ក្រុមប្រទេស G7 យល់ព្រម​ កំណត់តម្លៃ​ប្រេង​រុស្ស៊ី

សមាជិកនៃក្រុមប្រទេស G7 បានយល់ព្រម កំណត់តម្លៃប្រេងរបស់រុស្ស៊ី ក្នុងគោលបំណងដាក់ឥទ្ធិពលលើលទ្ធភាពរបស់ទីក្រុងមូស្គូ ក្នុងការផ្តល់ហិរញ្ញប្បទានសង្គ្រាមនៅអ៊ុយក្រែន។

រដ្ឋមន្ត្រីហិរញ្ញវត្ថុ G7 បាននិយាយថា ការដាក់កម្រិតលើតម្លៃប្រេងឆៅ និងផលិតផលប្រេង ក៏នឹងជួយកាត់បន្ថយតម្លៃថាមពលពិភពលោកផងដែរ។ G7 និយាយថា “យើងនឹងបន្តឈរជាមួយអ៊ុយក្រែន ឲ្យបានយូរតាមដែលពួកគេត្រូវការ”។

នៅក្នុងកិច្ចប្រជុំតាមអនឡាញ បណ្តារដ្ឋមន្ត្រីហិរញ្ញវត្ថុបាននិយាយថា ផែនការកំណត់តម្លៃប្រេងនេះ ត្រូវបានរចនាជាពិសេស ដើម្បីកាត់បន្ថយប្រាក់ចំណូលរបស់រុស្ស៊ី និងសមត្ថភាពរបស់ក្រុងមូស្គូក្នុងការផ្តល់មូលនិធិដល់សង្គ្រាម។ ពួកគេក៏បាននិយាយផងដែរថា ពួកគេចង់កាត់បន្ថយការខូចខាតសេដ្ឋកិច្ចដែលបណ្តាលមកពីជម្លោះ ជាពិសេសលើប្រទេសមានប្រាក់ចំណូលទាប និងមធ្យម។

ការដាក់កម្រិតតម្លៃលើប្រេងរុស្ស៊ីមានន័យថា ប្រទេសដែលចុះហត្ថលេខាលើគោលការណ៍នេះ នឹងត្រូវបានអនុញ្ញាតឲ្យទិញប្រេង និងផលិតផលប្រេងរបស់រុស្ស៊ី ដឹកជញ្ជូនតាមសមុទ្រដែលត្រូវបានលក់ក្នុងតម្លៃកំណត់ឬក្រោមតម្លៃកំណត់។

ទោះបីជាយ៉ាងណាក៏ដោយ ជាការឆ្លើយតប រុស្ស៊ីអះអាង​ថា ខ្លួន​នឹង​ឈប់​លក់​ប្រេង​ទៅ​ឲ្យ​ប្រទេស​ដែល​ដាក់​តម្លៃ​កំណត់។

អ្នកនាំពាក្យវិមានក្រឹមឡាំង លោក Dmitry Peskov និយាយថា “ក្រុមហ៊ុនដែលដាក់ការកំណត់តម្លៃ នឹងមិនស្ថិតក្នុងចំណោមអ្នកទទួលប្រេងរុស្ស៊ីទេ”។

គួរបញ្ជាក់ថា ក្រុមប្រទេស G7 មានដូចជា ចក្រភពអង់គ្លេស សហរដ្ឋអាមេរិក កាណាដា បារាំង អាល្លឺម៉ង់ អ៊ីតាលី និងជប៉ុន។ ក្រុមនេះគឺជាអង្គការមួយនៃប្រទេសសេដ្ឋកិច្ចជឿនលឿនធំជាងគេទាំងប្រាំពីររបស់ពិភពលោក ដែលគ្រប់គ្រងពាណិជ្ជកម្មសកល និងប្រព័ន្ធហិរញ្ញវត្ថុអន្តរជាតិ៕

ប្រែសម្រួល៖ Vann Vann

ប្រភព៖ CNN

ចុចអាន៖ រដ្ឋមន្ត្រីការបរទេសចិន លុបចោលជំនួបទ្វេភាគីជាមួយជប៉ុន ដោយសារសេចក្តីថ្លែងការណ៍របស់ G7 លើបញ្ហា កោះតៃវ៉ាន់