សេដ្ឋកិច្ច

យន្តហោះប្រភេទថ្មី ATR 72-600 ដែលក្រុមហ៊ុនអាកាសចរណ៍ជាតិបញ្ជាទិញ មកដល់កម្ពុជា

បានផុស

២ ខែ មុន

នៅ

ថ្ងៃអង្គារ ២៧ ឧសភា ២០២៥

ដោយ

យន្តហោះប្រភេទថ្មី ATR 72-600 មួយគ្រឿង ក្នុងចំណោម ៣ គ្រឿងរបស់ក្រុមហ៊ុនអាកាសចរណ៍ជាតិកម្ពុជា ដែលក្រុមហ៊ុនបានបញ្ជាទិញ បានមកដល់អាកាសយានដ្ឋានអន្តរជាតិភ្នំពេញនៅថ្ងៃទី ២៦ ខែឧសភា ឆ្នាំ ២០២៥ ដើម្បីបង្កើនប្រសិទ្ធភាពប្រតិបត្តិការ និងពង្រឹងការតភ្ជាប់ក្នុងស្រុក និងក្រៅប្រទេស។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យន្តហោះ ATR 72-600 សន្សំសំចៃប្រេង ដោយប្រើប្រាស់ប្រេងតិចជាងយន្តហោះប្រភេទចាស់ពី ១៥% ទៅ ២០% ហើយត្រូវការផ្លូវរត់ខ្លី ជាមួយនឹងសំឡេងស្ងាត់ ដែលមានកន្លែងអង្គុយធំទូលា និងបរិក្ខាទំនើបៗ។

ក្រុមហ៊ុនអាកាសចរណ៍ជាតិគ្រោងទិញយន្តហោះ ATR 72-600 ចំនួន ៣ គ្រឿងនៅឆ្នាំ ២០២៥ បន្ទាប់ពីយន្តហោះទី១ មកដល់នៅថ្ងៃនេះ យន្តហោះទី២ និងទី៣ នឹងមកដល់នៅខែតុលា និងខែវិច្ឆិកាដំណាច់ឆ្នាំ ២០២៥។

ក្រុមហ៊ុនអាកាសចរណ៍ជាតិកំពុងរៀបចំផែនការពង្រីកបណ្ដាញផ្លូវហោះហើរទៅកាន់ទីផ្សារ ដែលមានសក្ដានុពល រួមានអាស៊ី ឦសាន ប្រទេសចិន អាស៊ីខាងត្បូង និងអូស្ត្រាលី ដើម្បីបំពេញតម្រូវការកើនឡើងនៃការធ្វើដំណើរអន្តរជាតិ។ ក្រុមហ៊ុនមានគម្រោងបង្កើនយន្តហោះ ៣៣ គ្រឿង សម្រាប់គាំទ្រដល់កំណើនអនាគត និងពង្រីកជើងហោះហើរអន្តរជាតិ។

យោងតាមអាកាសចរណ៍ស៊ីវិល នៅក្នុងត្រីមាសទី១ ឆ្នាំ ២០២៥ កម្ពុជាទទួលបានអ្នកដំណើរចេញ-ចូលតាមជើងហោះហើរជិត ២ លាននាក់ (១ ៩៦០ ៦៣៥) កើនឡើង ១៩% ធៀបនឹងរយៈពេលដូចគ្នានៅឆ្នាំ ២០២៤។

អាកាសចរណ៍ស៊ីវិល រំពឹងថា វិស័យដឹកជញ្ជូនតាមផ្លូវអាកាសនឹងអាចសម្រេចបាននូវការដឹកជញ្ជូនអ្នកដំណើរ ចំនួន ៧,៥ លាននាក់ និងទំនិញចំនួន ៨០ ពាន់តោន នៅក្នុងឆ្នាំ ២០២៥។

នៅក្នុងឆ្នាំ ២០២៤ កម្ពុជាទទួលបានអ្នកដំណើរចេញ-ចូលតាមជើងហោះហើរជាង ៦ លាននាក់ កើនឡើង ២២% ធៀបនឹងឆ្នាំ ២០២៣៕