ការប្រើប្រាស់ប្រាក់រៀលនៅខេត្តព្រៃវែងមានអត្រាខ្ពស់ប្រមាណ៨៨%

ប្រជាពលរដ្ឋរស់នៅក្នុងខេត្តព្រៃវែង បានប្រើប្រាស់ប្រាក់រៀលប្រមាណ ៨៨% សម្រាប់ការ​ចំណាយ​​​​ប្រចាំ​ថ្ងៃ។ នេះបើយោងតាមលទ្ធផលអង្កេតរបស់ធនាគារជាតិនៃកម្ពុជា។

លោក យឹម លាត ទេសាភិបាលរង ធនាគារជាតិនៃកម្ពុជាបានលើកឡើងនៅក្នុងពិធីសិក្ខាសាលា​ផ្សព្វផ្សាយ ស្ដីពីប្រាក់រៀល ប្រព័ន្ធបាគង និងខេអេចឃ្យូអរនៅថ្ងៃទី ៣០ ខែកក្កដា ឆ្នាំ ២០២៤ នេះថា រាជរដ្ឋាភិបាលបានដាក់ចេញនូវគោលនយោបាយលើកកម្ពស់ប្រាក់រៀលជាច្រើន ចាប់តាំង​ពីដើម​​ទសវត្សរ៍ឆ្នាំ ២០០០ ក្រោយពេលកម្ពុជាមាន សន្តិភាពពេញលេញនៅចុងឆ្នាំ ១៩៩៨។

យោងតាមលទ្ធផលអង្កេតរបស់ធនាគារជាតិនៃកម្ពុជា សហការជាមួយភ្នាក់​ងារស​ហប្រតិបត្តិការ​អន្តរ​​ជាតិជប៉ុន (JICA) ឆ្នាំ ២០១៧ បានបង្ហាញថា ប្រាក់រៀលបានទទួលការទុកចិត្ត និងការប្រើប្រាស់កាន់តែច្រើន ជាពិសេសចំពោះការចំណាយ​ប្រចាំថ្ងៃរបស់ប្រជាជន​នៅខេត្ត​ព្រៃវែង ក្នុងនោះ ៨៨% គឺជាប្រាក់រៀល។

ក្រោយទទួលបានឯករាជ្យពីបារាំង ឆ្នាំ ១៩៥៣ ហើយធនាគារជាតិនៃកម្ពុជាត្រូវបានបង្កើតឡើងនៅឆ្នាំ ១៩៥៤ និងបោះផ្សាយប្រាក់រៀលនៅខែកញ្ញា ឆ្នាំ ១៩៥៥ ក្នុងសម័យសង្គមរាស្រ្តនិយម ប៉ុន្តែកម្ពុជាបានធ្លាក់ចូលក្នុងសង្គ្រាមស៊ីវិល ចាប់តាំងពីដើមឆ្នាំ ១៩៧០ ដែលបានធ្វើឱ្យបាត់បង់ជំនឿទុកចិត្តលើប្រាក់រៀល ហើយនៅរបប ប៉ុល ពត ប្រាក់រៀលត្រូវបានលុបបំបាត់ឈប់ឱ្យប្រើប្រាស់ទាំងស្រុង។

ក្រោយថ្ងៃរំដោះ ៧ មករា ឆ្នាំ ១៩៧៩ រដ្ឋាភិបាលបានកសាងសេដ្ឋកិច្ច-សង្គមឡើងវិញ ហើយប្រាក់រៀលត្រូវបានដាក់ឱ្យចរាចរឡើងវិញជាផ្លូវការនៅថ្ងៃទី ២០ ខែមីនា ឆ្នាំ ១៩៨០។

រហូតដល់ដើមឆ្នាំ ១៩៩០ កម្ពុជាបានរៀបចំការបោះឆ្នោតឡើងវិញក្រោមការរៀបចំដោយអ៊ុនតាក់ នៅពេលនេះ អ៊ុនតាក់បានចំណាយក្នុងប្រតិបត្តិការរបស់ខ្លួនផ្ទាល់ជាដុល្លារអាមេរិក យ៉ាងសន្ធឹកសន្ធាប់ រួមផ្សំនិងការហូរចូលនៃជំនួយ និងពាណិជ្ជកម្ម ទេសចរបរទេស ដែលនាំយកដុល្លារមកប្រើដោយផ្ទាល់នៅកម្ពុជា ដែលនាំឱ្យកម្ពុជាបានប្រើយ៉ាងទូលំទូលាយរហូតដល់បច្ចុប្បន្ន៕