៀវទេសចរ។

លោកបន្តថា បើ​ទៅដល់​ទីនោះ គេ​ឃើញ​មាន​ដំណាំ​ឈូក​រាប់​សិប​ហិក​តា​លាតសន្ធឹង​ដាច់​កន្ទុយភ្នែក​ពី​ទិសខាងកើត ទៅ​ទិសខាងលិច​តាម​បណ្ដោយទំនប់​អាង​កំពីងពួយ​ប៉ែក​ខាងត្បូង​ ដែលប្រជាកសិករសម្រុកនាំគ្នាដាំយ៉ាងផុសផុល។ ដំណាំ ឈូកនេះ ​ក្រៅពីហុចផលប្រយោជន៍ដល់កសិករជាអ្នកដាំ ក៏បានផ្តល់អារម្មណ៍ស្រស់ថ្លាដល់អ្នកទៅកម្សាន្យផងដែរ។

បើ​តាម​កសិករ​ដាំ​ឈូក​បាន​អះអាង​ប្រហាក់​ប្រហែ​ល​គ្នា​ថា សព្វថ្ងៃ​ឈ្មួញ​បាន​ដើរ​ទិញ​គ្រាប់​ឈូក​ដល់​ចំការតែ​តំលៃ​ហាក់​មិនសូវ​ស្ថិតស្ថេរនោះទេ។ ប៉ុន្តែ​តំលៃ​ជា​ធម្មតា​ដែល​ឈ្មួញ​កំពុង​ដើរ​ប្រមូល​ទិញ​គ្រាប់ឈូក​ទុំ ចន្លោះ​ពី ៦០០០រៀល ទៅ​៦៥០០ រៀល ក្នុង១គីឡូក្រាម។ ពេលខ្លះ​ក៏អាចឡើង​ថ្លៃជាង​នេះឬទាប​ជាង​នេះ​ដែរគឺឡើងចុះ​ដោយ​ខែ។

កសិករដាំ​ឈូក ក៏បានធ្វើការប្រៀបធៀបរវាងទិន្នផល​ស្រូវ និង​ទិន្នផល​ឈូក​ឲ្យដឹងដែរថា បើ​ប្រៀបធៀប​ទិន្នផល​ស្រូវ និងទិន្នផល​ឈូក លើផ្ទៃដី០១ហិកតាដូចគ្នា ឃើញថាដំ​ណាំ​ស្រូវ​ទ​ទូល​បាន​ទិន្នផលចន្លោះ​ពី ៣ តោ​ន​ ទៅ៣,៥តោន​ប៉ុណ្ណោះ ហើយតម្លៃមិនលើសពី០១លានរៀល​ទេ ក្នុង០១តោន​។ ខណះទិន្នផល​ឈូកលើផ្ទៃដី០១ហិច​តា​ដូចគ្នាទ​ទួល​បាន​ទិន្នផល​ចន្លោះ​ពី១តោន​ទៅ១,៥តោន​ បើប្រៀបធៀបតំលៃ​លើ​ទី​ផ្សារ គឺផល​ឈូក​ល្អ​ជាង​ផល​ស្រូវ​។

ពួកគាត់បន្តថា ក្រៅពីនេះ ដំណាំឈូកក៏មានគុណសម្បត្តិផងដែរដូចជា ដាំ​រយៈ​ពេល​​ខ្លី ហើយប្រមូល​ផលបានរយះពេល យូរអង្វែង ខុសពី​ដំណាំស្រូវ ធ្វើ​ម្ដង​ប្រមូល​បានតែ​ម្ដង ហើយ​ថែមទាំង​ចំណាយ​ទុន​ច្រើន​ទៀត​។ ដូច្នេះហើយទើបពួកគាត់ ងាកមក​ដាំ​ឈូក​ជំនួស​ដំណាំស្រូវ​វិញ​។ ខណះដំណាំឈូកបានហុចផលដូចជា ផ្លែ​ឈូក​ទុំ​ គេ​បេះ​យក​គ្រាប់​ថ្លឹង​លក់ រី​ឯ​ផ្លែ​ឈូក​ចាស់​ គេ​បេះ​យក​ទៅ​ស្ងោរ​លក់ ឬលក់​ផ្លែ​ឆៅ ចំណែកក្រអៅ ឬមើម​ឈូក​ គេ​បេះ​យក​លក់​ធ្វើជា​ម្ហូប​អា​ហារ​ផ្សេង​ៗវាអាចជួយទ្រទ្រង់ជីវភាពគ្រួសាររបស់ពួកគាត់បានល្អប្រើសើក្នុងពេលបច្ចុប្បន្ននេះ៕

អត្ថបទ៖ សៅ សារិទ្ធ ​

Helistar Cambodia - Helicopter Charter Services
Sokimex Investment Group

ចុច Like Facebook កម្ពុជាថ្មី

Sokha Hotels

ព័ត៌មានពេញនិយម