ព័ត៌មានជាតិ

ក្រុមហ៊ុនចិនបន្ថែមទុនវិនិយោគជាង ២០០ លានដុល្លារ ពង្រីករោងចក្រផលិតសំបកកង់យានយន្តនៅកម្ពុជា

បានផុស

៣ years មុន

នៅ

ថ្ងៃពុធ ១ វិច្ឆិកា ២០២៣

ដោយ

បើតាមការអះអាងពីលោក ស៊ុន ចាន់ថុល ឧបនាយករដ្ឋមន្រ្តី និងជាអនុប្រធានទី ១ ក្រុមប្រឹក្សាអភិវឌ្ឍកម្ពុជា ក្រុមហ៊ុនផលិតសំបកកង់យានយន្តមួយនៅតំបន់សេដ្ឋកិច្ចពិសេសខេត្តស្វាយរៀង នឹងពង្រីកខ្សែសង្វាក់ផលិតកម្មដោយគ្រោងបោះទុនវិនិយោគបន្ថែមជាង ២០០ លានដុល្លារដើម្បីបង្កើតរោងចក្រផលិតសំបកកង់ទី ៣ នៅកម្ពុជា។

ការប្រកាសនេះធ្វើឡើងក្នុងពេលលោក ស៊ុន ចាន់ថុល ចុះទស្សនកិច្ចស្វែងយល់ពីតំបន់សេដ្ឋកិច្ចពិសេសនៅខេត្តស្វាយរៀងកាលពីម្សិលមិញនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ស៊ុន ចាន់ថុល បានបញ្ជាក់ថា ក្រុមហ៊ុនបានវិនិយោគរោងចក្រផលិតសំបកកង់យានយន្តនៅក្នុងតំបន់សេដ្ឋកិច្ចពិសេសខេត្តស្វាយរៀងជាង ៥០០ លានដុល្លារដុល្លារអាមេរិក បង្កើតការងារជាង ២ ពាន់កន្លែង។ ក្រុមហ៊ុនបានប្រកាសនឹងពង្រីកខ្សែសង្វាក់ផលិតកម្មដោយបង្កើតរោងចក្រទី ៣ ដោយគ្រោងប្រើប្រាស់ទុនវិនិយោគជាង ២០០ លានដុល្លារ ដែលអាចបង្កើតការងារបានជាង ១ ០០០ កន្លែងបន្ថែមទៀត។

«រោងចក្រនេះធំណាស់ ក្រុមហ៊ុនបានដាក់ទុនវិនិយោគដំណាក់កាលទីមួយនិងទីពីរអស់ជាង ៥០០ លានដុល្លារ។ ហើយក្រុមហ៊ុនប្រកាសនឹងដាក់ទុនបន្ថែមជាង ២០០ លានដុល្លារទៀត ក្នុងការពង្រីករោងចក្រនៅកម្ពុជា»។

បើតាមលោកឧបនាយករដ្ឋមន្រ្តី បណ្តាក្រុមហ៊ុនវិនិយោគដែលបានសម្រេចចិត្តចូលមកបណ្តាក់ទុន និងបានពង្រីកគម្រោងវិនិយោគរបស់ខ្លួនជាបន្តបន្ទាប់នៅកម្ពុជា ដែលនេះបង្ហាញពីជំនឿទុកចិត្តមកលើរាជរដ្ឋាភិបាលកម្ពុជា។

បច្ចុប្បន្នមានក្រុមហ៊ុនផលិតសំបកកង់យានយន្តចំនួន ៣ កំពុងបោះទុនវិនិយោគបង្កើតរោងចក្រនៅកម្ពុជា។

នៅតំបន់សេដ្ឋកិច្ចពិសេស ឈីលូ ជាន ពុ ចាយ នៅខេត្តស្វាយរៀង ក្រុមហ៊ុន Cart Tire បានបង្កើតរោងចក្រផលិតសំបកកង់យានយន្តដែលបោះទុនវិនិយោគ ៥៧៤ លានដុល្លារអាមេរិក នាំចេញទៅកាន់សហរដ្ឋអាមេរិក កាណាដា ម៉ាឡេស៊ី និងកូរ៉េខាងត្បូង និងបានបង្កើតការងារចំនួន ២.០៥៨កន្លែង។

នៅខេត្តព្រះសីហនុ ក្រុមហ៊ុន ជេនេរ៉ល ថាយអឺរ ថេកណឡជី (ខេមបូឌា) ទើបសម្ពោធរោងចក្រផលិតសំបកកង់យានយន្តតម្លៃជាង ៣០០ លានដុល្លារ ដោយមានសមត្ថភាពផលិតកង់រថយន្តប្រមាណ ១,៣ លានកង់ក្នុងមួយឆ្នាំ។

នៅខេត្តក្រចេះ រោងចក្រផលិតសំបកកង់យានយន្តមួយទៀត កំពុងដំណើរការសាងសង់គ្រោងដាក់ឲ្យដំណើរការក្នុងពេលឆាប់ៗខាងមុខនេះ។

ក្នុងដំណើរទស្សនកិច្ចនៅតំបន់សេដ្ឋកិច្ចពិសេសខេត្តស្វាយរៀងកាលពីម្សិលមិញពេញមួយថ្ងៃ លោក ស៊ុន ចាន់ថុល បានដឹកនាំប្រតិភូចុះទៅសិក្សាស្វែងយល់ពីវឌ្ឍនភាពនៃការអភិវឌ្ឍនៅតំបន់សេដ្ឋកិច្ចពិសេសចំនួន ៣ ក្នុងនោះមានតំបន់សេដ្ឋកិច្ចពិសេស ស៊ីន បាវិត ២) តំបន់សេដ្ឋកិច្ចពិសេស ស្វាយរៀង ហ្គីហ្គា រីសស៍ និង ៣) តំបន់សេដ្ឋកិច្ចពិសេស ឈីលូ ជាន ពុ ចាយ។

ក្នុងឱកាសនោះ លោកឧបនាយករដ្ឋមន្រ្តីក៏បានចុះពិនិត្យដល់រោងចក្រមួយចំនួន ដែលកំពុងផលិតសម្ភាៈប្រើប្រាស់ផ្សេងៗដើម្បីនាំចេញទៅទីផ្សារអន្តរជាតិ។

បើតាមរបាយការណ៍របស់ក្រុមប្រឹក្សាអភិវឌ្ឍកម្ពុជា តំបន់សេដ្ឋកិច្ចពិសេសនៅក្នុងខេត្តស្វាយរៀងមានចំនួន ៩ តំបន់ បានទាក់ទាញគម្រោងវិនិយោគមកបណ្តាក់ទុនចំនួន ២១៥គម្រោង ក្នុងនោះកំពុងដំណើរការមានចំនួន ១៣២ គម្រោង ក្នុងទុនវិនិយោគសរុបចំនួន ១.៨៨៦លានដុល្លារ និងបានបង្កើតការងារចំនួន ៧៥.០៨៦កន្លែង៕

សេចក្ដីជូនដំណឹង៥ ថ្ងៃ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា