រុស្ស៊ី ព្រមានថា ​​តំបន់ Kaliningrad អាច​បាញ់មីស៊ីល​កម្ទេច​រដ្ឋធានីនៅអឺរ៉ុប បើណាតូ​ ហ៊ានតែវាយប្រហារ

តំបន់ Kaliningrad ដែលជាទឹកដីកាត់សមុទ្ររបស់រុស្ស៊ី មានសមត្ថភាពគ្រប់គ្រាន់ក្នុងការការពារខ្លួន ពីការបង្កើនកម្លាំងយោធារបស់ណាតូនៅក្បែរព្រំដែន។ នេះបើយោងតាមការបញ្ជាក់របស់សមាជិកសភាជាន់ខ្ពស់រុស្ស៊ី លោក Andrey Kolesnik ថ្លែងប្រាប់ទីភ្នាក់ងារសារព័ត៌មាន TASS នៅថ្ងៃទី២៦ ខែមិថុនា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Kolesnik បាននិយាយថា អាវុធយុទ្ធភណ្ឌដែលរុស្ស៊ីបានដាក់ពង្រាយនៅក្នុងតំបន់ដាច់ស្រយាល Kaliningrad របស់រុស្ស៊ីនៅសមុទ្របាល់ទិក មានចំនួនគ្រប់គ្រាន់ក្នុងការវាយបកទៅលើការវាយប្រហារណាមួយដែលអាចកើតមានពីសំណាក់អង្គការណាតូ ចំពេលដែលសម្ព័ន្ធភាពមួយនេះកំពុងបង្កើនកម្លាំងយោធាយ៉ាងខ្លាំងក្លានៅក្បែរព្រំដែន។

សេចក្តីថ្លែងការណ៍នេះធ្វើឡើង ដើម្បីឆ្លើយតបទៅនឹងមតិរបស់មេបញ្ជាការកងទ័ពពហុជាតិភាគឦសានរបស់ណាតូ (MNC NE) គឺលោកឧត្តមសេនីយ៍ឯក Dariusz Parylak ដែលបាននិយាយថា បណ្តាប្រទេសណាតូកំពុងជំរុញវត្តមានយោធារបស់ខ្លួនយ៉ាងខ្លាំង នៅជិតច្រក Suwalki Gap។

លោក Kolesnik បាននិយាយថា «លោក Parylak មិនមែនជាឧត្តមសេនីយ៍ទីមួយទេ ដែលប្រកាសពីការបង្កើនកងទ័ពនៅជិតព្រំដែនរបស់យើង ជាពិសេសនៅច្រក Suwalki Gap។ កងកម្លាំងប្រដាប់អាវុធរបស់គូប្រជែងកំពុងតម្រង់មកកាន់តំបន់ Kaliningrad នេះតែម្តង ហើយគ្រប់គ្នានៅក្នុងតំបន់នេះសុទ្ធតែដឹងរឿងហ្នឹងច្បាស់ណាស់។ ប្រសិនបើចាំបាច់ តំបន់ Kaliningrad អាចការពារខ្លួនឯងបាន ដោយការបាញ់មីស៊ីលកម្ទេចរដ្ឋធានីណាមួយរបស់អឺរ៉ុប»។

សមាជិកសភាជាន់ខ្ពស់រុស្ស៊ីរូបនេះ ថែមទាំងគូសបញ្ចាក់ទៀតថា «ជាក់ស្ដែង មីស៊ីលទាំងនេះអាចផ្ទុកក្បាលគ្រាប់បានច្រើនប្រភេទ។ ហេតុដូច្នេះហើយ អឺរ៉ុបត្រូវតែយល់ថា ប្រសិនបើកងវរសេនាធំហូឡង់ អាល្លឺម៉ង់ និងកងទ័ពផ្សេងទៀតត្រូវបានពង្រាយនៅជិតព្រំដែនរបស់យើង គ្មាននរណាម្នាក់ទៅវាយបកការវាយប្រហាររបស់ពួកគេដោយប្រើកាំភ្លើងខ្លីនោះទេ។ ពួកគេក៏ត្រូវយល់ដែរថា ដែនដីគោករបស់រុស្ស៊ី នឹងប្រើប្រាស់ឥទ្ធិពលទាំងស្រុង ដើម្បីការពារតំបន់ប៉ែកខាងលិចបំផុតរបស់យើងមួយនេះ»។

យោងតាមសម្តីរបស់លោក យន្តហោះចម្បាំង និងយន្តហោះទម្លាក់គ្រាប់បែកយុទ្ធសាស្ត្រជាច្រើនកងវរសេនាតូច ត្រូវបានដាក់ពង្រាយរួចជាស្រេចនៅជិតព្រំដែនរុស្ស៊ី។ មួយក្នុងចំណោមនោះ មានទីស្នាក់ការនៅទីក្រុង Malbork របស់ប៉ូឡូញ ដែលមានចម្ងាយប្រហែល ៤០ គីឡូម៉ែត្រពីព្រំដែន Kaliningrad ហើយមួយទៀតស្ថិតនៅទីក្រុង Marijampole របស់លីទុយអានី មានចម្ងាយប្រហែល ៦០ គីឡូម៉ែត្រពីទឹកដីរុស្ស៊ី។

សូមបញ្ជាក់ថា ច្រក Suwalki Gap គឺជាផ្ទៃដី​មានទទឹង ៦៥ គីឡូម៉ែត្រ ស្ថិតនៅចន្លោះប្រទេសប៉ូឡូញ និងលីទុយអានី ហើយស្ថិតនៅចន្លោះយុទ្ធសាស្ត្ររវាងតំបន់ Kaliningrad បស់រុស្ស៊ី និងប្រទេសបេឡារុសដែលជាសម្ព័ន្ធមិត្ត។ ប្រសិនបើច្រកនេះត្រូវបិទ វានឹងធ្វើឲ្យលីទុយអានីត្រូវបានកាត់ផ្តាច់ដាច់ដោយឡែកពីសម្ព័ន្ធមិត្តណាតូខាងលិចភ្លាមៗ៕

អត្ថបទ ៖ សាង ស្រីល័ក្ខ

លោក Lukashenko ព្រមានធ្ងន់ៗដាក់​អ៊ុយក្រែនថា «កុំព្រហើនអូសបេឡារុស» ចូលសង្គ្រាម ប្រយ័ត្នសង្គ្រាម​ប្រែប្រួល​