ព័ត៌មានអន្ដរជាតិ

ចិនអនុញ្ញាតការនាំចូលទុរេនបង្កកពីឥណ្ឌូណេស៊ី

បានផុស

១ ម៉ោង មុន

នៅ

ថ្ងៃព្រហស្បតិ៍ ២៩ ឧសភា ២០២៥

ដោយ

ទីភ្នាក់ងារសារព័ត៌មានរដ្ឋឥណ្ឌូណេស៊ី Antara បានរាយការណ៍ថា គយចិនបានបើកទីផ្សាររបស់ខ្លួន ដោយអនុញ្ញាតការនាំចូលទុរេនបង្កកពីប្រទេសឥណ្ឌូណេស៊ី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រធានទីភ្នាក់ងារត្រួតពិនិត្យកសិកម្ម (Barantin) របស់ឥណ្ឌូណេស៊ី លោក Sahat Manaor Panggabean បាននិយាយថា លោក និងប្រធានរដ្ឋបាលទូទៅនៃគយចិន (GACC) លោក Sun Meijin បានចុះហត្ថលេខាលើកិច្ចព្រមព្រៀងមួយ ដើម្បីអនុញ្ញាតឱ្យមានការនាំចេញទុរេនបង្កកពីឥណ្ឌូណេស៊ី ទៅកាន់ចិន។

លោក Panggabean បាននិយាយថា កិច្ចព្រមព្រៀងនេះត្រូវបានចុះហត្ថលេខាក្នុងអំឡុងដំណើរទស្សនកិច្ចរបស់នាយករដ្ឋមន្ត្រីចិន លោក លី ឈាំង ទៅកាន់ប្រទេសឥណ្ឌូណេស៊ី កាលពីថ្ងៃទី ២៥ ខែឧសភា ដោយជួបជាមួយលោកប្រធានាធិបតី ប្រាបូវូ ស៊ូប៊ីយ៉ានតូ នៅទីក្រុងហ្សាកាតា។

លោកបានពន្យល់ថា ពិធីសារនាំចេញត្រូវបានយល់ព្រមជាមួយអាជ្ញាធរគយចិន ដោយចាត់ឱ្យ Barantin ដើម្បីត្រួតពិនិត្យដំណើរការនេះ។ ក្រោមពិធីសារដដែល អ្នកនាំចេញត្រូវតែប្រើប្រាស់ឧបករណ៍វេចខ្ចប់ដែលបំពេញតាមស្តង់ដាររបស់ Barantin ហើយទីភ្នាក់ងារនឹងចេញវិញ្ញាបនបត្រ ដើម្បីធានាថា ទុរេនទាំងនោះមានការតាមដានតាំងពីចម្ការ រហូតដល់ការវេចខ្ចប់។

លោក Panggabean បានបន្ថែមថា កិច្ចព្រមព្រៀងនេះត្រូវបានអបអរពីភាគីផ្សេងៗ ទាំងធុរកិច្ច អ្នកនាំចេញ និងរដ្ឋាភិបាលក្នុងតំបន់ ហើយវាបានបើកទីផ្សារចិនជាផ្លូវការ សម្រាប់ទុរេនបង្កកពីឥណ្ឌូណេស៊ី។

គេមើលឃើញថា ការផ្ដល់ការអនុញ្ញាតបែបនេះធ្វើឡើង ខណៈចិនបន្តការរឹតបន្តឹកលើការត្រួតពិនិត្យទុរេននាំចូលពីវៀតណាម និងថៃ។ ចំណាត់ការរបស់ចិន ធ្វើឱ្យទុរេនវៀតណាមចាល់ក្នុងស្រុក ហើយតម្លៃធ្លាក់ចុះ៕