អ្នករត់តាក់ស៊ី៖ បច្ចុប្បន្ន រប​រដឹកអ្នកដំណើរមិនសូវកាក់កប ប៉ុន្ដែជំនួសដោយការផ្ញើអីវ៉ាន់

ក្រុមអ្នករត់តាក់ស៊ី នៅត្រង់ចំណតផ្សារធំថ្មី បានប្រាប់ឱ្យដឹងថា បច្ចុប្បន្ននេះ របរដឹកអ្នកដំណើរមិនសូវកាក់កប ប៉ុន្ដែជំនួសដោយការផ្ញើអីវ៉ាន់ និងទំនិញគ្រប់ប្រភេទទៅវិញ។

លោក ថេង នាត អ្នករត់តាក់ស៊ី ភ្នំពេញ-ត្បូងឃ្មុំ បានប្រាប់ កម្ពុជាថ្មី នៅថ្ងៃទី៤ ខែមេសានេះ ថា មុខរបរដឹកអ្នកដំណើររបស់លោកសម្រាប់ពេលបច្ចុប្បន្ននេះ ហាក់មិនសូវកាក់កបដូចកាលពីជាង១០ឆ្នាំមុន នោះឡើយ ពោលគឺមានត្រឹមតែម៉ូយស្គាល់គ្នា និងអ្នកផ្ញើអីវ៉ាន់បន្ដិចបន្ដួច តែប៉ុណ្ណោះ។

លោក​ បន្តថា «មូលហេតុដែលមិនសូវមានអ្នកជិះដូចកាលពីមុន ក៏ព្រោះតែសម័យបច្ចុប្បន្ននេះ ប្រជាពលរដ្ឋខ្មែរភាគច្រើនសម្បូរយានជំនិះផ្ទាល់ ដូចជា៖ រថយន្ត ម៉ូតូ និងកង់បី ជាដើម។ កត្តាទាំងនេះហើយ ដែលនាំឱ្យមុខរបររត់តាក់ស៊ី ថមថយចុះពីមួយឆ្នាំទៅមួយឆ្នាំបែបនេះ។

ចំណែក លោក តុង គឹមឈន អ្នករត់តាក់ស៊ី ភ្នំពេញ-កោះកុង ក៏បានលើកឡើងដូចគ្នាដែរថា របរតាក់ស៊ី រយៈពេលប៉ុន្មានឆ្នាំចុងក្រោយនេះ ហាក់រៀងលំបាកបន្ដិច នេះក៏ព្រោះតែប្រជាពលរដ្ឋទូទៅ សម្បូរយានជំនិះផ្ទាល់ខ្លួនច្រើន មិនសូវប្រើប្រាស់សេវាកម្មតាក់ស៊ី ដូចកាលពីប៉ុន្មានឆ្នាំមុន។

លោក គឹមឈន បន្តថា ជារៀងរាល់ថ្ងៃ លោកតែងតែងើបពីព្រឹកដើម្បីដើរប្រមូលភ្ញៀវចេញពីខេត្តឡើងមកភ្នំពេញ និងល្ងាចទទួលអីវ៉ាន់ពីភ្នំពេញចុះទៅតាមខេត្តវិញជារៀងរាល់ថ្ងៃ។ ចំពោះតម្លៃវិញ អ្នករត់តាក់ស៊ីរូបនេះ បញ្ជាក់ថា ក្នុងអ្នកដំណើរម្នាក់លោកយកតម្លៃ ៦០០០០រៀល ចំណែកអីវ់ាន់បន្តិចបន្ដួចមិនគិតថ្លៃនោះឡើយ។

យ៉ាងណាមិញ លោក ចាន់ ដែលជាអ្នករត់តាក់ស៊ីម្នាក់ទៀត ក៏បានលើកឡើងស្រដៀងៗគ្នាដែរថា របររត់តាក់ស៊ី របស់លោកសព្វថ្ងៃនេះ រត់បានម៉ូយយ៉ាងច្រើន៤នាក់ ទៅ៥នាក់ តែប៉ុណ្ណោះ។ អ្នករត់តាក់ស៊ី រូបនេះ បញ្ជាក់ច្បាស់ៗថា «សម្រាប់ខ្ញុំ ក្រៅពីដឹកអ្នកដំណើរ ក៏ឆ្លៀតបញ្ញើអីវ៉ាន់បន្ថែមទៀត ដើម្បីបានទូទាត់ទៅលើការចំណាយថ្លៃប្រេង-សាំង បើមិនដូច្នេះទេ! គឺដាច់បាយហើយបង»៕

អត្ថបទ ៖ សួស សិត