រដ្ឋាភិបាលលុបចោលអាជ្ញាបណ្ណអាជីវកម្មរ៉ែថ្មនៅខេត្តកំពត ដាក់ជាកន្លែងសាសនា និងទេសចរណ៍

សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជាបានម្រេចលុបចោល​អាជ្ញាបណ្ណ​គម្រោង​អាជី​វកម្ម​រុករករ៉ែថ្មកំបោរមួយកន្លែង ស្ថិតនៅស្រុកកំពង់ត្រាច ខេត្តកំពត ដែលមានទំហំផ្ទៃដីជាង ៤៦០​​ ហិកតា ហើយដាក់អភិរក្សសម្រាប់ជាកន្លែងសាសនា ទេចរណ៍ និងវប្បធម៌វិញ។

សម្ដេចធិបតី ហ៊ុន ម៉ាណែត មានប្រសាសន៍កាលពីពេលថ្មីៗនេះថា៖ «ខ្ញុំបានសម្រេច​លុប​ចោល​អាជ្ញា​បណ្ណឧស្សាហកម្មធនធានរ៉ែថ្មកំបោរមួយ នៅខេត្តកំពត តាមការស្នើសុំ និងពិនិត្យបច្ចេក​ទេស​​របស់ក្រសួងរ៉ែ និងថាមពល ដែលទុកទីតាំងនេះសម្រាប់បដិបត្តិសាសនា អេកូរទេសចរ និង​វប្បធម៌»។

សម្ដេចធិបតីបានអះអាងថា ទីតាំងនេះ អាចដាក់ជាតំបន់បេតិកភណ្ឌ និងជាតំបន់ទេសចរណ៍ ដែល​អាជ្ញា​ធរត្រូវបន្តថែរក្សា។

ពិធីប្រកាសលុបចោលអាជ្ញាបណ្ណរ៉ែថ្មកំបោរបានរៀបចំជាផ្លូវការ​ក្រោមវត្តមានលោក កែវ រតនៈ រដ្ឋមន្ត្រីក្រសួងរ៉ែ និងថាមពល នៅថ្ងៃទី ០៩ ខែមករា ឆ្នាំ ២០២៥ ស្ថិតនៅក្នុងឃុំដំណាក់កន្ទួច​ខាងត្បូង​ និងឃុំដំណាក់កន្ទួចខាងជេីង​ ស្រុកកំពង់ត្រាច​ ខេត្តកំពត​៕