ព័ត៌មានជាតិ

មន្ត្រីជាន់ខ្ពស់ក្រសួងកសិកម្ម ជំរុញដល់អ្នកពាក់ព័ន្ធ បន្តចូលរួមសហការគាំទ្រការងារផ្សេងៗ ក្នុងវិស័យកសិកម្ម

បានផុស

៥ ខែ មុន

នៅ

ថ្ងៃពុធ ២៨ មករា ២០២៦

ដោយ

មន្ត្រីជាន់ខ្ពស់ក្រសួងកសិកម្ម ណែនាំដល់ថ្នាក់ដឹកនាំ មន្ត្រីមន្ទីរកសិកម្មខេត្ត និងបណ្ដាដៃគូពាក់ព័ន្ធនានា បន្តជួយណែនាំកសិករក្នុងការរៀបចំដីស្រែឲ្យបានត្រឹមត្រូវតាមបច្ចេកទេស និងពន្យល់ណែនាំពួកគាត់ជ្រើសរើសប្រភេទពូជស្រូវសុទ្ធល្អដែលផ្ដល់ទិន្នផលខ្ពស់ សមស្របនឹងក្សេត្របរិស្ថាន ធន់នឹងការប្រែប្រួលអាកាសធាតុ ឆ្លើយតបតម្រូវការទីផ្សារ និងមានតម្លៃខ្ពស់ ពិសេសត្រូវផ្តល់ការលើកទឹកចិត្ត និងពង្រឹងសមត្ថភាពសហគមន៍កសិកម្ម ដើម្បីផលិតក្នុងទ្រង់ទ្រាយធំ ដោយអនុវត្តយន្តការផលិតកម្មកសិកម្មតាមកិច្ចសន្យាដោយស្មោះត្រង់រវាងអ្នកផលិត និងអ្នកប្រមូលទិញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងបិទអង្គសិក្ខាសាលាបូកសរុបលទ្ធផលការងារកសិកម្ម រុក្ខាប្រមាញ់ និងនេសាទ ខេត្តសៀមរាប ឆ្នាំ ២០២៥ និងទិសដៅបន្ត នៅថ្ងៃទី ២៦ ខែមករា ឆ្នាំ ២០២៦ លោក ឃុន សាវឿន រដ្ឋលេខាធិការក្រសួងកសិកម្ម បានជំរុញឲ្យមន្ទីរ ត្រូវបន្តលើកកម្ពស់ការតាមដានចរន្តសត្វ អនាម័យសត្វ និងភូតគាមអនាម័យ ព្រមទាំងពង្រីក និងពង្រឹងសមត្ថកិច្ចត្រួតពិនិត្យអនាម័យសាច់តាមទីសត្តឃាតដ្ឋាន ការចាក់វ៉ាក់សាំងសត្វ ដើម្បីសុវត្ថិភាព សុខភាពសាធារណៈ។ ពង្រឹងការអភិរក្សធនធានជលផល តាមរយៈការអភិវឌ្ឍវារីវប្បកម្ម ដោយលើកទឹកចិត្តឲ្យចិញ្ចឹមត្រីតាមស្រះ ក្នុងបែរ ក្នុងតង់ និងក្នុងស្រែ តាមស្ថានភាពជាក់ស្ដែង ព្រមទាំងលែងពូជត្រីក្នុងបឹងធម្មជាតិ ដើម្បីបង្កើនផលស្តុកក្នុងបឹងធម្មជាតិសម្រាប់សេចក្ដីត្រូវការរបស់ប្រជាពលរដ្ឋ។

លោកបន្តថា ចំពោះព្រៃឈើ ត្រូវសហការទប់ស្កាត់ និងបង្ក្រាបបទល្មើសព្រៃឈើ សត្វព្រៃ ឲ្យមានប្រសិទ្ធភាពខ្ពស់ អន្តរាគមន៍ឲ្យទាន់ពេលវេលានូវភ្លើងឆេះព្រៃ។ លោកក៏បានស្នើដល់រដ្ឋបាលខេត្តសៀមរាប មន្ទីរអង្គភាពជុំវិញខេត្ត និងអាជ្ញាធរមូលដ្ឋានពាក់ព័ន្ធ សូមបន្តចូលរួមគាំទ្រការងារផ្សេងៗ ដល់មន្ទីរកសិកម្ម រុក្ខាប្រមាញ់ និងនេសាទ និងសហការក្នុងការដោះស្រាយបញ្ហា ឬសំណូមពរនានាជូនប្រជាកសិករ។

ជាមួយនេះ លោក អ៊ឹង គឹមលាង អភិបាលរងខេត្ត ក៏បានជំរុញដល់ថ្នាក់ដឹកនាំ និងមន្ត្រីតាមផ្នែក តាមវិស័យ នៃមន្ទីរកសិកម្មខេត្ត បន្តយកចិត្តទុកដាក់ពង្រឹងការអនុវត្តច្បាប់ ទប់ស្កាត់ បង្ក្រាបបទល្មើស ការចរាចរសត្វ ព្រៃឈើ និងជលផលគ្រប់ប្រភេទ និងជំរុញការគ្រប់គ្រង និងអភិវឌ្ឍន៍សហគមន៍ព្រៃឈើ ឲ្យមានប្រសិទ្ធភាព ព្រមទាំងបន្តផ្សព្វផ្សាយច្បាប់ និងលិខិតបទដ្ឋានគតិយុត្តិពាក់ព័ន្ធនានាដល់អាជ្ញាធរមូលដ្ឋាន និងប្រជាពលរដ្ឋ។

លោកអភិបាលរងខេត្ត ក៏បានស្នើឲ្យមន្ត្រីកសិកម្មគ្រប់លំដាប់ថ្នាក់ ជំរុញឲ្យមានការផ្សព្វផ្សាយ ណែនាំដល់កសិករក្នុងការរៀបចំដីស្រែឲ្យបានត្រឹមត្រូវតាមបច្ចេកទេស ជាពិសេសជំរុញការផ្លាស់ប្ដូរទម្លាប់របស់កសិករពីការប្រើប្រាស់ពូជប្រពៃណី មកជ្រើសរើសប្រភេទពូជស្រូវសុទ្ធល្អ និងផ្សព្វផ្សាយឲ្យពួកគាត់ពីរបៀបប្រើប្រាស់ថ្នាំកសិកម្ម ដើម្បីបំផ្លាញសមាសភាពចង្រៃ និងជំងឺឆ្លងសត្វ ដែលត្រូវមានការប្រុងប្រយ័ត្នខ្ពស់បំផុត ពោលគឺត្រូវអនុវត្តតាមបទដ្ឋានបច្ចេកទេស និងគោលការណ៍សុវត្ថិភាពឲ្យបានម៉ឺងម៉ាត់។ បន្ថែមពីនេះ ត្រូវបន្តពង្រឹងការអនុវត្តច្បាប់ ទប់ស្កាត់ បង្ក្រាបបទល្មើស ចរាចរសត្វ ព្រៃឈើ និងជលផលគ្រប់ប្រភេទ និងជំរុញការគ្រប់គ្រង និងអភិវឌ្ឍន៍សហគមន៍ព្រៃឈើ និងសហគមន៍នេសាទ៕

អត្ថបទ ៖ គឿន វេត