ព័ត៌មានអន្ដរជាតិ

សិង្ហបុរីព្យាករកំណើនសេដ្ឋកិច្ច ១-៣ ភាគរយ ឆ្នាំនេះ

បានផុស

៣ ខែ មុន

នៅ

ថ្ងៃសុក្រ ២១ កុម្ភៈ ២០២៥

ដោយ

ក្រសួងពាណិជ្ជកម្ម និងឧស្សាហកម្មសិង្ហបុរី (MTI) បានព្យាករថា កំណើនសេដ្ឋកិច្ចរបស់ប្រទេសនឹងមានត្រឹមចន្លោះពី ១-៣ ភាគរយ នៅឆ្នាំ ២០២៥ នេះ ដោយយឺតជាងកំណើនឆ្នាំ ២០២៤ ដោយសារតែជម្លោះភូមិសាស្រ្តនយោបាយ និងភាពមិនប្រាកដប្រជាសកល។

របាយការណ៍របស់ក្រសួងដែលចេញផ្សាយកាលពីពេលថ្មីៗនេះ បានបង្ហាញថា សេដ្ឋកិច្ចរបស់សិង្ហបុរីបានកើនឡើង ៤,៤ ភាគរយ នៅឆ្នាំ ២០២៤ ដោយខ្ពស់ជាងការរំពឹងទុក ៤ ភាគរយ។ កំណើននេះជំរុញដោយការកើនឡើងសេដ្ឋកិច្ច ៥ ភាគរយ នៅត្រីមាសចុងក្រោយឆ្នាំ ២០២៤។

យ៉ាងណាមិញ MTI បានដាក់រក្សាការព្យាករកំណើនសេដ្ឋកិច្ចរបស់ប្រទេស ត្រឹមចន្លោះពី ១-៣ ភាគរយ ដោយបណ្ដាលមកពីហាណិភ័យក្នុង និងក្រៅស្រុកជាច្រើន រួមទាំងជម្លោះភូមិសាស្ត្រនយោបាយ និងភាពមិនប្រាកដប្រជាខ្ពស់លើគោលនយោបាយពាណិជ្ជកម្មរបស់សហរដ្ឋអាមេរិក ក្រោមការដឹកនាំរបស់លោកប្រធានាធិបតី លោក ដូណាល់ ត្រាំ។ ជាមួយគ្នានោះ ភាពមិនប្រាកដប្រជានៃគោលនយោបាយសេដ្ឋកិច្ចសកលកាន់តែធំ អាចបង្អាក់ការវិនិយោគ និងពាណិជ្ជកម្មសកល ហើយដាក់បន្តុកលើកំណើនសេដ្ឋកិច្ចពិភពលោក ក៏ដូចជាសិង្ហបុរី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យ៉ាងណាមិញ MTI បាននិយាយថា វិស័យសេវាកម្មដែលទាក់ទងនឹងការផលិត និងពាណិជ្ជកម្មនៅសិង្ហបុរី រំពឹងថានឹងបន្តកើនឡើងនៅឆ្នាំ ២០២៥ ទោះបីជាល្បឿននៃកំណើនរបស់វិស័យទាំងនេះ ទំនងជាមានកម្រិតយឺតជាងឆ្នាំ ២០២៤ ក៏ដោយ។

នៅក្នុងវិស័យផលិតកម្ម គ្រឿងអេឡិចត្រូនិកនឹងកើនឡើងក្នុងល្បឿនស្ថិរភាព ដែលគាំទ្រដោយតម្រូវការដ៏រឹងមាំសម្រាប់បន្ទះឈីបនៅក្នុងកុំព្យូទ័រ ស្មាតហ្វូន និងមជ្ឈមណ្ឌលទិន្នន័យជាដើម។