កម្ពុជាទទួលបានហិរញ្ញប្បទានជាង៤០០លានដុល្លារពី ADB សម្រាប់គម្រោងអភិវឌ្ឍន៍៦​

រដ្ឋាភិបាលកម្ពុជាតាមរយៈក្រសួងសេដ្ឋកិច្ច និងហិរញ្ញវត្ថុ និង ធនាគារអភិវឌ្ឍន៍អាស៊ី (ADB) បានចុះកិច្ចព្រមព្រៀងប្រាក់កម្ចី និងជំនួយឥតសំណងពី សម្រាប់កម្មវិធីអាទិភាពចំនួន៦ ដែលមានទឹកប្រាក់សរុបចំនួន៤០៣ លានដុល្លារក្នុងឆ្នាំ២០២៤នេះ។

​ចុះកិច្ចព្រមព្រៀងប្រាក់កម្ចី និងជំនួយឥតសំណងរវាងភាគីទាំងពីរត្រូវបានធ្វើឡើងកាលពីថ្ងៃទី១៧ខែ​រវាងលោកអូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្ត្រីក្រសួងសេដ្ឋកិច្ច និង​ហិរញ្ញវត្ថុ និងលោកស្រី Jyotsana Varma នាយិកាធនាគារអភិវឌ្ឍន៍អាស៊ីប្រចាំកម្ពុជា។

សម្រាប់កម្មវិធីទាំងនោះ ការពង្រឹងវិស័យអប់រំ​មធ្យម​សិក្សា, ការដោះស្រាយអំពើហិង្សាផ្អែកលើយេនឌ័រ (GBV), ការជំរុញពាណិជ្ជកម្មនិងសមត្ថភាព​ប្រកួត​ប្រជែង, ការគាំទ្រការគ្រប់គ្រងធនធានទឹករួម និង ការពង្រីក​វិសាល​ភាព​ការផ្គត់​ផ្គង់​ទឹកមានសុវត្ថិភាព និង​អនាម័យ​មូលដ្ឋាន (WASH)​ ដែលធន់នឹងអាកាស​ធាតុ​ និង​ប្រកប​ដោយ​បរិយាបន្ននៅកម្ពុជា។

បើយោងតាមទៅតាម ADB  សម្រាប់ប្រាក់កម្ចី ៩0 លានដុល្លារ​ (ដែលបានចុះហត្ថលេខាពីមុន) សម្រាប់កម្មវិធីអភិវឌ្ឍនន៍វិស័យដើម្បីលើកកម្ពស់ការផ្គត់ផ្គង់ទឹកមានសុវត្ថិភាព និងអនាម័យមូលដ្ឋាននៅតំបន់ជនបទ ដើម្បី​ពង្រឹងនិងពង្រីក វិសាលភាព សេវាផ្គត់​ផ្គង់​ទឹក​មាន សុវត្ថិភាព និង អនាម័យមូលដ្ឋាន​ ដែលធន់នឹងអាកាស​ធាតុ​ និងប្រកប​ដោយ​បរិយាបន្ន នៅទីជនបទ​សម្រាប់​ ៨៨.000 គ្រួសារ ក្នុងភូមិចំនួន ៤00 នៃឃុំចំនួន ៥0 ក្នុងប្រាំបួន​ខេត្ត នៃប្រទេសកម្ពុជា។

ចំពោះគម្រោងអប់រំថ្នាក់មធ្យមសិក្សាដើម្បីពង្រឹងសមត្ថភាពប្រកួតប្រជែងផ្នែកមូលធនមនុស្សដែលមានទឹកប្រាក់៨០លានដុល្លារ​។ ជាមួយគ្នានេះដែរ ADB ក៏បានផ្តល់នូវជំនួយឥតសំណងចំនួន ១0 លានដុល្លារសម្រាប់ កម្រោងពង្រឹងប្រព័ន្ធនៃការបង្ការ និងឆ្លើយតបនឹងអំពើហិង្សាដែលទាក់ទងនឹងយេនឌរ័​ ដែលនឹងជួយកម្ពុជាសម្រេចគោលដៅ​ជា ប្រទេស​គ្មាន អំពើហិង្សាដែលទាក់ទងនឹងយេនឌ័រ នៅឆ្នាំ២០៣០។​​

បើតាម ADB សម្រាប់កម្មវិធីរងទី២ គឺផ្តោតលើកវិស័យពាណិជ្ជកម្ម និងបង្កើនភាពប្រកួតប្រជែអដែលមានទឹកប្រាក់៥០លានដុល្លារ ដែលកំពុងដំណើរការ សំដៅគាំទ្រដល់កិច្ច​ខិតខំ​ប្រឹង​ប្រែង​ធ្វើ​ឱ្យបរិយាកាសធុរកិច្ចកាន់តែងាយស្រួលសម្រាប់ការវិនិយោគ លើកកម្ពស់​អាជីវកម្មឱ្យកាន់តែមាន​សមត្ថភាព​ប្រកួតប្រជែងខ្ពស់ និងបន្ធូរបន្ថយរបាំងពាណិជ្ជកម្ម។ ​

ចំពោះ ការផ្តោតលើអាងទន្លេក្នុងខេត្តបាត់ដំបងនិងខេត្តពោធិសាត់ក្នុងអាងទន្លេសាប ប្រាក់កម្ចីចំនួន ៨៨ លានដុល្លារសម្រាប់គម្រោងគ្រប់គ្រងធនធានទឺករួមជាមួយនឹងពង្រឹងការគ្រប់គ្រងធនធានទឹកប្រកប​ដោយ​ការ​បន្ស៊ាំនឹងអាកាសធាតុនិងបរិស្ថានមេត្រី, ធ្វើទំនើបកម្មប្រព័ន្ធធារាសាស្ត្រ និងកាត់បន្ថយហា​និភ័យទឹក​ជំនន់។

ការផ្តល់ហិរញ្ញប្បទានបន្ថែមសម្រាប់ គម្រោងកែលម្អវិស័យធារាសាស្រ្តកសិកម្ម ​ដែល​មានកម្ចីចំនួន ៨៥ លានដុល្លារ នឹងជួយលើកកម្ពស់ប្រសិទ្ធភាពនៃការជញ្ជូនបែងចែកទឹក និងភាពធន់នឹង​អាកាសធាតុនៃប្រព័ន្ធធារាសាស្ត្រចំនួន ៤ នៅខេត្តបាត់ដំបង កំពង់ចាម កំពង់ធំ និងខេត្តតាកែវ ព្រមទាំង​ចែក​រំលែកការអនុវត្តល្អៗជាមួយកសិករដើម្បីបង្កើន ភាពធន់នឹងអាកាសធាតុ និងប្រសិទ្ធភាពនៃការចែក​ចាយ​ទឹកនៃហេដ្ឋារចនាសម្ព័ន្ធធារាសាស្ត្រ។

គម្រោងនេះក៏នឹងគាំទ្រដល់ ការពង្រឹងសមត្ថភាពសម្រាប់​ប្រតិបត្តិការនៃ មជ្ឈមណ្ឌលជាតិគ្រប់គ្រងទិន្នន័យធនធានទឹករបស់កម្ពុជា និងប្រព័ន្ធព័ត៌មានធនធាន​ទឹក​ជាតិ​ដែលពាក់ព័ន្ធ ព្រមទាំងការងាររៀបចំ និងរចនាសម្រាប់ការវិនិយោគនាពេលអនាគតលើការ​គ្រប់គ្រង​ទឹក​ជំនន់ និងគ្រោះរាំងស្ងួត។

លោកស្រី Varma នាយិកា មាន​ប្រសាសន៍ថា ឆ្នាំនេះ គឺជាព្រឹត្តិការណ៍ដ៏សំខាន់មួយសម្រាប់​ភាព​ជាដៃគូរវាង ADB ជាមួយកម្ពុជា ជាមួយនឹងការអនុម័តប្រាក់កម្ចី និងជំនួយឥតសំណងចំនួន ៤០៣ លានដុល្លារ ក្រោមក្របខណ្ឌនៃ យុទ្ធសាស្ត្រភាពជាដៃគូសម្រាប់អភិវឌ្ឍន៍កម្ពុជាថ្មីរបស់យើងសម្រាប់ឆ្នាំ ២០២៤-២០២៨។

លោកស្រីថា៖« ពីការពង្រឹងហេដ្ឋារចនាសម្ព័ន្ធសំខាន់ៗ ដល់ការបង្កើនភាពធន់នឹងអាកាសធាតុ និង ការអភិវឌ្ឍធនធានមនុស្ស គម្រោងទាំងនេះនឹងគាំទ្រដល់កំណើនជាបន្តរបស់កម្ពុជាឆ្ពោះទៅ​រក​អនាគត​ប្រកបដោយវិបុលភាព បរិយាបន្ន និងភាពបៃតង។ ADB ក៏ប្តេជ្ញាចិត្តក្នុងការជំរុញបរិយាកាស​អំណោយ ផលសម្រាប់វិស័យឯកជន រួមទាំងការលើកកម្ពស់ពាណិជ្ជកម្ម និងសមត្ថភាពប្រកួតប្រជែងដើម្បីជំរុញ កំណើនសេដ្ឋកិច្ចប្រកបដោយនិរន្តរភាព និងបង្កើតឱកាសសម្រាប់ទាំងអស់គ្នា។ ADB នៅតែ​ប្រកាន់ខ្ជាប់ នូវភាពជាដៃគូមិនងាករេរបស់ខ្លួនជាមួយកម្ពុជា ដើម្បីនាំមកនូវលទ្ធផលវិជ្ជមាន​ដែលជា​អត្ថប្រយោជន៍ យូរ អង្វែងសម្រាប់ប្រជាពលរដ្ឋកម្ពុជា»៕