ព័ត៌មានអន្ដរជាតិ

សេដ្ឋកិច្ចថៃ កើន ៣ ភាគរយ នៅត្រីមាសទី៣ ឆ្នាំលើឆ្នាំ លឿនបំផុតក្នុងរយៈពេល២ឆ្នាំ

បានផុស

២ years មុន

នៅ

ថ្ងៃចន្ទ ១៨ វិច្ឆិកា ២០២៤

ដោយ

ក្រុមប្រឹក្សាអភិវឌ្ឍន៍សេដ្ឋកិច្ច និងសង្គមជាតិថៃ (NESDC) បានឱ្យដឹងនៅថ្ងៃនេះថា សេដ្ឋកិច្ចរបស់ប្រទេសបានកើនឡើង ៣ ភាគរយ នៅត្រីមាសទី៣ ធៀបនឹងរយៈពេលដូចគ្នាកាលពីឆ្នាំមុន ដែលវាជាកំណើនលឿនបំផុតក្នុងរយៈពេល ២ ឆ្នាំ និងលើសការព្យាករ ២,៦ ភាគរយ។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ធៀបនឹងត្រីមាសទី២វិញ សេដ្ឋកិច្ចថៃបានកើនឡើង ១,២ ភាគរយ នៅត្រីមាសទី៣ ដែលជាកំណើនធំបំផុតក្នុងរយៈពេល ១៨ ខែ ហើយលើសពីការព្យាករ ០,៨ ភាគរយ។ កាលពីត្រីមាសទី២ សេដ្ឋកិច្ចថៃកើនឡើង ២,២ ភាគរយ ក្នុងអត្រាប្រចាំឆ្នាំ និង ០,៨ ភាគរយ ធៀបនឹងត្រីមាសទី១។

ជាមួយគ្នានេះ NESDC បានព្យាករពីកំណើនសេដ្ឋកិច្ច ២,៦ ភាគរយ នៅឆ្នាំនេះ ដោយត្រូវនឹងរង្វង់ព្យាករ ២,៣-២,៨ កាលពីលើកមុន ខណៈកំណើនសេដ្ឋកិច្ចឆ្នាំ ២០២៥ រំពឹងនឹងនៅចន្លោះពី ២,៣-៣,៣ ភាគរយ។

គួរគូសបញ្ជាក់ កំណើនសេដ្ឋកិច្ចថៃនៅត្រីមាសទី៣ បង្ហាញពីភាពប្រសើរឡើងជាងការរំពឹងទុក ខណៈថៃបានប្រឈមមុខនឹងសេដ្ឋកិច្ចដើរអូសជើងក្រោយវិបត្តិកូវីដ១៩ ដោយសារបំណុលគ្រួសារខ្ពស់ តម្រូវការក្នុងស្រុកខ្សោយ ដូចគ្នានឹងស្ថានភាពតម្រូវការនៅប្រទេសដៃគូពាណិជ្ជកម្មដ៏ធំរបស់ថៃ គឺចិន។

រដ្ឋមន្ត្រីក្រសួងហិរញ្ញវត្ថុថៃ លោក Pichai Chunhavajira បាននិយាយថា រដ្ឋាភិបាលថៃនឹងពិចារណាវិធានការជំរុញសេដ្ឋកិច្ចបន្ថែមទៀតនៅថ្ងៃអង្គារនេះ រួមទាំងដំណាក់កាលទី២នៃគោលនយោបាយ «កាបូបឌីជីថល» ដែលចែកលុយប្រមាណ ១០ ០០០ លានបាត/ម្នាក់ ដល់ពលរដ្ឋថៃ ដើម្បីជំរុញការចំណាយ។ វិស័យទេសចរណ៍ និងការនាំចេញ គឺជាវិស័យជំរុញកំណើនសេដ្ឋកិច្ចដ៏សំខាន់របស់ថៃ ហើយរំពឹងថានឹងបន្តជួយដល់សេដ្ឋកិច្ចនៅឆ្នាំក្រោយទៅទៀត៕