CSX ដាក់ទិសដៅ​បង្កើនតម្លៃជួញដូរប្រចាំថ្ងៃឱ្យសម្រេចបាន៣០ម៉ឺនដុល្លារ និង ចំនួនគណនី​ជួញដូរថ្មីឱ្យបាន ១៥,០០០គណនីបន្ថែមក្នុងឆ្នាំ២០២៥នេះ

យោងតាមការព្យាករណ៍របស់ ធនាគារអភិវឌ្ឍន៏អាស៊ី  កំណើនសេដ្ឋកិច្ចរបស់​ប្រទេសកម្ពុជា​នៅឆ្នាំ ២០២៤ គឺ​ប្រមាណ ៥.៨% និងបន្តកំណើនទៅ ៦.០% ក្នុងឆ្នាំ ២០២៥ ប៉ុន្តែស្ថានភាពនៃការវិនិយោគនៅមានភាព​ស្រពេចស្រពិលនៅឡើយ ដោយសារភាពវិបត្តិនយោបាយជាសកល ដែលជះឥទ្ធិពលដល់វិនិយោគិន ក្នុងការរក្សាសាច់ប្រាក់នៅក្នុងដៃ។

«ទោះបីជាយ៉ាងណា ផ្សារមូលបត្រកម្ពុជា (CSX) ជឿជាក់ថា ឆ្នាំ ២០២៥ នឹងក្លាយជាឆ្នាំដ៏ជោគជ័យសម្រាប់ទីផ្សារទាំងមូល និងជាឱកាសមាសសម្រាប់វិនិយោគិនរបស់ខ្លួន។ វិនិយោគិនមានការយល់ឃើញថ្មីមកលើភាគហ៊ុន ដែលជាផលិតផល  វិនិយោគមានសន្ទនីយភាពខ្ពស់ ងាយស្រួលក្នុងការទិញលក់ ស្របពេលដែលវិនិយោគិនសកម្មក្នុងទីផ្សារមានការកើនឡើង និងជឿជាក់ពីផលចំណេញលើការវិនិយោគភាគហ៊ុនក្នុងថ្លៃបច្ចុប្បន្ន»។

«ក្នុងឆ្នាំ២០២៥នេះផងដែរ យើងនឹងមានក្រុមហ៊ុនចុះបញ្ជីលក់មូលបត្រទាំងមូលបត្រកម្មសិទ្ធិ និងមូលបត្របំណុល ជាបន្តបន្ទាប់។ ដោយបច្ចុប្បន្ន មានក្រុមហ៊ុនខ្លះកំពុងរៀបចំខ្លួន និងខ្លះទៀតបាននឹងកំពុងរៀបចំឯកសារ និងដាក់ពាក្យស្នើសុំ   ពិនិត្យលទ្ធភាពអាចចុះបញ្ជីមកកាន់ CSX» ។ នេះបើយោងតាមសេចក្តីប្រកាសព័ត៌មានរបស់ CSX កាលពីល្ងាចថ្ងៃទី១០ខែមករា។

ស្ថានភាព ផមក ឆ្នាំ ២០២៤

ក្នុងឆ្នាំ ២០២៤កន្លងមកនេះ ផមកបានទទួលស្វាគមន៍ក្រុមហ៊ុនចុះបញ្ជីលក់មូលបត្របំណុលចំនួន ២ក្រុមហ៊ុន រួមមាន  ក្រុមហ៊ុន តែល កូថេក និងក្រុមហ៊ុន រ៉ូយ៉ាល់ គ្រុប ភ្នំពេញ អេសអ៊ីហ្សិត ម.ក ដែលជាក្រុមហ៊ុនចុះបញ្ជីលក់មូលបត្រកម្មសិទ្ធិ កាលពីឆ្នាំ២០១៦។

ផ្អែកលើទិន្នន័យក្នុងឆ្នាំនេះ យើងសង្កេតឃើញថា គណនីជួញដូរសរុបចំនួន ៥៨,៣៩៤ ត្រូវបានបើកដំណើរការ ដែលក្នុងនោះមាន មានការកើនឡើងគណនីថ្មីចំនួន ១២.៧៤៥ គណនី កើនឡើងជាង ២៦% បើធៀបនឹងចំនួនគណនីសរុបត្រឹមឆ្នាំ ២០២៣។ តម្លៃជួញដូរជាមធ្យមក្នុងឆ្នាំ ២០២៤ មានជាង ៥៣៥លានរៀល (ប្រមាណ ១៣៣.៩៦៣ ដុល្លារ) ដែលមានការថយចុះប្រមាណ ៣៥% បើប្រៀបធៀបទៅនឹងឆ្នាំ ២០២៣ ប៉ុន្តែអ្វីដែលគួរឱ្យកត់សម្គាល់គឺការទទួលបានចំណាប់អារម្មណ៍ និងការចូលរួមរបស់វិនិយោគិនក្នុងស្រុក ក្នុង​វិស័យ​មូលបត្រ​បានកើនឡើងជាលំដាប់​។ ទំហំជួញដូរប្រចាំថ្ងៃជាមធ្យមស្មើនឹង ១០១,៨៤៣​ ភាគហ៊ុន ដោយ​ ៩៣% ត្រូវបានជួញដូរដោយវិនិយោគិនក្នុងស្រុក។ ការដាក់បញ្ជាទិញលក់ជាមធ្យមប្រចាំថ្ងៃមានចំនួន ៣,៦២៧ បញ្ជាក្នុងឆ្នាំ ២០២៤ កើនឡើង ២០% បើធៀបនឹងឆ្នាំ ២០២៣  ។

បើតាម CSX ក្រៅពីការជួញដូរតាមទីផ្សារប្រតិបត្តិការតាមរយៈវិធីសាស្ត្រជួញដូរតាមការចរចា (NTM) ក្នុងឆ្នាំ២០២៤ យើងទទួលបាន ១០ ប្រតិបត្តិការ ដែលក្នុងនោះមានភាគហ៊ុនដូចជា PAS, GTI និង PWSA។​ ទំហំជួញដូរសរុបនៃប្រតិបត្តិការទាំងនេះមានចំនួន ១,២១៣,៥៥៤ ហ៊ុន ដែលស្មើនឹង ៦.២៦៦ ពាន់លានរៀល ដែលធ្វើការជួញដូរដោយវិនិយោគិនបរទេស ៦០% ខណៈដែលវិនិយោគិនក្នុងស្រុកបានរួមចំណែក ៤០%។​

CSX ថា៖«នៅក្នុងឆ្នាំ២០២៤ យើងសង្កេតឃើញថា ផ្សាររបស់យើងក៏ទទួលបានការចូលរួមពីវិនិយោគិនបរទេសតាមបណ្ដាប្រទេសនានា​ ដែលក្នុងនោះមានវិនិយោគិន​តៃវ៉ាន់នាំមុខគេក្នុងទំហំជួញដូរដែលមានចំនួន ៣៩.៥០% នៃវិនិយោគិនបរទេសសរុប។ ជប៉ុន ចិន និងថៃ តាមពីក្រោយដោយ ២១,៣១%, ១៤,១៨% និង ៥,៣៦% រៀងគ្នា»។

ការបង្កើនទំនុកចិត្តវិនិយោគិននៅតែជាការងារស្នូលរបស់ CSX  ដោយក្នុងឆ្នាំ ២០២៤ ខ្លួនក៏បានរៀបចំវគ្គបណ្ដុះបណ្ដាលផ្ទាល់ និងតាមរយៈអនឡាញ ក្នុងគោលដៅបង្កើនចំណេះដឹង និងផ្តល់ព័ត៌មានសម្រាប់សាធារណជន, វិនិយោគិន, ម្ចាស់អាជីវកម្ម, និង    វិនិយោគិនសក្តានុពលរបស់យើង។ យើងបានរៀបចំវគ្គបណ្តុះបណ្តាលប្រចាំខែ, វេទិកាក្រុមហ៊ុនចុះបញ្ជី, Earnings Forum, សិក្ខាសាលាពិសេសសម្រាប់សាស្ត្រាចារ្យសាកលវិទ្យាល័យ, កម្មវិធី ៤៥នាទី អំពីការវិនិយោគ, កម្មវិធី ៣៥នាទីអំពីអាជីវកម្ម, និង វគ្គបណ្តុះបណ្តាល ដើម្បីបង្កើនការយល់ដឹងអំពីអត្ថប្រយោជន៍នៃការចុះបញ្ជី ទៅកាន់បណ្ដាក្រុមហ៊ុន     នានា។​ លើសពីនេះ ផមក បានសហការជាមួយសមាជិក និងអ្នកចូលរួមរបស់យើងដើម្បីរៀបចំកម្មវិធីសប្បុរសធម៌ “ក្តីសង្ឃឹមនៃជីវិត” ឆ្នាំ២០២៤, និង​ព្រឹត្តិការណ៍ពិព័រណ៍ផ្សារភាគហ៊ុនកម្ពុជា My First STOCK ឆ្នាំ២០២៤ ជាលើកទី៧។  

​

​ឱកាសនៅក្នុងវិបត្តិ

យោងតាម CSX ​​​​​​​​​​​​​ក្រៅពីភាគហ៊ុន GTI ដែលមានកំណើនថ្លៃជាង ៧៨% ភាគហ៊ុនចំនួន ១០ ផ្សេងទៀតបានធ្លាក់ចុះ ដែលបណ្តាលឱ្យសន្ទស្សន៍ ផមក ធ្លាក់ ១២,៦៨% ក្នុងឆ្នាំ ២០២៤នេះ។ ការធ្លាក់ចុះនៃថ្លៃភាគហ៊ុននេះ មិនបណ្តាលមកពីកត្តាអាជីវកម្មរបស់ក្រុមហ៊ុនទាំងស្រុងទេ តែមូលហេតុចម្បង គឺដោយសារកត្តាមួយចំនួនដូចជា៖

• កត្តាខាងក្រៅ: ការអូសបន្លាយនៃសង្គ្រាមលើពិភពលោកដែលបានជះឥទ្ធិពលទៅលើតម្លៃនៃប្រាក់ដុល្លារ ភាពមិនច្បាស់លាស់នៃស្ថានភាពសេដ្ឋកិច្ចក្នុងស្រុកបណ្តាលមកពីការជាប់គាំងនៃវិស័យអចលនទ្រព្យ និងការធ្លាក់ចុះនៃការចំណាយសរុបក្នុងស្រុក​ ដែលធ្វើឱ្យវិនិយោគិនភាគច្រើនបម្រុងសាច់ប្រាក់ទុក ជាជាងយកទៅប្រើប្រាស់លើការវិនិយោគផ្សេងៗ ស្របពេលដែលការកើនឡើងនូវព័ត៌មាននៃការឆបោកជាបន្តបន្ទាប់ដោយការប្រើប្រាស់ពាក្យ“វិនិយោគ”។
• កត្តាខាងក្នុង : ដោយសារមិនមានសាច់ប្រាក់បន្ថែមចូលមកក្នុងទីផ្សារ ថ្លៃភាគហ៊ុនរបស់ក្រុមហ៊ុនភាគច្រើន នៅលើទីផ្សារក្នុងឆ្នាំ២០២៤ មិនសូវមានការឡើងចុះខ្លាំង ដែលធ្វើឲ្យទីផ្សារមិនសូវមានភាពទាក់ទាញ និងខ្វះសន្ទនីយភាព ក៏ដូចជាការសម្រុកលក់ចេញភាគហ៊ុនរបស់វិនិយោគិនមួយចំនួន​ ដើម្បីដោះស្រាយបញ្ហាខ្វះខាតសាច់ប្រាក់របស់ខ្លួន ជាហេតុធ្វើឱ្យតម្លៃភាគហ៊ុនខ្លះធ្លាក់ចុះខ្លាំង បើទោះបីជាក្រុមហ៊ុនចុះបញ្ជីទាំងនោះកំពុងតែបោះជំហាន និងអភិវឌ្ឍទៅមុខជាប្រចាំក្តី។

CSX ថា៖«ទោះបីជាស្ថានភាពទីផ្សារប្រចាំ២០២៤ មិនសូវជាទីគាប់ចិត្តសម្រាប់វិនិយោគិន ក៏នៅតែមានគេមើលឃើញថា ទីផ្សារមួយនេះ នៅតែមានសក្តានុពលខ្ពស់ដោយសារតែការធ្លាក់ចុះតម្លៃភាគហ៊ុនក្រុមហ៊ុនល្អៗទាំងនេះកំពុងតែបានផ្តល់      ឱកាសដល់វិនិយោគិនធ្វើការទិញភាគហ៊ុននៅក្នុងតម្លៃក្រោមទីផ្សារ ដើម្បីត្រៀមលក់ចេញនៅពេលទីផ្សារត្រឡប់មករកភាពប្រក្រតីវិញ»។

ស្របពេលដែលប្រទេសកម្ពុជាកំពុងធ្វើដំណើរឆ្ពោះទៅរកប្រទេសដែលមានមានចំណូលមធ្យមកម្រិតខ្ពស់ CSX នឹងបន្តដើរតួជាស្ថាប័នមួយក្នុងការជួយជ្រោមជ្រែង កៀរគរទុន និងជំរុញការវិនិយោគ ប្រកបដោយចេរភាព និងនិរន្តភាព ដើម្បីជម្រុញកំណើនសេដ្ឋកិច្ចជាតិ។ ​ ស្របពេលជាមួយគ្នានេះ ការចុះបញ្ជីនូវមូលបត្រកម្មសិទ្ធិថ្មីក្នុងឆ្នាំ ២០២៥នេះ ក៏ជាកត្តាលីករមួយ ដើម្បីជម្រុញឱ្យមានការជួញដូរ និងទាក់ទាញវិនិយោគិនបន្ថែមទៀត។

«ឆ្នាំ ២០២៥នេះ រំពឹងថានឹងក្លាយជាឱកាសមាសសម្រាប់វិនិយោគិនរបស់យើង។ យើងប្តេជ្ញាចិត្តក្នុង​ការសម្រេចឱ្យបានគោលដៅធំៗសម្រាប់ឆ្នាំ២០២៥នេះ ដោយ​បន្ត​បង្កើនតម្លៃជួញដូរប្រចាំថ្ងៃឱ្យ​បាន​ទ្វេដង ពោលគឺប្រមាណ ៣០ម៉ឺនដុល្លារសហរដ្ឋអាមេរិក, ចំនួនគណនីជួញដូរថ្មីឲ្យបាន ១៥,០០០គណនីបន្ថែម, និងបង្កើនចំនួនក្រុមហ៊ុនចុះបញ្ជីឱ្យបានយ៉ាងតិច ចំនួន ៦»។​នេះបើយោងតាម CSX៕  ​