ថៃ៖ ព្រលានយន្តហោះដុនមឿង រំពឹងទទួលភ្ញៀវ ១០០ ០០០ នាក់/ថ្ងៃ អំឡុងសង្រ្កាន្ត

ភ្នាក់ងារ​អាកាសយានដ្ឋាននៃប្រទេសថៃ (AOT) រំពឹងថា អាកាសយានដ្ឋានអន្តរជាតិ​ដុនមឿង ក្នុងទីក្រុងបាងកក នៃប្រទេសថៃ រំពឹង​ថានឹង​ទទួលភ្ញៀវទេសចរ​បរទេស​ និងអ្នកដំណើរ រហូតដល់ ១០០ ០០០ នាក់/ថ្ងៃ ក្នុងអំឡុង​សង្រ្កាន្ត​ថៃ ឬ​ចូលឆ្នាំថៃ។ នេះបើតាម​ការចុះផ្សាយរបស់​កាសែត The Nation។

ប្រធាន AOT លោក Kirati Kitmanawat មានថ្លែងថា កំណើន​ចំនួនអ្នកដំណើរយ៉ាងច្រើនដ៏សណ្ធឹកនេះ ឆ្លុះបញ្ចាំងយ៉ាងច្បាស់ពីការងើបឡើងវិញនៃឧស្សាហកម្មទេសចរណ៍ថៃ ក៏ដូចជាការបង្កើនទំនុកចិត្តក្នុងចំណោមអ្នកធ្វើដំណើរទាំងថៃ និងអន្តរជាតិ។

លោក​បាន​បន្ត​ថា​៖ «​នេះ​ជា​សញ្ញា​វិជ្ជមាន​សម្រាប់​ការ​ជំរុញ​សេដ្ឋកិច្ច និង​បង្កើត​ប្រាក់​ចំណូល​សម្រាប់​អាជីវកម្ម​ក្នុង​វិស័យ​ទេសចរណ៍ និង​វិស័យ​សេវាកម្ម​ពាក់ព័ន្ធ​»​។

លោកបានបន្ថែមថា អាកាសយានដ្ឋានដុនមឿង ត្រូវបានរៀបចំយ៉ាងល្អ ដើម្បីសម្រួលដល់​កំណើន​នៃអ្នកដំណើរ ដោយបានអនុវត្តប្រព័ន្ធផ្សេងៗ ដូចជាប្រព័ន្ធដំណើរការអ្នកដំណើរទូទៅ (CUPPS) និងការ​កំណត់អត្តសញ្ញាណ​ដោយជីវមាត្រ។ លោកបានពន្យល់ថា ប្រព័ន្ធទាំងនេះជួយកាត់បន្ថយការត្រួតពិនិត្យឯកសារកាន់តែលឿន​នៅកន្លែង​សន្តិសុខ និងអន្តោប្រវេសន៍។