មន្ត្រីជាន់ខ្ពស់ក្រសួងរ៉ែ និងថាមពលបានជំរុញឱ្យមន្ត្រីជំនាញធ្វើការត្រួតពិនិត្យនិងវាយតម្លៃឱ្យបានម៉ត់ចត់ជាមុនសិន​មុននឹងចេញអាជ្ញាបណ្ណណាមួយដល់អ្នកស្នើសុំធ្វើសិប្បកម្ម។

ថ្លែងក្នុងសិក្ខាសាលាផ្សព្វផ្សាយ ស្ដីពី “ការធ្វើប្រតិភូកម្មមុខងាររដ្ឋបាលខេត្ត ក្រុង ស្រុក និងការគ្រប់គ្រងអាជីវកម្មធន​ធានរ៉ែគ្រប់ប្រភេទកាលពីថ្ងៃទី១៥ធ្នូលោក អ៊ឹង ឌីប៉ូឡា អគ្គនាយកនៃអគ្គនាយដ្ឋានធនធានរ៉ែ បានណែនាំដល់មន្រ្ដីទាំង​អស់ ឱ្យមានការយកចិត្តទុកដាក់ខ្ពស់ លើការចេញអាជ្ញាបណ្ណសិប្បកម្មជូនអ្នកស្នើសុំ ពោលគឺមន្រ្ដីជំនាញត្រូវធ្វើការ​ចុះវាយ​តម្លៃ តាមដាន ត្រួតពិនិត្យ ជាប់ជាប្រចាំលើទិដ្ឋភាព បច្ចេកទេស សេដ្ឋកិច្ច សង្គម និងបរិស្ថាន ជាពិសេសកិច្ចស​ហការ​ជាមួយមន្ទីររ៉ែ និងថាមពលសំដៅដល់ការកៀរគចំណូល និងទប់ស្កាត់ការលេចធ្លាយចំណូលជាតិ ដែលបណ្តាល​មក​ពីកង្វះកិច្ចសហការ និងការអនុវត្តខុសខ្លឹមសារនៃលិខិតបទដ្ឋានគតិយុត្តិជាធរមាន។

ជាមួយគ្នានេះ លោក អ៊ឹង ឌីប៉ូឡា បានណែនាំឱ្យមន្ត្រីពាក់ព័ន្ធស្វែងយល់ឱ្យកាន់តែច្បាស់ពីតួនាទី ភារកិច្ចរបស់ថ្នាក់ជាតិ និងថ្នាក់ក្រោមជាតិក្នុងការអនុវត្តមុខងារពាក់ព័ន្ធវិស័យរ៉ែប្រកបដោយប្រសិទ្ធភាពខ្ពស់ក្នុងនោះមានដូចជា៖ ការធ្វើប្រតិ​ភូកម្ម​មុខងារជូនរដ្ឋបាលខេត្ត ក្រុង ស្រុក ការធ្វើអាជីវកម្ម រ៉ែមាស រ៉ែដែក រ៉ែថ្ម ថ្មអារ គ្រួសក្រហមអាចមន៍ដី ខ្សាច់ និងខ្សាច់បក ការចងក្រងសហគមន៍សម្រាប់ធ្វើអាជីវកម្មរ៉ែមាស និងបទពិសោធន៍នៃផលប៉ះពាល់ដែលកើតមាន​ឡើងនាពេលកន្លងទៅ កើតចេញពីសហគមន៍រ៉ែមាសនៅខេត្តមណ្ឌលគីរី និងវិធានការចំពោះការដឹកជញ្ជូនរ៉ែសំណង់គ្រប់​ប្រភេទ ព្រមទាំងកាតព្វកិច្ចហិរញ្ញវត្ថុរបស់អ្នកកាន់អាជ្ញាបណ្ណ ត្រូវបង់ចំណូលចូលរដ្ឋ។

គិតត្រឹមដើមខែធ្នូ កម្ពុជាចម្រាញ់រ៉ែមាសបានចំនួន ៤,៨២៥គីឡូក្រាមហើយ នៅទីតាំងចំនួន៤ ដែលក្រុមហ៊ុនកំពុង​ធ្វើអាជីវកម្មរ៉ែមាស នៅក្នុងខេត្ដចំនួន៣ រួមមាន៖ ខេត្តព្រះវិហារ, ខេត្តក្រចេះ និងខេត្តមណ្ឌលគិរី៕ សំអឿន