ថៃខំបង្កើនការស្ដារទំនុកចិត្តទេសចរចិន ដែលកំពុងធ្លាក់ចុះ

អាជ្ញាធរទេសចរណ៍ថៃ (TAT) កំពុងខិតខំស្តារឡើងវិញនូវទំនុកចិត្តផ្នែកសុវត្ថិភាព និងជម្នះវិបត្តិនៃការធ្លាក់ចុះភ្ញៀវទេសចរចិន ក្នុងគោលបំណង​បញ្ចៀសសេណារីយ៉ូដ៏អាក្រក់បំផុតដែលថា ​ភ្ញៀវទេសចរចិនអាចធ្លាក់ចុះមកត្រឹមតែ ៥ លាន​នាក់ នៅឆ្នាំនេះ។ នេះបើតាមការចុះផ្សាយរបស់កាសែត The Nation កាលពីថ្ងៃអង្គារ។​

អនុប្រធាន TAT ទទួលបន្ទុកទីផ្សារទេសចរអន្តរជាតិនៅអាស៊ី និងប៉ាស៊ីហ្វិកខាងត្បូង លោក​ស្រី Pattaraanong Na Chiangmai ​បាននិយាយថា ​ការធ្វើដំណើរទៅក្រៅប្រទេសរបស់ភ្ញៀវទេសចរ​ចិន​​រំពឹងថានឹងងើបឡើងវិញជិត ១៥០ លាន​ដង ដែលគេកត់ត្រាក្នុងឆ្នាំ ២០១៩ ​ប៉ុន្តែស្ថិតិថ្មីៗរបស់ថៃ បង្ហាញរូបភាពខុសពីនេះ។ ​

ក្នុងរយៈពេល ៤ ខែដំបូង​ដើមឆ្នាំ ២០២៥ ​ថៃទទួលភ្ញៀវទេសចរចិន​ត្រឹមតែ ១,៦៥ លាន​នាក់ ប៉ុណ្ណោះ ពោលគឺធ្លាក់ចុះរហូត ៣០ ភាគរយ ធៀប​នឹង​រយៈពេល​ដូចគ្នាកាលពីឆ្នាំមុន។ ​ការណ៍នេះបណ្ដាលមកពីកង្វល់សុវត្ថិភាពក្នុងស្រុកថៃ ភាពយឺតយ៉ាងនៃសេដ្ឋកិច្ចចិន និងគោលនយោបាយពន្ធគយរបស់ប្រធានាធិបតីអាមេរិក លោក ដូណាល់ ត្រាំ ដែលធ្វើឱ្យ​ប៉ះពាល់ដល់អំណាចទិញរបស់ប្រជាជនចិន។

លើសពីនេះ ការផ្លាស់ប្ដូរទំនោរដំណើរកម្សាន្តរបស់ប្រជាជនចិន ក៏រួចចំណែកដល់ការធ្លាក់ចុះរបស់ថៃផងដែរ ចំពេលទីផ្សារទេសចរណ៍កាន់តែមានប្រកួតប្រជែងខ្លាំងទៅៗ ជាពិសេសពីវៀតណាម និងជប៉ុនជាដើម។

ក្នុងកិច្ចខិតខំប្រឹងប្រែងដើម្បីស្ដារទំនុកចិត្ត​ភ្ញៀវទេសចរចិន TAT បានសហការជាមួយវិស័យឯកជនថៃ និងចិន ដើម្បីរៀបចំព្រឹត្តិការណ៍ «Sawasdee Ni Hao»។ យុទ្ធនាការនេះមានគោលបំណងលើកកម្ពស់ការតភ្ជាប់ការធ្វើដំណើររវាងប្រទេសថៃ និង​ចិន និងធានាដល់ភ្ញៀវទេសចរថា ប្រទេសថៃនៅតែជាគោលដៅសុវត្ថិភាព។

ព្រឹត្តិការណ៍នេះ បានអញ្ជើញ​អ្នកតំណាង​ចិនចំនួន ៦០០ នាក់ ​ដែលមានទាំងភ្នាក់ងារទេសចរណ៍ចំនួន ៤០០ ​​នាក់ ​និងប្រព័ន្ធផ្សព្វផ្សាយ និងអ្នកមានឥទ្ធិពលលើបណ្ដាញសង្គម ចំនួន ២០០ នាក់ រួមជាមួយអ្នកលក់ជនជាតិថៃ ចំនួន ៥០០ នាក់។ គេរំពឹងថា វានឹង​ទាក់ទាញការមើលលើអនឡាញប្រមាណ ៣៥០ លាន​ដង និងបង្កើតជំនួបអាជីវកម្មចំនួន ៥ ០០០ ដង​។ កម្មវិធីដែលនឹងបើកនៅថ្ងៃទី ២៩ ឧសភា ស្អែកនេះ នឹង​មានការចូលរួមពី​​នាយក​រដ្ឋមន្ត្រីថៃ លោក​ស្រី ផែថងថាន ស៊ីណាវ៉ាត្រ។ ​

លោកស្រី Pattaraanong បានបន្ថែមថា ​ពេលកម្មវិធី «Sawasdee Ni Hao» បញ្ចប់ទៅ TAT នឹងវាយតម្លៃឡើងវិញនូវទស្សនវិស័យសម្រាប់ទីផ្សារទេសចរណ៍ចិន ដោយសង្ឃឹម​បញ្ចៀសសេណារីយ៉ូ​ភ្ញៀវចិនត្រឹម ៥ លាននាក់ ​ហើយចំនួននឹងកើនដល់ ៦,៩ លាន​នាក់នៅឆ្នាំនេះ៕ ​

​