សម្ដេចតេជោ ហ៊ុន សែន ផ្ដល់ការអនុគ្រោះ​ពន្ធប៉ាតង់រយៈពេល៥ឆ្នាំដល់​សារព័ត៌មានអនឡាញ

សម្តេចតេជោ ហ៊ុន សែន នាយករដ្ឋមន្រ្តីកម្ពុជា បានប្រកាសផ្តល់ការអនុគ្រោះពន្ធប៉ាតង់រយៈពេល៥ឆ្នាំដល់សារព័ត៌មាន​អនឡាញ នៅកម្ពុជា។ សម្តេចតេជោ ប្រកាសបែបនេះ នៅក្នុងជំនួបសំណេះសំណាល និងពិសាអាហារសាមគ្គីជា​មួយអ្នកសារព័ត៌មានប៉ុន្មានជិត ៥,០០០ នាក់ នៅសាលពិព័រណ៍កោះពេជ្រ នាល្ងាចថ្ងៃទី ១៤ ខែ មករា ឆ្នាំ ២០២៣ បន្ទាប់ពីមានការអាក់ខានរយៈពេលបីឆ្នាំដោយសារជំងឺកូវីដ-១៩។

សម្តេចមានប្រសាសន៍ដូច្នេះថា« ខ្ញុំសូមប្រកាសជូនផ្នែកប៉ាតង់នេះ ជាបន្ទុករបស់រដ្ឋរយៈពេល ៥ឆ្នាំ ​​ប៉ុន្តែអ្នកទាំងអស់​គ្នាត្រូវទៅជួបជាមួយអង្គភាពទទួលខុសត្រូវ កុំអាងតែអនុគ្រោះលេងបង្កើតក្រៅច្បាប់ឱ្យសោះ»។

ជាមួយនឹងការប្រកាសអនុគ្រោះពន្ធប៉ាតង់នេះ សម្តេច ក៏បានណែនាំឱ្យ​ស្ថាប័នសារព័ត៌មានអនឡាញទាំងអស់ ត្រូវទៅចុះបញ្ជីដូចធម្មតា។

ទន្ទឹមនឹងនេះ សម្តេច ក៏បានរំលឹកដល់ស្ថាប័នសារព័ត៌មានធំៗ ដូចជា វិទ្យុ ទូរទស្សន៍ គឺនៅតែបន្តបង់ពន្ធធម្មតាដដែល។

សូមបញ្ជាក់ថា បច្ចុប្បន្នកម្ពុជា មានស្ថាប័នព័ត៌មានអនឡាញចំនួន ៦២១ ស្ថាប័ន ស្មើនឹង ៩៧ភាគរយនៃអាជីវកម្ម​ខ្នាតតូច និងមធ្យម ដែលរដ្ឋអាចទទួលបន្ទុកពន្ធប៉ាតង់។ នេះបើតាមការបញ្ជាក់របស់សម្តេចតេជោ ហ៊ុន សែន៕