អគ្គនាយកដ្ឋានកសិកម្ម គ្រោងនឹងបញ្ជូនឈ្មោះចម្ការ រោងចក្រកែច្នៃ និងវេចខ្ចប់ម្រេចទៅភាគីចិន នៅដើមខែមករា ឆ្នាំ២០២៣ខាងមុខ ដើម្បីពិនិត្យ និងវាយតម្លៃបញ្ចប់មុននឹងឈានដល់ការនាំចេញម្រេចជាផ្លូវការ​។

តាមរយៈផែនការនេះ អគ្គនាយកដ្ឋានកសិកម្ម នៃក្រសួងកសិកម្ម រុក្ខាប្រម៉ាញ់ និងនេសាទ បានជូនដំណឹង​ដល់ម្ចាស់ចម្ការម្រេច សហគមន៍ម្រេច រោងចក្រកែច្នៃ និងវេចខ្ចប់ម្រេច ទាំងអស់ ដែលមានបំណងផលិត និងកែច្នៃវេចខ្ចប់ នាំចេញម្រេចទៅកាន់ទីផ្សារប្រទេសចិន រួសរាន់ទៅដាក់ស្នើសុំចុះបញ្ជីចម្ការ ​និងរោងចក្រ សម្រាប់នាំចេញម្រេចទៅកាន់ប្រទេសចិន នៅអគ្គនាយកដ្ឋានកសិកម្ម នៃក្រសួងកសិកម្ម។

ក្រសួងកសិកម្ម បានឱ្យដឹងថា បន្ទាប់ពីទទួលបាននូវពាក្យស្នើសុំ អគ្គនាយកដ្ឋានកសិកម្ម នឹងចាត់មន្រ្តីជំនាញ ចុះវាយតម្លៃស្របតាមនិតិវិធីបច្ចេកទេសដែលមានចែងក្នុងពិធីសារ។ នេះបើយោងតាមសេចក្តីជូនដំណឹង​អគ្គនាយកដ្ឋានកសិកម្ម នៅថ្ងៃទី១៣ ខែធ្នូ ឆ្នាំ២០២២នេះ។

សូមបញ្ជាក់ថា ពិធីសារស្តីពីលក្ខខណ្ឌតម្រូវភូតគាមអនាម័យ សម្រាប់ការនាំចេញម្រេចពីប្រទេសកម្ពុជាទៅកាន់​ប្រទេសចិន ត្រូវបានចុះហត្ថលេខាដោយក្រសួងពាណិជ្ជកម្ម រុក្ខាប្រម៉ាញ់ និងនេសាទ ជាមួយអគ្គរដ្ឋបាលគយ​នៃសាធារណរដ្ឋប្រជាមានិតចិន នៅថ្ងៃទៅទី០៩ ខែវិច្ចិកា ឆ្នាំ២០២២ កន្លងទៅថ្មីៗនេះ​។

នៅកម្ពុជា ម្រេច ត្រូវបានកសិករដាំដុះច្រើននៅតាមខេត្តមួយចំនួន ដូចជា ខេត្តកំពង់ចាម, ត្បូងឃ្មុំ, កែប និងកំពត ជាដើម។

ពាណិជ្ជកម្ម​ទ្វេភាគី​កម្ពុជា​-​ចិន រយៈពេល ​១១ ​ខែ​ឆ្នាំ​ ២០២២ មាន​ទឹកប្រាក់​ជាង ១០,៥ ​ពាន់​លាន​ដុល្លារ កើន​ជាង ៦​ ភាគរយ​បើ​ធៀប​រយៈ​ពេល​ដូចគ្នា​ឆ្នាំ ​២០២១ ដោយ​ក្នុងនោះ​ទឹកប្រាក់​ដែល​កម្ពុជា ​នាំ​ទំនិញ​មកពី​ប្រទេស​ចិន​មាន​ជិត ៩០​ ភាគរយ​នៃ​ទឹកប្រាក់​សរុប​។ ទឹកប្រាក់​នៃ​ការនាំ​ចូល​របស់​ចិន បាន​កើនឡើង​ ៣,២៩​ ភាគរយ​បើ​ធៀប​រយៈពេល​ដូចគ្នា​ឆ្នាំមុន​។ នេះ​បើ​យោងតាម​អគ្គនាយកដ្ឋាន​គយ និង​រដ្ឋាករ​កម្ពុជា​ (​អគរ​)​៕