ព័ត៌មានអន្ដរជាតិ

ថៃកំណត់គោលដៅកើបចំណូលពីទេសចរណ៍ ១០៣ ប៊ីលានដុល្លារ ឆ្នាំនេះ

បានផុស

១ year មុន

នៅ

ថ្ងៃអង្គារ ៤ កុម្ភៈ ២០២៥

ដោយ

រដ្ឋាភិបាលថៃបានកំណត់គោលដៅកើបចំណូលពីវិស័យទេសចរណ៍ប្រមាណ ៣,៥ ទ្រីលានបាត (១០៣ ប៊ីលានដុល្លារ) ដែលជំរុញជាចម្បងដោយការចំណាយរបស់ភ្ញៀវទេសចរបរទេស ទោះបីជាប្រតិបត្តិការទេសចរណ៍ត្អូញត្អែរថាគោលដៅនេះពិបាកនឹងសម្រេចបានក៏ដោយ។ នេះបើតាមការចុះផ្សាយរបស់កាសែតបាងកកប៉ុស្តិ៍។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មន្រ្តីថៃបានប្រាប់ពីគោលដៅដ៏មហិច្ឆតានេះ កាលពីថ្ងៃចន្ទ នៅពេលអាជ្ញាធរទេសចរណ៍ថៃ (TAT) បានចាប់ផ្តើមបើកព្រឹត្តិការណ៍ «Amazing Thailand Grand Tourism and Sports Year 2025 (ទេសចរណ៍ និងកីឡាដ៏អស្ចារ្យរបស់ថៃឆ្នាំ ២០២៥» ដែលប្រមូលផ្តុំទៅដោយព្រឹត្តិការណ៍ និងសកម្មភាពនានា ដើម្បីទាក់ទាញភ្ញៀវទេសចរបរទេសឱ្យបាន ៣៩ លាននាក់។

រដ្ឋមន្ត្រីក្រសួងទេសចរណ៍ និងកីឡាថៃ លោក Sorawong Thienthong បានថ្លែងថា រដ្ឋាភិបាលនៅតែមានទំនុកចិត្តក្នុងការទទួលបានទាំងចំណូលពីទេសចរណ៍ និងការមកដល់នៃភ្ញៀវ ក្នុងកម្រិតដូចគ្នានៃឆ្នាំ ២០១៩ ពោលគឺមុនវិបត្តិកូវីដផ្ទុះឡើង។

លោក Sorawong បានថ្លែងថា ទោះបីជាថៃកត់ត្រាពីចំនួនភ្ញៀវទេសចរ និងចំណូលតិចជាងប្រទេសជប៉ុនកាលពីឆ្នាំមុនក៏ដោយ ក៏ថៃមិនផ្ដោតលើការប្រកួតប្រជែងជាមួយប្រទេសដទៃដែរ ប៉ុន្តែនឹងផ្ដោតលើបំបែកកំណត់ត្រាឆ្នាំ ២០១៩ របស់ខ្លួន។

រដ្ឋមន្រ្តីដដែលបន្តថា នាយករដ្ឋមន្រ្តីថៃ អ្នកស្រី ផែតងតាន ស៊ីណាវ៉ាត្រា ចង់ឱ្យចំណូលទេសចរណ៍ឈានដល់ ៣,៥ ទ្រីលានបាត ប្រសិនបើអាចទៅរួច ខណៈវាខ្ពស់ជាងគោលដៅផ្លូវការត្រឹម ៣ ទ្រីលានបាត របស់ TAT ។

លោក Sorawong និយាយថា រដ្ឋាភិបាលថៃនឹងផ្តល់អាទិភាពដល់ការសម្របសម្រួលលំហូរភ្ញៀវទេសចរដោយការបង្កើនជើងហោះហើរចូលប្រទេសថៃ តាមរយៈការផ្តល់ជូននូវ «ប័ណ្ណការមកដល់ឌីជីថល TM6» ក៏ដូចជាការកែលម្អការតភ្ជាប់ ការដឹកជញ្ជូនរវាងគោលដៅសំខាន់ៗ និងទីក្រុងធំៗ។

ចំណែកឯប្រធាន TAT លោក Thapanee Kiatphaibool វិញ បាននិយាយថា ការផ្សព្វផ្សាយទេសចរណ៍នៅឆ្នាំនេះ នឹងដំណើរការក្រោមគោលគំនិតចំនួន ៥ ដែលរួមមាន ការរៀបចំពិធីបុណ្យធំៗដូចជាកម្មវិធីសិល្បៈ វប្បធម៌ និងតន្រ្តី, ការណែនាំភ្ញៀវឱ្យទៅគោលដៅទេសចរណ៍មិនគួររំលង ៥ តំបន់, ការអញ្ជើញបុគ្គលល្បីៗឱ្យមកប្រទេសថៃ, ការផ្ដល់ជូននូវអភ័យឯកសិទ្ធិសេវាកម្មផ្សេងៗដល់ភ្ញៀវ, និងការប្រារព្ធខួបនៃទំនាក់ទំនងជាមួយប្រទេសដទៃទៀតជាដើម។

ទោះបីជាមានគោលដៅ និងគម្រោងដ៏មហិច្ឆតាទាំងនេះក៏ដោយ ប្រតិបត្តិការទេសចរណ៍មួយចំនួននៅតែសម្ដែងការព្រួយបារម្ភលើគោលដៅចំណូលរបស់រដ្ឋាភិបាល ថាពិបាកក្នុងការសម្រេចបាន។ កង្វល់មួយនេះ បណ្ដាលមកពីក្ដីបារម្ភពីសុវត្ថិភាពរបស់ភ្ញៀវចិន កម្សោយនៃសេដ្ឋកិច្ចចិន និងបញ្ហាសេដ្ឋកិច្ចផ្សេងៗបង្កដោយគោលនយោបាយពន្ធរបស់សហរដ្ឋអាមេរិកជាដើម៕

Related Topics:ថៃ ទេសចរណ៍ថៃ

ព័ត៌មានអន្ដរជាតិ១៧ ម៉ោង ago

អស់សង្ឃឹមហើយ ក្នុងការសង្គ្រោះជីវិត បុរស ២នាក់ទៀត ដែលជាប់ក្នុងរូងភ្នំ នៅឡាវ

សេដ្ឋកិច្ច៣ ថ្ងៃ ago

ធនាគារ ARDB ចាក់បញ្ចូលទុនលើស្វាយចន្ទី និងដំឡូងមី

ព័ត៌មានជាតិ១ សប្តាហ៍ ago

រដ្ឋបាលខណ្ឌកំបូល សហការជាមួយក្រុមហ៊ុនមីនេបៀ ប្រើប្រាស់កម្លាំងជាង ៨០០នាក់ សម្អាតអនាម័យនៅតាមដងផ្លូវ

ព័ត៌មានអន្ដរជាតិ៧ ថ្ងៃ ago

អ៊ីរ៉ង់ បើកច្រកចូលរូងភ្នំ ផ្ទុកមីស៊ីលសម្ងាត់របស់ខ្លួនឡើងវិញ ទោះរងការវាយប្រហារយ៉ាងដំណំ

សេចក្ដីជូនដំណឹង២ ថ្ងៃ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា