ចូលរួ​មប្រកួត ១ ម៉ឺន​រៀល ចាយអ្វី​បានខ្លះ? យុវជនម្នាក់ឈ្នះ​ ទទួល​បានប្រាក់​រង្វាន់ ២ លាន​រៀល

យុវជនម្នាក់ មកពីទីរួមស្រុកសំបូរ ទទួលបានជយលាភីលេខ១ ដោយទទួលបានប្រាក់រង្វាន់ចំនួន ២ លានរៀន អមដោយប័ណ្ណសរសើរ ក្នុងចំណោមបេក្ខជនជាច្រើននាក់ ដែលបានដាក់ពាក្យចូលរួមប្រកួតផលិតវិឌីអូ ក្រោមប្រធានបទ ប្រាក់ ១ ម៉ឺនរៀល អាចទិញអ្វីបានខ្លះនៅខេត្តក្រចេះ?

ការប្រកួតផលិតវិឌីអូ ក្រោមប្រធានបទ ១ ម៉ឺនរៀល ដែលរៀបចំឡើងដោយធនាគារជាតិនៃកម្ពុជា នៅក្នុងកម្មវិធីផ្សព្វផ្សាយស្តីពី ប្រាក់រៀល ប្រព័ន្ធបាគង និងខេអេចឃ្យូអរ (KHQR) ក្នុងឱកាសអបអរខួបលើកទី៤៥ ទិវាប្រាក់រៀល នៅថ្ងៃទី១៦ ខែឧសភា ឆ្នាំ២០២៥ នៅទីរួមខេត្តក្រចេះ។

យុវជនទទួលបាន​ជយលាភីលេខ ១ មានឈ្មោះ យ៉ែម ស៊ីម៉ា រស់នៅទីរួមស្រុកសំបូរ ខេត្តក្រចេះ បានសម្ដែងភាពសប្បាយរីករាយយ៉ាងខ្លាំង ដែល​បានមកចូលរួមកម្មវិធីមួយនេះ និងបានរៀបរាប់ប្រាប់ថា ការថតវិឌីអូគឺជាចំណង់ចំណូលចិត្ត ជាការស្រឡាញ់ចូលចិត្តរបស់ខ្លួនផ្ទាល់ ហើយឆ្លៀតឱកាសដែល​ធនាគារជាតិនៃកម្ពុជាចុះមកខេត្តក្រចេះ ហើយ​ចាប់អារម្មណ៍ចូលរួមប្រកួតប្រជែង ធ្វើយ៉ាងម៉េចកុំឲ្យឱកាសនេះរំលងផុត។

យុវជនរូបនេះ បានរៀបរាប់បន្តថា តាមរយះការបង្កើតមាតិកា តើប្រាក់ ១ ម៉ឺនរៀលអាចទិញអ្វី បានខ្លះនៅខេត្តក្រចេះ? គឺជាផ្នែកមួយជម្រុញឲ្យប្រជាជនខ្មែរចាប់ផ្ដើមចាយប្រាក់រៀលឡើងវិញ ដើម្បី​ជួយគាំទ្រសេដ្ឋកិច្ចជាតិ។

លោក យ៉ែម ស៊ីម៉ា ក៏បានលើកទឹកចិត្តឲ្យ​យុវជន​ងាកមកគាំទ្រប្រាក់រៀលខ្មែរ ដើម្បីគាំទ្រសេដ្ឋកិច្ចជាតិ និងដើម្បីភាពងាយស្រួលក្នុងប្រទេសផងដែរ។ មួយទៀត ការចាយប្រាក់រៀល គឺពិតជាសំខាន់នៅក្នុងការជួយលើកស្ទួយ សេដ្ឋកិច្ចជាតិ ក៏ដូចជាការលើកស្ទួយអត្តសញ្ញាណជាតិរបស់យើងផងដែរ។

កម្មវិធីផ្សព្វផ្សាយស្តីពី ប្រាក់រៀល ប្រព័ន្ធបាគង និងខេអេចឃ្យូអរ (KHQR) នេះដែរ គឺរៀបចំឡើងក្រោមអធិបតីភាព លោក យឹម លាត ទេសាភិបាលរងធនាគាំជាតិនៃកម្ពុជា និងវត្តមានការចូលរួមពី លោក ទុយ ប៊ុនសេរីរ័ត្នមុនី អភិបាលរងនៃគណៈអភិបាលខេត្តក្រចេះ ឯកឧត្តម លោកជំទាវ លោក លោកស្រីតំណាងមន្ទីរគ្រឹះស្ថានធនាគារ និងហិរញ្ញវត្ថុ លោកគ្រូ អ្នកគ្រូ និងសិស្សានុសិស្សជាច្រើននាក់៕

អត្ថបទ៖ ប្រុញ វិធិន