សេដ្ឋកិច្ច

ក្រុមហ៊ុនក្នុងវិស័យកសិកម្មដំបូងគេចូលផ្សារហ៊ុន កៀរគរទុនជិត ៥០ លានដុល្លារ

បានផុស

៦ ខែ មុន

នៅ

ថ្ងៃពុធ ២១ មករា ២០២៦

ដោយ

ក្រុមហ៊ុន ដូនពេញ អាហ្គ្រីកូ បានក្លាយជាក្រុមហ៊ុនមកពីវិស័យកសិឧស្សាហកម្មដំបូងគេ ដោយបានចុះបញ្ជីបោះផ្សាយលក់មូលបត្របំណុលនៅលើផ្សារមូលបត្រកម្ពុជា (CSX) ដោយបានប្រមូលទុន ក្នុងទំហំទឹកប្រាក់ ៤៩ លានដុល្លារ ឆ្លុះបញ្ចាំងពីទំនុកចិត្តរបស់វិស័យឯកជនមកលើវិស័យហិរញ្ញវត្ថុកម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ហុង សុហួរ អគ្គនាយកផ្សារមូលបត្រកម្ពុជា មានប្រសាសន៍ថា ក្រុមហ៊ុនបានធ្វើការកៀរគរទុនវិនិយោគគុណវុឌ្ឍិជាមួយទំហំទឹកប្រាក់សរុប ៤៩ លានដុល្លារ ដែលមានអត្រាគូប៉ុង ៥,២៥% ជាមួយឥណប្រតិទាន ៨ ឆ្នាំ និងមានការធានាពីក្រុមហ៊ុន GuarantCo។

ទុនរយៈពេលវែងនេះ នឹងត្រូវចំណាយទៅលើការពង្រីកសក្តានុពលផ្គត់ផ្គង់ ដូចជាបន្តពង្រីកផ្ទៃដីដាំដុះ វិនិយោគលើប្រព័ន្ធធារាសាស្ត្រ និងគ្រឿងចក្រធុនធ្ងន់ ដែលមានបច្ចេកវិទ្យាទំនើប ដើម្បីពន្លឿននូវខ្សែច្រវាក់ផលិតកម្ម ពង្រីកឃ្លាំងស្តុក និងរោងចក្រកែច្នៃ។

ការដែលក្រុមហ៊ុនក្នុងវិស័យកសិកម្មសម្រេចចិត្តកៀរគរទុនតាមរយៈផ្សារមូលបត្រ មានសារៈសំខាន់ ព្រោះវាអនុញ្ញាតឱ្យក្រុមហ៊ុនទទួលបានទុនរយៈពេលវែង ក្នុងអត្រាការប្រាក់សមរម្យ ដើម្បីយកទៅប្រើប្រាស់តាមផែនការអាជីវកម្មរបស់ក្រុមហ៊ុន។

លោក ហុង សុហួរ យល់ឃើញថា៖ «នេះមិនត្រឹមតែជួយឱ្យក្រុមហ៊ុនរីកចម្រើន ប៉ុណ្ណោះទេ ប៉ុន្តែថែមទាំងជួយបង្កើតការងារ និងលើកកម្ពស់ជីវភាពប្រជាកសិករខ្មែរយើងថែម ទៀតផង»។

លោក ស៊ូ សុជាតិ អគ្គនាយកនិយ័តករមូលបត្រកម្ពុជា មានប្រសាសន៍ថា ក្រុមហ៊ុនដូនពេញ អាហ្គ្រីកូ ជាក្រុមហ៊ុនកសិកម្ម ដែលដាំដំណាំហូបផ្លែ រួមមាន ចេក ម្នាស់ មៀន និងស្វាយ សម្រាប់នាំចេញទៅក្រៅប្រទេស លើមាត្រដ្ឋានកសិឧស្សាហកម្ម ដើម្បីគាំទ្រដល់គោលដៅរបស់រាជរដ្ឋាភិបាល ដែលរួមចំណែកក្នុងការបង្កើនប្រាក់ចំណូលរបស់កសិករ និងលើកកម្ពស់ការអភិវឌ្ឍសេដ្ឋកិច្ច ក្នុងខេត្តរតនគីរី។

ក្រុមហ៊ុន ដូនពេញ អាហ្គ្រីកូ បានបោះផ្សាយលក់មូលបត្របំណុលសម្រាប់វិនិយោគគុណវុឌ្ឍិ ដែលជាប្រភេទសញ្ញាបណ្ណមានបុគ្គលធានាជិត ២ លាន សញ្ញាបណ្ណ (១ ៩៦០ ០០០) ក្នុងទំហំទឹកប្រាក់សរុបចំនួន ១៩៦ ប៊ីលានរៀល ប្រមាណ ៤៩ លានដុល្លារ ដែលសញ្ញាបណ្ណនេះ មានតម្លៃ ១០ ម៉ឺនរៀល ក្នុងមួយឯកតា ជាមួយនឹងអត្រា ៥,២៥% ដែលត្រូវទូទាត់ជាប្រចាំត្រីមាស និងមានឥណប្រតិទាន ៨ ឆ្នាំ (២០២៥-២០៣៣)។

លោក ហ៊ាន សាហ៊ីប រដ្ឋលេខាធិការ ក្រសួងសេដ្ឋកិច្ច និងហិរញ្ញវត្ថុ មានប្រសាសន៍ថា ចុះបញ្ជីបោះផ្សាយលក់មូលបត្ររបស់ក្រុមហ៊ុន ដូនពេញ អាហ្គ្រីកូ ឆ្លុះបញ្ចាំងពីការកើនឡើងខ្ពស់នូវទំនុកចិត្តរបស់វិស័យឯកជនមកលើវិស័យហិរញ្ញវត្ថុកម្ពុជានិយាយជារួម និងវិស័យមូលបត្រកម្ពុជានិយាយដោយឡែក។

គិតមកដល់ពេលនេះ ក្រុមហ៊ុនដែលបានបោះផ្សាយ និងចុះបញ្ជីលក់មូលបត្រនៅផ្សារមូលបត្រកម្ពុជា បានប្រមូលសាច់ប្រាក់ពីទីផ្សារក្នុងរង្វង់ ៧០០ លានដុល្លារ ក្នុងនោះមានក្រុមហ៊ុនចំនួន ១២ បានបោះផ្សាយលក់មូលបត្រកម្មសិទ្ធិ និងក្រុមហ៊ុនចំនួន ១៥ បោះផ្សាយលក់មូលបត្របំណុល៕

អត្ថបទ៖ ឡេង ដេត