សេដ្ឋកិច្ច

វៀតណាមជាទីផ្សារធំបំផុត សម្រាប់នាំចេញស្វាយចន្ទីពីខេត្តស្ទឹងត្រែង

បានផុស

១១ ខែ មុន

នៅ

ថ្ងៃអង្គារ ២៥ មេសា ២០២៣

ដោយ

លោក ទុំ នីរ៉ូ ប្រធានមន្ទីរកសិកម្ម រុក្ខាប្រមាញ់ និងនេសាទ បានលើកឡើងថា បច្ចុប្បន្នទីផ្សារនាំចេញស្វាយចន្ទី និងកៅស៊ូធំក្នុងខេត្តស្ទឹងត្រែងមានតែប្រទេសវៀតណាមមួយប៉ុណ្ណោះ ខណៈទីផ្សារប្រទេសថៃមានចំនួនតិចតួច។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងសន្និសីទកាលពីម្សិលមិញនេះ លោក ទុំ នីរ៉ូ ប្រធានមន្ទីរកសិកម្មខេត្តស្ទឹងត្រែងបានមានប្រសាសន៍ថា ដំណាំកសិឧស្សាហកម្មដែលសក្តានុពលសម្រាប់ការដាំដុះក្នុងខេត្តស្ទឹងត្រែងមានដូចជាស្វាយចន្ទី ដំឡូងមី កៅស៊ូ ជាដើម។

គិតមកដល់ពេលបច្ចុប្បន្ននេះ ដំណាំស្វាយចន្ទី នៅក្នុងខេត្តស្ទឹងត្រែង មានផ្ទៃដីក្នុងរង្វង់ ១ម៉ឺន ៥ពាន់ហិតា ដែលនេះជាទិន្នន័យចុះយកជាក់ស្តែង ប៉ុន្តែបើផ្អែកលើទិន្នន័យផ្កាយរណបដែលទទួលបានពីសមាគមស្វាយចន្ទីកម្ពុជាវិញ មានរហូតដល់ ៦ម៉ឺន ៧ពាន់ហិតា។ ក្នុងរយៈពេល ៥ឆ្នាំនឹះ ទិន្នផលដែលផលិតបានមានប្រមាណ ៩០ ពាន់តោន ដល់ ១០០ពាន់តោន ក្នុងមួយឆ្នាំៗ។

ដោយឡែកចំពោះដំណាំកៅស៊ូ នៅក្នុងខេត្តមានផ្ទៃដី ១ម៉ឺន ៣ពាន់ហិតា បានផលជាង ២ ម៉ឺនតោននៅក្នុងមួយឆ្នាំៗ ដែលអាចទទួលបានចំណូលប្រមាណជាង ២០លានដុល្លារផងដែរ។

លោក ប្រធានមន្ទីរបានបន្តថា បច្ចុប្បន្ននេះនៅក្នុងមូលដ្ឋានខេត្តស្ទឹងត្រែងនៅមិនទាន់មានរោងចក្រកែច្នៃខ្នាតធំនៅឡើយ គឺបានត្រឹមតែសិប្បកម្មខ្នាតតូចប៉ុណ្ណោះ ដូច្នេះផលកសិកម្មប្រមាណជាង ៩០% បាននាំចេញតាមរយៈឈ្មួញកណ្ដាល ហើយទិសដៅធំទៅកាន់ទីផ្សារប្រទេសវៀតណាម ហើយប្រទេសថៃមានចំនួនតិចតួចប៉ុណ្ណោះ៕