កម្ពុជាកំពុងរៀបចំនីតិវិធីពិសេស សម្រាប់ការនាំចេញទំនិញទៅទីផ្សារអាមេរិក

ក្រសួងពាណិជ្ជកម្មនៅថ្ងៃទី ២៣ ខែមេសា ឆ្នាំ​២០២៥​បានប្រកាសថា​កម្ពុជាបានអនុវត្តយ៉ាងគត់មត់នូវវិធានពាណិជ្ជកម្មអន្តរជាតិ កាតព្វកិច្ច និងការសន្យាពេលចូលជាសមាជិករបស់អង្គការពាណិជ្ជកម្មពិភពលោក ដែលក្នុងនោះកម្ពុជាបានរៀបចំ និងប្រកាសឱ្យប្រើច្បាប់ស្តីពីវិធានដើមកំណើតទំនិញ កាលពីថ្ងៃទី៥ ខែកក្កដា ឆ្នាំ២០២៣ ក្នុងគោលបំណងជំរុញ និងសម្រួលពាណិជ្ជកម្មដែលបានប្រយោជន៍ពីការអនុគ្រោះពាណិជ្ជកម្ម និងការអនុវត្តក្រៅប្រព័ន្ធអនុគ្រោះពាណិជ្ជកម្ម ព្រមទាំងចូលរួមទប់ស្កាត់ការក្លែងបន្លំដើមកំណើតទំនិញ។

ក្រសួងពាណិជ្ជកម្ម និងក្រសួងស្ថាប័នពាក់ព័ន្ធ កំពុងរៀបចំនីតិវិធីពិសេស បន្ថែមសម្រាប់ការនាំចេញទំនិញទៅកាន់ទីផ្សារសហរដ្ឋអាម៉េរិកដើម្បីរក្សាបាននូវផលប្រយោជន៍ជូនផលិតករ និងអ្នកនាំចេញ ដោយនឹងពង្រឹងយន្តការត្រួត ពិនិត្យការប្រើប្រាស់វត្ថុធាតុដើម និងតម្លៃបន្ថែមក្នុងស្រុក ដើម្បីធានាបាននូវតម្លាភាព និងអនុលោមភាពតាមបទប្បញ្ញត្តិនៃច្បាប់ស្តីពីវិធានដើមកំណើតទំនិញ និងវិធានដើមកំណើត ទំនិញរបស់សហរដ្ឋអាម៉េរិក ដែលនីតិវិធីពិសេសបន្ថែមនេះ នឹងត្រូវបានជម្រាបជូននៅពេលឆាប់ៗនេះ។

លោកឧបនាយករដ្ឋមន្ត្រី ស៊ុន ចាន់ថុល អនុប្រធានទី១ នៃក្រុមប្រឹក្សាអភិវឌ្ឍន៍កម្ពុជា និងលោកស្រី ចម និម្មល រដ្ឋមន្ត្រីក្រសួងពាណិជ្ជកម្ម នៅថ្ងៃទី ១៦ ខែមេសា ឆ្នាំ ២០២៥ បាន​ដឹក​នាំបើកការចរចាទ្វេភាគីជាមួយអាមេរិកជុំវិញការដំឡើងពន្ធលើទំនិញនាំចូលទៅអាមេរិក។

ជំនួបនេះ ធ្វើឡើងតាមប្រព័ន្ធវីដេអូជាមួយលោកឯកអគ្គរដ្ឋទូត Jamieson Greer ប្រធានតំ​ណាង​​ពាណិជ្ជ​កម្មអាមេរិក បន្ទាប់ពីរាជរដ្ឋាភិបាល តាម​រយៈ​លិខិតរបស់សម្តេច​មហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា ស្នើសុំបើកការចរចាស្វែងរក​ដំណោះស្រាយរួម និងបញ្ចុះ​ពន្ធគយ​ពីអត្រា ៣៥% មកត្រឹម ៥%​ លើ ១៩ ក្រុមមុខទំនិញ​របស់សហរដ្ឋ​អាមេរិក​នាំចូល​មក​កម្ពុជា។

ភាគីទាំងពីរបានពិភាក្សាលើការពង្រឹងកិច្ចសហប្រតិបត្តិការពាណិជ្ជកម្ម និងវិនិយោគទ្វេភាគី និង​បានផ្ដល់សារៈសំខាន់ លើឆន្ទៈក្នុងការចូលរួមកិច្ចសន្ទនាដោយបើកទូលាយ និងស្មារតីស្ថាបនា ដែលជាមូលដ្ឋានដើម្បីបន្តការចរចារឆ្ពោះទៅសម្រេចឱ្យបាននូវទំនាក់ទំនងពាណិជ្ជកម្មដោយសមធម៌ និងតុល្យភាព។ ភាគីទាំងពីរបានឯកភាពបន្តពិភាក្សាក្នុងអំឡុងពេលឆាប់ៗនេះ៕

អត្ថបទ៖ ឡេង ដេត